ምሳሌ 27 FHB Father's Heart Bible™

27 ¹ሓንቲ መዓልቲ እንታይ ከም እተምፅእ ኣይትፈልጥን ኢኻ እሞ፥ ብፅባሕ ኣይትመካሕ። ²ብኣፍካ ዘይኮነስ ካልእ ሰብ ይንኣድካ፤ ብኸናፍርካ ዘይኮነስ ጓና ይንኣድካ። ³እምኒ ከቢድ እዩ፥ ሑፃ ድማ ሸኽሚ እዩ፤ ኵራ ዓሻ ግና ካብ ክልቲኡ ይኸብድ። ⁴ቍጥዓ ጨካን እዩ፥ ኵራ ድማ ውሒዝ እዩ፤ ኣብ ቅድሚ ቅንኣት ግና መን ክቐውም ይኽእል? ⁵ግሁድ ተግሳፅ ካብ ስዉር ፍቕሪ ይበልፅ። ⁶ቍስሊ ፈታዊ እሙን እዩ፤ ስዕመት ፀላኢ ግና መትለሊ እዩ። ⁷ፅጉብ ሰብ ወለላ መዓር ይረግፆ፤ ንጥሙይ ግና እቲ መሪር እኳ ጥዑም ይመስል። ⁸ካብ ገዛኡ ዝዝንቢ ሰብ፥ ከምታ ካብ ንቚ ዝዝንቢ ዒፍ እዩ። ⁹ዘይትን ዕጣንን ንልቢ የሕጕስዎ፤ ጥዑም ፈታዊ ኸዓ ካብ ልባዊ ምኽሪ ይመፅእ። ¹⁰ንፈታዊኻ ወይ ንፈታዊ ኣቦኻ ኣይትሕደጎም፤ ኣብ መዓልቲ መከራ ድማ ናብ ገዛ ሓውካ ኣይትኺድ፤ ካብ ርሑቕ ሓውሲ ቀረባ ጎረቤት ይበልፅ። ¹¹ነቶም ዝፀርፉኒ መልሲ ምእንቲ ኽህቦም፥ ኦ ወደይ! ጥበበኛ ኩን እሞ ንልበይ ኣሕጕሶ። ¹²ለባም ሰብ ሓደጋ ርእዩ ይሕባእ፤ ዓያሹ ግና ቀፂሎም ይኸዱ፥ መቕፃዕቶምውን ይረኽቡ። ¹³ነቲ ንጓና ዋሕስ ዝኾነ ክዳኑ ውሰደሉ፤ ንጓና ሰበይቲ ኸምኡ እንተ ገይሩ ድማ ትሕጃ ገይርካ ሓዞ። ¹⁴ንግሆ ኣንጊሁ ንጎረቤቱ ብዓብዪ ድምፂ ዝባርኽ፥ መርገም ገይሩ ይቝፀረሉ። ¹⁵ባእሰኛ ሰበይቲ፥ ከምቲ ብዝናም ዘይቋረፅ ነጠብጣብ እያ። ¹⁶ንኣኣ ምዕጋት፥ ከም ንፋስ ምዕጋት ወይ ብየማናይ ኢድካ ዘይቲ ምሓዝ እዩ። ¹⁷ሓፂን ንሓፂን የስልጦ፤ ሰብ ድማ ንብፃዩ የስልጦ። ¹⁸ንበለስ ዝከናኸን ፍሪኣ ይበልዕ፤ ንጐይታኡ ዝሕሉ ድማ ይኸብር። ¹⁹ማይ ንገፅ ከም ዘንፀባርቕ፥ ልቢ ኸዓ ንሰብ ከምኡ የንፀባርቖ። ²⁰ሲኦልን ጥፍኣትን ኣይፀግቡን፤ ኣዒንቲ ሰብውን ኣይፀግባን። ^a a v20 ሲኦል እቲ ዓለም ምዉታት እዩ፤ ኣባዶን ከዓ ቦታ ጥፍኣት እዩ፦ ብሓባር ከዓ ፈፂሙ ዘይፅገብ ጥሜት የርእዩ። ²¹መፍለዪ ንብሩር፥ እቶን ከዓ ንወርቂ እዩ፤ ሰብ ድማ በቲ ዝረኽቦ ውዳሴ ይፍተን። ²²ንዓሻ ምስ እኽሊ ኣብ መድሃር ብመድሃሪ እንተ ወቐጥካዮ እኳ፥ ዕሽነቱ ካብኡ ኣይፍለን እዩ። ²³ኵነታት መጓሰኻ ኣፀቢቕካ ፍለጥ፤ ነተን ኣባጊዕኻ ድማ ኣፀቢቕካ ተኸናኸነን። ²⁴ሃብቲ ንዘለኣለም ኣይፀንሕን እዩ እሞ፤ ኣኽሊልውን ንውሉድ ወለዶ ኣይፀንሕን እዩ። ²⁵ሳዕሪ ምስ ተወድአ፥ ሓድሽ ብቝሊ ድማ ምስ ተርኣየ፥ ሳዕሪ ኣኽራንውን ምስ ተኣከበ፥ ²⁶ዤዋቱ ንኽዳንካ፥ ኣጣል ድማ ንዋጋ ግራት ይኾኑ፤ ²⁷ንቐለብካ፥ ንቐለብ ቤተ ሰብካን ነተን ኣግራድ ቤትካ ንምዕንጋልን ዝኣክል ፀባ ጤል ድማ ክህሉ እዩ።