Chānsam 27

27 ¹Akhamawui vang malāngsoalu, kaja zimiksho akhana khi khuirāra kaji nana matheimana. ²Mi khangatei akhana nali masot miranu, nawui khamor eina maningmana; kha̱mi akhana masot miranu, nawui morchai eina maningmana. ³Ngalung kharitna kala situi otphunna, kha mangkhama̱wui malungvātkhangasak chi khaniniwui vanga ritmei. ⁴Malungkhavāt sākashina kala malungvāt phongshilonga, kha yuikashiwui mangāli khipāna nganingshaprakhala? ⁵Miktāli kakharar chi ngathumda leikahai leikashi kajiwui vanga phāmei. ⁶Ngasotnaowui khamā chi shitkasangna, kha yangkashewui khamaya̱ chi mikhanamna. ⁷Manghai mina khuira̱ naishāna, kha thaisai mili kakhā chila shimlāka. ⁸Awui shim eina ma̱zatkasa mi chi, awui athip eina ma̱zatkasa vānao thai. ⁹Thao kala nganamkaphāna ning mathān ngasaka, kala ngasotnaowui shima chi wuklung hāngkachithei eina samphanga. ¹⁰Nawui ngasotnao lah nashāvāwui ngasotnao mahormihaialu, kala kalākashi kharā tharan nachināwui shimli mavāalu; achinā katāva̱li lei kajiwui vanga, khongnainao apamli lei chi phāmei. ¹¹Iwui naomayara, thangmeilu, kala iwui ning mathān ngasakmilu, chithāda ili kazeibing chili ngahānkā khavai leisāra. ¹²Thangkhama mina akhalatta kalākashi theida yāmngathuma, kha ningkapaibingna vāmamānda chiwui kakhanang samphanga. ¹³Makatheiawui vang awui nganingkhami tharan kachon akha khuilu; lamkatā sha̱naowui vang nganingkhami tharan akha awui kachon khangashit thāda khuihailu. ¹⁴Khipānakha ngathor akhon panglāk eina awui khongnainaoli somi, chi khonkashi thāda phaningra. ¹⁵Khamarāk preiva̱ chi raina zimiksholi zingrotra̱ ngayishon kaji thai. ¹⁶Ali singtit chi masili singtit kaji thai, lah yāpangna thao singa kaji thai. ¹⁷Marina marili zanngasaka, kala mi akhana mi khangatei akhali zanngasaka. ¹⁸Khaorārong yangmi china athei chi shaira, kala awui akhavāli khāmshapa china khayā samphangra. ¹⁹Tara̱na mai chi chithei thāda, chithāda ningna mikumo chi chithei. ²⁰Kazeiram kala Sākashimān chi ningyang maungphutmara, kala mikumowui mikla ningyang maungphutmara. ^a a v20 Sheol chi kathibingwui ram china; Abaddon chi sākashimānwui pamna. Anina ngasoda kapen mavailak kaji zākhangai akha chithei. ²¹Khāng lupāsāwui vāngna, sharkha̱ sināwui vāngna, kala mikumo chi awui samphang masot eina tamyanga. ²²Mangkhama̱ akhali rungpamli shingkhur eina runglala, mā ngasoda, awui mangkhama̱na ali mahorluimara. ²³Nawui yaobingwui leikasā chi kazak eina theilu, kala nawui seibingli ning ngasharlu. ²⁴Kaja lan chi katang makhavai maleichingmara, kala kuihonla thot kachida maleichingmara. ²⁵Khawo kānhaida, ashon kathar shokda, kala kaphungwui hannā aphākhui tharan, ²⁶yaonaobingna nawui kashankachon ngarānra, kala mebingna luiwui aman ngarānra; ²⁷kala nawui kashakazāwui vang, nawui shimkhurwui kashakazāwui vang, kala nawui rao sha̱naobingli phaui khavai mena̱ shapra samphangra.