امثال 28

28 ¹شریر بھاگتے ہیں جبکہ کوئی اُن کا پیچھا نہیں کرتا، مگر راستباز شیرِ ببر کی مانند دلیر ہوتے ہیں۔ ²جب کوئی مُلک بغاوت کرتا ہے تو اُس کے حاکم بہت ہوتے ہیں، مگر سمجھ اور علم والے آدمی کے ذریعے وہ قائم رہتا ہے۔ ³وہ غریب آدمی جو بے کسوں پر ظلم کرتا ہے، اُس زوردار بارش کی مانند ہے جو کچھ کھانا باقی نہیں چھوڑتی۔ ⁴جو شریعت کو ترک کرتے ہیں وہ شریروں کی تعریف کرتے ہیں، مگر جو شریعت پر عمل کرتے ہیں وہ اُن سے مقابلہ کرتے ہیں۔ ⁵بدکار لوگ انصاف کو نہیں سمجھتے، مگر جو ہمارے باپ کے طالب ہیں وہ اُسے پوری طرح سمجھتے ہیں۔ ⁶وہ غریب جو راستی میں چلتا ہے اُس دولتمند سے بہتر ہے جو اپنی راہوں میں کج رَو ہے۔ ⁷جو شریعت پر عمل کرتا ہے وہ سمجھدار بیٹا ہے، مگر پیٹو لوگوں کا ساتھی اپنے باپ کو رُسوا کرتا ہے۔ ⁸جو سُود اور ناجائز نفع سے اپنی دولت بڑھاتا ہے، وہ اُس کے لیے جمع کرتا ہے جو غریبوں پر فیاض ہے۔ ⁹اگر کوئی شریعت سُننے سے انکار کرے، تو اُس کی دعا بھی نفرت انگیز ہے۔ ¹⁰جو راستبازوں کو بُری راہ پر گمراہ کرتا ہے وہ خود اپنے ہی گڑھے میں گرے گا، مگر بے عیب اچھی چیزوں کے وارث ہوں گے۔ ¹¹دولتمند آدمی اپنی نظر میں دانا ہے، مگر سمجھدار غریب اُس کی حقیقت کو تاڑ لیتا ہے۔ ¹²جب راستباز فتحیاب ہوتے ہیں تو بڑی شان ہوتی ہے، مگر جب شریر سرفراز ہوتے ہیں تو لوگ چھپ جاتے ہیں۔ ¹³جو اپنے گناہوں کو چھپاتا ہے وہ کامیاب نہ ہوگا، مگر جو اُن کا اقرار کرکے اُنہیں ترک کرتا ہے وہ رحم پائے گا۔ ¹⁴مبارک ہے وہ جو ہمیشہ خوفِ خدا میں رہتا ہے، مگر جو اپنے دل کو سخت کرتا ہے وہ آفت میں گرے گا۔ ¹⁵غرّاتے ہوئے شیرِ ببر یا حملہ آور ریچھ کی مانند ہے وہ شریر حاکم جو بے کس قوم پر مسلط ہو۔ ¹⁶وہ حاکم جو سمجھ سے خالی ہے سخت ظالم ہوتا ہے، مگر جو ناجائز نفع سے نفرت کرتا ہے وہ اپنی عمر دراز کرے گا۔ ¹⁷جو آدمی خونریزی کے جُرم کے بوجھ تلے دبا ہو وہ موت تک بھاگتا پھرے گا؛ کوئی اُس کی حمایت نہ کرے۔ ¹⁸جو راستی میں چلتا ہے وہ محفوظ رکھا جائے گا، مگر جو اپنی راہوں میں کج رَو ہے وہ اچانک گر پڑے گا۔ ¹⁹جو اپنی زمین جوتتا ہے اُس کے پاس روٹی کی فراوانی ہوگی، مگر جو بے کار باتوں کے پیچھے دوڑتا ہے اُس کے پاس غربت کی فراوانی ہوگی۔ ²⁰دیانتدار آدمی برکتوں سے مالا مال ہوگا، مگر جو دولتمند بننے کی جلدی کرتا ہے وہ بے سزا نہ رہے گا۔ ²¹طرفداری کرنا اچھا نہیں، پھر بھی روٹی کے ایک ٹکڑے کے لیے آدمی بُرائی کر بیٹھتا ہے۔ ²²بخیل آدمی دولت کے پیچھے دوڑتا ہے اور نہیں جانتا کہ غربت اُسے آ پکڑے گی۔ ²³جو کسی آدمی کو ملامت کرتا ہے وہ آخرکار اُس سے زیادہ منظورِ نظر ہوگا جو اپنی زبان سے خوشامد کرتا ہے۔ ²⁴جو اپنے باپ یا ماں کو لُوٹتا ہے اور کہتا ہے، ”یہ کوئی گناہ نہیں،“ وہ غارت کرنے والے کا ساتھی ہے۔ ²⁵لالچی آدمی جھگڑا کھڑا کرتا ہے، مگر جو ہمارے باپ پر بھروسا کرتا ہے وہ فیض یاب ہوگا۔ ²⁶جو اپنے ہی دل پر بھروسا کرتا ہے وہ احمق ہے، مگر جو دانائی میں چلتا ہے وہ محفوظ رکھا جائے گا۔ ²⁷جو غریبوں کو دیتا ہے اُسے کسی چیز کی کمی نہ ہوگی، مگر جو اُن سے اپنی آنکھیں پھیر لیتا ہے وہ بہت سی لعنتیں پائے گا۔ ²⁸جب شریر سرفراز ہوتے ہیں تو لوگ چھپ جاتے ہیں، مگر جب وہ ہلاک ہو جاتے ہیں تو راستباز پھلتے پھولتے ہیں۔