Chānsam 26

26 ¹Lumkachāngli horam thāda kala māhāli zingrot thāda, mangkhama̱wui vang khayākakā maphalungmana. ²Yongkazat konghinao thāda kala yongkasang yāngyao thāda, maram maleila khonkashi china mapamzangmara. ³Siguiwui vang lijei, gadhāwui vang nārenra̱, kala mangkhama̱bingwui khumkhorwui vang lijeina. ⁴Mangkhama̱li awui mangkhama̱ athishurda mangahānkālu, na khalattala a thāda ngasāpaishina. ⁵Mangkhama̱li awui mangkhama̱ athishurda ngahānkālu, ana khalatta thangmeiya da phaningpaishina. ⁶Mangkhama̱ eina pao chihovā china, khalattawui phei katatkhuilaga khayon khamanga. ⁷Phei katek miwui aphei kangyuida arema thāda, mangkhama̱bingwui khamorli chānsam chi chikathāna. ⁸Shairongli ngalung tukkhui thāda, mangkhama̱li khayākakā khami chi chikathāna. ⁹Khamaripawui pāngli ka̱shāt thāda, mangkhama̱bingwui khamorli chānsam chi chikathāna. ¹⁰Mi kachiva̱li khamā za̱ngasaka malā kasing thāda, mangkhama̱li jika rārākasa khipālikhali ngarānmi chi chikathāna. ¹¹Fa̱ china khalattawui maloshokli latlui thāda, mangkhama̱na awui mangkhama̱ otsak latluida sāra. ¹²Khalatta thangmeiya da phaninga mi katheila? Aliva mangkhama̱li kachihāna kachangmei.

¹³Chāngshena, "Shongfali kazingkha̱ lei! Chānreilila kazingkha̱ lei!" da hānga. ¹⁴Khāmong china awui hingpitli ngareithui thāda, chāngshena awui petli ngareithui. ¹⁵Chāngshena khongpheili pāng zangpara; khamorli kāshung khavai a vang ngachāng mamakāmana. ¹⁶Chāngshe china themlāk eina ngahānkā mi shinili khalatta thangmeimeiya da phaninga.

¹⁷Fa̱ chi khanā eina singkhui thāda, awui maningla kharar chili rāzangmi rārākasa mi chi chikathāna.

¹⁸Kapānao meiwon, malā, kala kathi shia thāda, ¹⁹chithāda, awui khongnainaoli minamlaga, "Ina ngashānkasāna!" da hānga a chi hikathāna.

²⁰Thing maleila mei mitra, kala kasupkazat maleila nganang mitra. ²¹Charfa meithāli kala thing meili thāda, khararkazara mina nganang thottai. ²²Kasupkazat akhawui tuibing chi shaikaphā han thai; miwui phasā alungli vāshunga.

²³Ngaleihamli fakhamkasā chon thāda, makaphā wuklung kala nganaipat kahai morchai chi hikathāna. ²⁴Yangkashe china amorchai eina sākhuikhaninga, kha awui wuklungli mikhanam thumhai. ²⁵Ana leishiri kahai matui tharan, ali mashitsangalu, kaja awui ningli ningkakachai ot shini pema. ²⁶Awui yangkakharing mikhanamna ngathumhailala, awui makaphā makhayā kazipli phongshokra. ²⁷Chom kachuia china khalatta chili tāzangra, kala lung khalanga chi khalangpa chiwuitungli latungra. ²⁸Kakapik malena chi za̱ngasaka mibingli ningkachai, kala sotkhamasao khamorna kashimān ngasaka.