Losha bi Thepu Shude
Keku mu mhangu zü. Cejü midokhrilü ba lize nyepo mha kekro bayo; mha küdimi kemezhe zü mha mesakemo dzü seyi kemo khrade bi zo; mhakesu kethimiko thosü lize thümako khava voto. Thüma kehopüri pü küjoko khrüh pü pra meve kemo, vele phra de süo cholü ta mi mezhe ngoyi to; mu za rügo lano phuta süoe thüma retu süyo zisü sala sala za tsüzo.
28 1Mipüri phuyi kemola lize, mesakemo miko tazo tayo, vele kemeziko losha bi thepu shude bazo. 2Cejü midokhrilü ba lize, nyepo mha kekro bayo, vele mhapüri se mu mhase küba thüma lize, pü kethozo de bayo. 3Küzaküze thümako kemezhe zü mha küdimi, dzü seyi kemo türü khrade bi bazo. 4Mhathezhü seyi miko mesakemo miko müza yo, vele mhathezhü khrühi miko uko zü kelakre tayo. 5Mesakemo miko jütho mhapüri semo, vele ha Po phuta miko süo metülü mhapüri seyo. 6Kerethi de chota mha küdimi, pü chokolü kemezi kemo künemi la veyo. 7Thüma kehopüri mhathezhü khrühi pü mhapüri se nu zo, vele mha kemetsü kenyümi züketako pü upo züra süyo. 8Thüma kehopüri pra mu kemezi kemo mizü celü pü nyoko prü sa pü, mha küdimi la cene küba mi tsü süo ngoyi süyo. 9Thüma kehopüri mhathezhü reni mute lize, pü prayi sheri ngo keretsü zo. 10Thüma kehopüri jütho miko mesakemo cholü tüzü süyo pü, pü tükhülülü retu tayo, vele mejokühomie mha keveko thiyi to. 11Künemi pü ngolü mha küse pürü süyo, vele mhapüri se mha küdimi süo metülü ketso ngoyo. 12Kemeziko kuküyi lize, zapozale ketsü bayo, vele mesakemo miko thosü lize, thümako khava vo tayo. 13Thüma kehopüri pü küjoko khrüh pü pra meve kemo, vele phra de süo cholü ta mi mezhe ngoyi to. 14Metükolü revü tülü küba mi zhürhü ngoyi mi zo, vele pü melü lü thi merü mi meza lü retu tayo. 15Losha kerü mori sathü khrü vori bi, küza kemo thümako lü mesakemo nyepo bazo. 16Mhapüri se kemo nyepo küdü de kemezhe zü mi zo, vele kemezi kemo mizü ngo metsü mi pü tso kemetü yi to. 17Thüma humi thüzü khava kejo kemezhe zü mi kesa ketso tazo vayo to; mipüri pü kedü tahite. 18Thüma kehopüri kerethi de chota mi krü ba to, vele pü chokolü kemezi kemo mi shoshi retu tayo. 19Thüma kehopüri pü cejü lüva mi dzü kekro ngoyi, vele thinyi dzürü pünü mi tsakhu kekro ngoyi. 20Kethozo mi zhürhü phayi to, vele künemi thiyi rushüh mi pü meka vato. 21Rho mekre thi mha keve kemo zo, eli dzü tipü sheri thümae kemezi kemo thi to. 22Mha kümüho thüma nyoko rushüh, mu tsakhu püce vori to zita pü semo. 23Thüma tarho mi püthülaze nü kekro ngoyi to, meyi jüpo kerha mi la veyo. 24Thüma kehopüri upo uzu rügo de poti, “Küjo kemo zo,” zita, pü mha thi merho mi züketako zo. 25Mha kemeho mi lüda mhakebü süyo, vele ha Po melü mi mene süto. 26Thüma kehopüri pü lüdo mülü mi kümülo zo, vele mha küse de chota mi krü ba to. 27Thüma kehopüri mha ketsakhumi unüyo pü nothi ba mozo, vele thüma kehopüri ukoce püngo khayo pü rüshu kekro ngoyito. 28Mesakemoko tosü lize, thümako müka vato, vele puko meka lize, kemeziko prameve yito.
