Mithali 29 FHB Biblia ya Moyo wa Baba™

29 ¹Yeye ambaye hukaripiwa mara kwa mara lakini akakataa kusikia atavunjika ghafla, wala hatapona. ²Wenye haki wanapostawi, watu hufurahi, lakini waovu watawalapo, watu huugua. ³Mtu apendaye hekima humfurahisha babaye, lakini rafiki wa makahaba hutapanya mali yake. ⁴Kwa haki mfalme huipa nchi uthabiti, lakini yeye aliye na tamaa ya rushwa huiangamiza. ⁵Mtu ambaye humsifusifu jirani yake hutandaza wavu kwa ajili ya miguu yake. ⁶Mtu mwovu hunaswa na dhambi yake mwenyewe, lakini mwenye haki huimba na kufurahi. ⁷Wenye haki hujali haki ya maskini, lakini waovu hawana ufahamu wa jinsi hiyo. ⁸Wenye mzaha huuwasha mji moto, lakini wenye hekima hutuliza hasira. ⁹Mtu mwenye hekima ashindanapo na mpumbavu mahakamani, mpumbavu hukasirika na kudhihaki, wala hakuna amani. ¹⁰Wenye kiu ya damu humchukia mkamilifu na hutafuta kuwaua wanyofu. ¹¹Mpumbavu humwaga hasira yake yote, lakini mtu mwenye hekima huizuia na kujituliza. ¹²Mtawala akisikiliza uongo, maafisa wake wote huwa waovu. ¹³Maskini na mdhalimu wanafanana katika jambo hili: Baba yetu huyapa nuru macho ya wote wawili. ¹⁴Mfalme akiwahukumu maskini kwa unyofu, kiti chake cha enzi kitathibitika milele. ¹⁵Fimbo na neno la karipio hutoa hekima, lakini mtoto aliyeachwa apende avyo humwaibisha mama yake. ¹⁶Waovu wanapostawi, uovu hustawi, lakini wenye haki wataona anguko la waovu. ¹⁷Mrudi mwanao, naye atakupa amani; ataleta furaha moyoni mwako. ¹⁸Pasipo ufunuo, watu huenda holela, lakini heri yeye aishikaye sheria. ¹⁹Mtumishi hawezi kurudiwa kwa maneno peke yake; ijapokuwa anaelewa, hatatii. ²⁰Je, wamwona mtu aliye mwepesi wa maneno yake? Kuna tumaini zaidi kwa mpumbavu kuliko kwake. ²¹Ukimdekeza mtumishi tangu utoto, mwishowe atakuwa kama mrithi. ²²Mtu mwenye hasira huchochea ugomvi, na mtu mkali wa moyo hutenda dhambi nyingi. ²³Kiburi cha mtu humshusha chini, lakini mwenye roho ya unyenyekevu hupata heshima. ²⁴Mshirika wa mwizi ni adui wa nafsi yake mwenyewe; huisikia laana lakini hasemi neno. ^a a v24 'Laana' ni kiapo cha hadharani kinachomtaka kila aliyeshuhudia uhalifu ajitokeze na kutoa ushahidi. ²⁵Kumwogopa mwanadamu huleta mtego, lakini yeyote amtumainiye Baba yetu hulindwa salama. ²⁶Wengi hutafuta upendeleo wa mtawala, lakini haki ya mtu hutoka kwa Baba yetu. ²⁷Mtu dhalimu ni chukizo kwa wenye haki, na mtu mnyofu ni chukizo kwa waovu.