Nootoi Karnet Karnet
Kicheeng' chorwenatet eng' imanda. Siirto kayanet ne saang' chamyet ne ung'at, po iman pirutigap chorweet, ak ko uu ye tilisei masamek masamek, ko nooto chii ne tilisei chorwennyi. Kateunei kora agobo loskeiyet agobo tomo, ak chobei long'onet koek temutyetap chiito, kogeer eng' keechiirek ak eiik, amu ma miitei mogornatet koigeny.
27 1Meiloskei agobo tomo, amu manai kiy ne imuuchi koibu peetuut. 2Ingolasunin chii age, ago ma kuting'ung'; toondet, ago ma ngotwek kuting'ung'. 3Nyigiis koit ak ko kaimut ng'aniek, ago nyigiis taagetap chiito ne abusat kosiir che aeng' tugul. 4Koroom nereegek ak kosiirto angeet, ago ng'oo ne imuuchi kotonon eng' taitap ng'etkonda? 5Kereet ne nyolu saang' ko myee kosiir chamyet ne ung'egei. 6Po iman pirutigap chorweet, ago che wenjin mwang'utisyegap puunyondet. 7Tilisei chii ne kibiyong' masamek, ago anyiny agot kiy ne ng'won eng' ne amei rubeet. 8Chii ne sesen eng' koonnyi ko uu toriit ne sesen eng' keswennyi. 9Boiboen mwaita ak ng'weet ne anyiny muguleldo, ak punu anyinyindap chorweet rwooget ne po muguleldo. 10Mepagaakta chorweng'ung' anan ko chorweetap kwandang'ung', ak mewe koo ne po tupcheng'ung' ye kagonyonin ng'oiyondit; myee kokweng' ne neegit kosiir tupcheng'ung' ne loo. 11Iik ne ng'oom, weeriinnyu, ak iboiboen muguleldanyu, si amuuch awolji ne rosyina. 12Keerei chii ne ng'oom ng'oiyondit ak koung'egei, ago wendi tai che matinyei kiy ak kosich kaalyeet. 13Ip ngoryeetap chii ne kagoyachi toondet kaarorunet; inam koek kaarorunet ye kagoyachi kwony ne po toek. 14Chii age tugul ne beruuri kokwennyi eng' kutit ne oo karon mornet, kigoikyin chubisyet. 15Kwony ne suryet ko uu beek che tiptoi koigeny eng' peetuutap ropta. 16Kirmen ineendet ko uu kirmen koristo, anan konam mwaita eng' eut ne po tai. 17Nootoi karnet karnet, ak nootoi chii chiito age. 18Chii age tugul ne tenden mogoywet koamei logoekyik, ak chii ne riibei mastanyi ko kinyit. 19Ko uu ye borchini beek tai, en nooto ko borchini muguleldo chiito. 20Ma piyang'dos Keeringet ak Kong'emisyet koigeny, ak ma piyang'dos konyegap chii koigeny. a a v20 Sheol ko emetap piik che kagobek; Abaddon ko komostap kong'emisyet — borchinigei icheegei rubeet ne ma ibiyong' koigeny. 21Kererit ko ne po fedha ak karnet ko ne po thahabu, ak kityemei chii eng' kalasunet ne nyooru. 22Agot itui abusat eng' indaret ak kipir, kobooto peek, ma mang'u abusnatennyi eng' ineendet. 23Inai komyee itoondap kechirwoguk, ak inde muguleldang'ung' tuugaguk. 24Amu ma tononi mogornatosyek koigeny, ak ma menyei kuutweet agoi iiryeet age tugul. 25Ye kobata susweek ak kotook susweek che leel ak keyum ingwegap tuloowek, 26Igoonin mesenik ngoroik, ak igoonin ng'oroorek aldaetap mbareet; 27Ak kobiit cheegap ng'oroorek ne nyiit amitwogiguk, ak amitwogigap piigap koong'ung' ak koriip saboondap tiibiiguk.