Molosaonyu tegü maangkaangbü
Sei hoba nam shangabü. Rebeka longbü kaodaka songdakbü juong ki, amaibü saopobü müt kho shijung loubü meisiau che tegü ki, hoba amaibü shuong loanga müt shuong himouda. Jembü shabü himoukubü kho maitila athükkei, lausikei kho thekuko lenbü shuongei üeisanou hapda, hoba nam yantila sepeibü kho müt mautibü dogo ladangkei lenbü ki.
28 1Amaibü shuong aoeikei shijung aloujinei satda, lausikei saopobü shuong molosaonyu tegü maangkaangbü ki. 2Kaodak che rebeka longa, songdakbü juong ki, lausikei ditenbü hoba hapbüngebü müt yoa, kho kaangkhühtham kilabü. 3Shalebü müt aoei shalebü shuong to shieikoeda kho, shausiyung ajouletbü lang kaangbü tegü ki. 4Ngühkhüm nangletbü shuongei amaibü shuong to nyensang kuda, lausikei ngühkhüm jungeibü shuongei haoen khulimbo oyoda. 5Amaibü shuongei matjem aditen, lausikei seneibü Bou lambü shuongei kho pendou ditenlabü. 6Ngühmai maangponei paibü shalebü müt kho, jembü lamnyua kombünongbü keibü müt toje maibou. 7Aoei ngühkhüm jungeida kho, hao ditenbü shou ki, lausikei shaula kaangbü shuongeibü jenabou jembü bou to shamtikuda. 8Aoei phopnam hoba ngühmai akibü peisileiei jembü nyaksinam haatikuda kho, shalebü to onou lenbü müt shanga kho kamtikuda. 9Aoei ngühkhüm ditla lothedalonga, jembü welaubü ongkei mangsenlabü ki. 10Aoei maang tangbü shuong to amaibü lama shoongaitikuda kho, hao lolo jembü püngkhün khüto aalabü, lausikei tükdebü shuongei maibü phet phanlabü. 11Keibü müt kho jembü nyeka songsido kibü ki, lausikei ditenbü shalebü mütei hao to tang khittida. 12Saopobü shuong thükenlonga, aeibou soneikangbü kilabü, lausikei amaibü shuong angtilonga, müt shuong hulabü. 13Aoei jembü shabü hula kho, anaangmaitilabü, lausikei aoei thelean khübü ka ngaida kho, onou haplabü. 14Aoei ponpendou hatko kida kho haübou, lausikei aoei jembü maangpon kaangan apda kho, khonsak ka aalabü. 15Ngühbü molosaonyu ayingsi phangbü sap tegü, shalebü mütli thüka amaibü songdakbou kho ki. 16Ditenbü akibü songdakbou kho kaangbü shieikoebü ki, lausikei aoei ngühmai akibü peisilei to mangsenda kho, jembü langkei langtilabü. 17Sii angbü shed hangshong atshaibü müt kho, hao haibü sühko satbümaubü müt yeilabü; aoeikei hao to tethuikai. 18Aoei ngühmai maangponei paida kho, khümenlabü, lausikei aoei jembü lamnyua kombünongbü ki kho, mangde ong tuonglabü. 19Aoei jembü kao moulaje, ikkhong souko haplabü, lausikei aoei amlangbü peisilei shijung hauda kho, shalebü souko haplabü. 20Maang lembü müt kho, haülabü aeibou haplabü, lausikei aoei keibü yeila halida kho, ayuktiko aphokulabü. 21Müt theto chühbü kho maikei aying, lausikei ikkhong tetche shanga müt cheei shedbü kümlabü. 22Ailamaiphop lambü müt kho, nyaksinam shijung hauda, hoba shalebü hao lamenlabü dogo ange. 23Aoei müt che to ühakda kho, phaia jembü lishangei küpsibou toje aei olinbü haplabü. 24Aoei jembü bou ayingsi nyu la soletda hoba lauda, “Ho shabü aying,” kho amautibü müt la jenabou ki. 25Aeibou ailamaiphop lambü müt kho, oyophetyobü shouentida, lausikei aoei seneibü Bou to maanglemda kho, keibü yeitilabü. 26Aoei jembü maangpon to maanglemda kho, ngoubü ki, lausikei aoei songsihona paida kho, khümenlabü. 27Aoei shalebü la kulaje aieikei sha alelabü, lausikei aoei haoen to jembü aao khinlaje shedsikhau juong haplabü. 28Ladang amaibü shuong loenlaje, müt shuong hulabü, lausikei ladang haoen maulaje, saopobü shuong pungtilabü.
