Mithali 28

28 ¹Waovu hukimbia ingawa hakuna anayewafuatia, bali wenye haki ni jasiri kama simba. ²Nchi inapoasi, huwa na watawala wengi, bali kwa mtu mwenye ufahamu na maarifa, hudumu imara. ³Maskini anayewaonea wanyonge ni kama mvua ya dhoruba isiyoacha chakula. ⁴Wale wanaoiacha sheria huwasifu waovu, bali wale wanaoishika sheria hupambana nao. ⁵Watu waovu hawaifahamu haki, bali wale wanaomtafuta Baba yetu huifahamu kikamilifu. ⁶Afadhali maskini anayeenenda kwa unyofu kuliko tajiri aliyepotoka katika njia zake. ⁷Yeye anayeishika sheria ni mwana mwenye ufahamu, bali rafiki wa walafi humwaibisha baba yake. ⁸Yeye anayeongeza mali yake kwa riba na faida ya udhalimu huikusanya kwa ajili ya yule mwenye ukarimu kwa maskini. ⁹Mtu akikataa kuisikiliza sheria, hata maombi yake ni chukizo. ¹⁰Yeye anayewapotosha wanyofu katika njia mbaya ataanguka katika shimo lake mwenyewe, bali wasio na hatia watarithi mema. ¹¹Tajiri ana hekima machoni pake mwenyewe, bali maskini mwenye ufahamu humwona waziwazi. ¹²Wenye haki washindapo, kuna utukufu mkuu, bali waovu wainukapo, watu hujificha. ¹³Yeye afichaye dhambi zake hatafanikiwa, bali yeye anayeziungama na kuziacha atapata rehema. ¹⁴Amebarikiwa mtu anayedumu katika uchaji siku zote, bali yeye aufanyaye moyo wake mgumu ataanguka katika msiba. ¹⁵Kama simba angurumaye au dubu ashambuliaye ndivyo alivyo mtawala mwovu juu ya watu wanyonge. ¹⁶Mtawala asiye na ufahamu ni mdhalimu katili, bali yeye achukiaye faida ya udhalimu atazidisha siku zake. ¹⁷Mtu anayeelemewa na hatia ya kumwaga damu atakuwa mkimbizi hata kufa; mtu yeyote asimtegemeze. ¹⁸Yeye aenendaye kwa unyofu atalindwa salama, bali yeye aliyepotoka katika njia zake ataanguka ghafla. ¹⁹Yeye alimaye shamba lake atakuwa na mkate tele, bali yeye afuataye mambo matupu atakuwa na umaskini tele. ²⁰Mtu mwaminifu atafurika baraka, bali yeye ahangaikaye kutajirika hataachwa bila adhabu. ²¹Kupendelea nyuso si vyema, lakini kwa kipande cha mkate mtu atatenda uovu. ²²Mtu bahili ahangaika kupata mali naye hajui kuwa umaskini utampata. ²³Yeye anayemkemea mtu hatimaye atapata upendeleo zaidi kuliko yule anayejipendekeza kwa ulimi wake. ²⁴Yeye anayemwibia baba yake au mama yake na kusema, "Si dhambi," ni mwenzi wa yule aharibuye. ²⁵Mtu mwenye tamaa huchochea ugomvi, bali yeye anayemtumaini Baba yetu atatajirishwa. ²⁶Yeye anayeutumaini moyo wake mwenyewe ni mpumbavu, bali yeye aenendaye kwa hekima atalindwa salama. ²⁷Yeye ampaye maskini hatapungukiwa na kitu, bali yeye anayewafumbia macho atapata laana nyingi. ²⁸Waovu wainukapo, watu hujificha, bali waangamiapo, wenye haki hustawi.