Kazingkha̱ Thāda Marungkhung
Mungkhangai kala lan ngarum. Thuingaraa ngaleili khamungabing kachungkha lei, makhayā khamunga chi kakhangang singom thāna, kala makhayābingna ngakarthuiakha mibingna khalatta ngathumhaowa. Moreibing thumhai mina okthui masamphangmara, kha hāngphatta mina lukhamashan samphangra, kala shānglak khavai khamakhuna hi mi shimānkhamena da kachungkha shida hānga.
28 1Makhayā mina khipānakha mashurla yāma, kha khangarong mina kazingkha̱ thāda marungkhunga. 2Ngalei akhana thuingaraakha, khamungabing kachungkha ngasāra, kha theishingkakhui kala awor kakā mi akha eina ngalei chi ngasāchinga. 3Kachāma mi akhana khangazanabingli kachipata chi, kashakazā mathā makhavai kazingrot kashā thai. 4Ain horhaibingna makhayā mili sochikata, kha ain mayonabingna athumli rāngra. 5Makaphā kasā mibingna khamashung khangarong bhap matāra, kha ithumwui Avāli phaninga china chi tākam eina bhap tāra. 6Ningsākhangazip alungli kazata kachāma mi china, awui apongli kha̱khamakhei kashānga mili phāmei. 7Ain mayona mi china theishingkakhui kakā naomayarana, kha morkahakbingwui khavāknao china awui avāva̱li maikashi ngasaka. 8Atār kala makhamashung tongkazā eina awui lan mataisanga mina, kachāmali hankaphā miwui vang chi kazipkhui. 9Khipānakha ainli nganā khavai mamayaakha, awui seihā kasāla ningkakachai ngasāra. 10Khamashung mili makaphā shongfali thānvai mina, akhalattawui chomlungli tāzangra, kha shāt makakā mina kaphā otbing samphangra. 11Kashānga mina akhalattawui mikli thangmeina da phaninga, kha theishingkakhui kakā kachāma mina ali theishingkhui. 12Khangarong mina mathānhaiakha, tekhamatei kahakva lei, kha makhayā mina ngakarthuiakha, mibingna khalatta ngathumhaowa. 13Awui moreibing thumhaida mina okthui masamphangmara, kha hāngphatta kala ning ngateida mi china lukhamashan samphangra. 14Atam kachida khayākashi eina okthui mi chi sokhamina, kha awui wuklung makang ngasaka mina china unshimuili tāzangra. 15Kazingkha̱ kakhangang kala yonga singom thāda, kachāma mibingtungli makhayā khamunga chi chikathāna. 16Theishingkakhui makhalei khamunga chi sākashi rekakhareka mina, kha makhamashung tongkazāli yangkakharing mina china awui mirin atam vāfara. 17Ashee khayonkhamāng eina khalaphai mi china kathi eina tangda yāmkazata mi ngasāra; khipānakha ali pangshap masangmiranu. 18Ningsāngazipta kazata china khikha mathāmara, kha otsak makhamashunga chi kashuirak eina kongluira. 19Khipānakha awui luili khavā a china kashakazā kachungkha samphangra, kha makānkhanā kharomkazata mibing chiya chām kachungkha samphangra. 20Ningkatonga mili sokhami kachungkha samphangra, kha shānglak khavai khamakhuna mi china tandi mamila mathuimara. 21Mijang kasā maphāmana, chithālala kashakazā akhawui vang mi akhana khangui ot sāra. 22Urkashe mi akhana lanli kharoma, kala chāmna ali rātāra kaji matheimana. 23Mi akhali hāngmachina a chi, amale eina sotkhamasaoa mi lāngmeida, naolak eina ngahānkhangai chungmeida samphangra. 24Avāva̱wui lah ava̱wui eina leekhuilaga, "Hi morei maningmana" da kahānga a chi sākashimān miwui ngasotnaona. 25Kakharāma mi akhana nganang ngasaka, kha ithumwui Avāli shitkasanga a chi shāngngasakra. 26Khalatta ningli shitkasanga a chi mangkhama̱na, kha thangkhamei eina kazata a chi khikha mathāmara. 27Kachāmabingli khame a china khikha mavātmara, kha athumli amik katim kahai a chi mi kachungkhana ali khonshira. 28Makhayābing ngakarthuiakha, mibingna khalatta ngathumhaowa, kha athum shimānakha, khangarongana shokpemra.
