Mangsang Akishanga
Saopobü shuong, khauang hoba shousi shangabü. Saopobü shuong pungalonga eikshuong olinda, hoba amaibü shuong songdaklonga haoen ngühyoda. Ngoubüei jembü khauang pendou thonkuda, hoba sang yongbü müt kho ngoubü tokei liman amaibou ki. Thuseibü ngüh aki chaloua, müt shuong khulimbo ngaida.
29 1Aoei ladüngnei dangakei ngüha alelaje, hao maitila athük lele mangde leilulabü. 2Saopobü shuong pungalonga, eikshuong olinda, lausikei amaibü shuongei songdakla, eikshuong ngühyoda. 3Songsihon sanoubü mütei jembü bou to olintida, lausikei asangalanbü sao shuong jenabou jembü nyaksinam apsileda. 4Ngühmaiei Chobaei kaodak to kaangkhühtham kuda, lausikei besa anyembü mütei kho lululabü. 5Jembü lepbou to the shangabü ngüh laubü mütei jembü you shanga tak tekda. 6Amaibü mütei jembü shabüei sung ka kailepa, lausikei saopobü shuongei chia lauko olinda. 7Saopobü shuongei shalebü shuongeibü ngühmai damanchühda, lausikei amaibü shuongei kho tegü ditenbü ange. 8Mü awealaubü shuongei sangnyu to wan angtida, lausikei songsido kibü shuongei khauangbü nangda. 9Songsido kibü mütei ngoubü yoa matjema youalonga, ngoubü khauang hoba mü aweda, hoba sangmai aki. 10Sii lamla yembü shuongei mubü to mangsenda, hoba maang tangbü to haitila lamda. 11Ngoubü jembü khauang pendou longtida, lausikei songsido kibü mütei kho nangan hao lolo müngan apda. 12Songdakbou cheei amlangbü ngüh to didalonga, jembü khangenbü shuong pendou amaibü la yeilabü. 13Shalebü müt hoba khonkutibü müt, haosi ham che ong ki: seneibü Bouei haosi ham nyek to ngesakbü kuda. 14Chobaei shalebü shuong to ngühmaiei matjemalonga, jembü Choba setshang ponpen thon akiko yaülabü. 15Juei hoba tangtikubü ngühei songsihon kuda, lausikei hao mütpem apbü nashou jembü nyu to himouko phokuda. 16Amaibü shuong pungalonga, shabü tokei pungda, lausikei saopobü shuongei amaibü shuongeibü tuongbü haplabü. 17Kaibü shou to shieikoeashi, hoba haoei ka la sangmai kulabü; haoei kaibü maangpon to olinbü kulabü. 18Mangsang akishanga, mütli ohouko kida, lausikei ngühkhüm jungeibü müt kho olinbou. 19Khangenbou kho ngühei ong dangla athük; hao ditenkei, lausikei haoei ngüha alelabü. 20Jembü ngüha mangde laubü müt to nyi hapda lo? Hao to gü ngoubü shanga maanglembü aeibou kia. 21Khangenbou to chilang ka jaüan thounoualonga, kho thon ka hao phetphanbou tegü yeilabü. 22Khauangbü mütei oyophetyobü shouentida, hoba aei khauangbü mütei shabü juong shontida. 23Müteibü lilibüei hao yantida, lausikei eaaoabü soushouei nyenhang pailetda. 24Kokbou yoa homanbou kho jembü lolo dangbou ki; haoei khükbü ngüh ditjinei ai alauda. a a v24 ‘Khükbü’ kho mütli thedanga theletbü che ki, aoei amaibü kümbü to hapbei, haoei longan aukhün louakla lele sakkuda. 25Müt to hatbüei sung che sankuda, lausikei aoei seneibü Bou to maanglemlaje hao khümenan kilabü. 26Juongei songdakbou maangshikbü lamda, lausikei müteibü ngühmai kho seneibü Bou ka louda. 27Asaopobü müt kho saopobü shuong shanga shalabü, hoba maang tangbü müt kho amaibü shuong shanga shalabü.
