ምሳሌ 28

28 ¹ክፉዎች የሚያሳድዳቸው ሳይኖር ይሸሻሉ፤ ጻድቃን ግን እንደ አንበሳ ደፋር ናቸው። ²አገር በምታምፅበት ጊዜ ብዙ ገዦች ይኖሯታል፤ አስተዋይና ዐዋቂ ሰው ሲኖር ግን ጸንታ ትኖራለች። ³ድኻ ሆኖ ችግረኛውን የሚጨቍን ሰው ምግብ የማያስቀር አውዳሚ ዝናብ ይመስላል። ⁴ሕግን የሚተዉ ክፉዎችን ያመሰግናሉ፤ ሕግን የሚጠብቁ ግን ይቃወሟቸዋል። ⁵ክፉ ሰዎች ፍትሕን አያስተውሉም፤ አባታችንን የሚሹ ግን ፈጽመው ያስተውሉታል። ⁶በቅንነት የሚመላለስ ድኻ፣ መንገዱ ጠማማ ከሆነ ባለጠጋ ይሻላል። ⁷ሕግን የሚጠብቅ አስተዋይ ልጅ ነው፤ የሆዳሞች ባልንጀራ ግን አባቱን ያሳፍራል። ⁸ሀብቱን በአራጣና በዐመፃ ትርፍ የሚያበዛ፣ ለድኾች ለሚራራ ሰው ያከማቸዋል። ⁹ማንም ሕግን ለመስማት እምቢ ቢል፣ ጸሎቱ እንኳ አስጸያፊ ነው። ¹⁰ቅኖችን ወደ ክፉ መንገድ የሚያስት፣ እርሱ ራሱ በጕድጓዱ ውስጥ ይወድቃል፤ ነውር የሌለባቸው ግን መልካም ነገርን ይወርሳሉ። ¹¹ባለጠጋ በራሱ ዓይን ጥበበኛ ነው፤ አስተዋይ ድኻ ግን አጥርቶ ያየዋል። ¹²ጻድቃን ሲያሸንፉ ታላቅ ክብር ይሆናል፤ ክፉዎች ሲነሡ ግን ሰዎች ይሸሸጋሉ። ¹³ኀጢአቱን የሚሰውር አይከናወንለትም፤ የሚናዘዝና የሚተዋት ግን ምሕረትን ያገኛል። ¹⁴ሁልጊዜ እግዚአብሔርን የሚፈራ ብፁዕ ነው፤ ልቡን የሚያደነድን ግን ወደ መከራ ይወድቃል። ¹⁵እንደሚያገሣ አንበሳ ወይም እንደሚያጠቃ ድብ፣ በችግረኛ ሕዝብ ላይ የሚገዛ ክፉ ገዥ እንዲሁ ነው። ¹⁶አስተዋይነት የጐደለው ገዥ ጨካኝ አስጨናቂ ነው፤ ዐመፃ ትርፍን የሚጠላ ግን ዕድሜውን ያረዝማል። ¹⁷በደም ባለውለታ የተጫነ ሰው እስከ ሞት ድረስ ሸሽቶ ይኖራል፤ ማንም አይደግፈው። ¹⁸በቅንነት የሚመላለስ ይጠበቃል፤ መንገዱ ጠማማ የሆነ ግን በድንገት ይወድቃል። ¹⁹መሬቱን የሚያርስ እንጀራ ይጠግባል፤ ከንቱ ነገርን የሚከታተል ግን ድኽነት ይጠግባል። ²⁰ታማኝ ሰው በበረከት ይትረፈረፋል፤ ለመክበር የሚቸኩል ግን ሳይቀጣ አይቀርም። ²¹አድልዎ ማድረግ መልካም አይደለም፤ ሰው ስለ አንድ ቍራሽ እንጀራ ግን በደል ያደርጋል። ²²ስስታም ሰው ሀብትን ለማግኘት ይቸኩላል፤ ድኽነት እንደሚደርስበትም አያውቅም። ²³ሰውን የሚገሥጽ በመጨረሻ ይበልጥ ሞገስን ያገኛል፤ በአንደበቱ ከሚያሞካሽ ይልቅ። ²⁴አባቱን ወይም እናቱን ዘርፎ፣ “ኀጢአት አይደለም” የሚል፣ ለሚያጠፋ ሰው ባልንጀራ ነው። ²⁵ስግብግብ ሰው ጠብን ያነሣሣል፤ በአባታችን የሚታመን ግን ይበለጽጋል። ²⁶በራሱ ልብ የሚታመን ሰነፍ ነው፤ በጥበብ የሚመላለስ ግን ይጠበቃል። ²⁷ለድኾች የሚሰጥ ምንም አይጐድልበትም፤ ዓይኑን ከእነርሱ የሚሰውር ግን ብዙ ርግማንን ይቀበላል። ²⁸ክፉዎች ሲነሡ ሰዎች ይሸሸጋሉ፤ ሲጠፉ ግን ጻድቃን ይበራከታሉ።