Inda Babu Wahayi

Game da masu mulki, fushi da yara. Sa'ad da masu adalci suka bunƙasa jama'a sukan yi farin ciki, sa'ad da mugaye suke mulki kuwa sukan yi nishi. Wawa yakan zubar da dukan fushinsa, mai gaggawar magana kuma ya fi wawa muni. Inda babu wahayi, mutane sukan zama marasa kamewa.

Babi na 29.

Wanda ake yawan gyara shi amma ya ƙi saurara, zai farsu farat ɗaya ba tare da waraka ba. Sa'ad da masu adalci suke ci gaba, mutane sukan yi farin ciki, amma sa'ad da mugaye suke mulki, mutane sukan yi nishi. Mutumin da yake ƙaunar hikima yakan faranta wa mahaifinsa rai, amma abokin karuwai yakan ɓata dukiyarsa. Ta wurin adalci sarki yakan ba ƙasa zaman lafiya, amma mai haɗamar cin hanci yakan rushe ta. Mutumin da yake wa maƙwabcinsa daɗin baki yana shimfiɗa taru domin ƙafafunsa. Zunubin mugun mutum yakan zama masa tarko, amma mai adalci yakan rera waƙa da farin ciki. Mai adalci yana kula da yin adalci ga matalauta, amma mugu ba shi da irin wannan fahimta. Masu ba'a sukan sa birni yă ƙuna, amma masu hikima sukan kwantar da fushi. Sa'ad da mai hikima ya shiga shari'a da wawa, wawa yakan yi fushi yă yi ba'a, babu kuwa salama. Masu kisankai suna ƙin marar laifi, suna kuma neman su kashe adali. Wawa yakan fitar da dukkan fushinsa, amma mai hikima yakan kame shi yă natsu. Idan mai mulki yana sauraron ƙarairayi, dukkan shugabanninsa sukan zama mugaye. Matalauci da mai danniya suna da abu guda: Ubanmu ne yake ba da gani ga idanun dukansu. Idan sarki yana yi wa matalauta shari'a da gaskiya, kursiyinsa zai tabbata har abada. Sanda da kalmar tsautawa suna ba da hikima, amma yaron da aka bari shi kaɗai yakan kunyata mahaifiyarsa. Sa'ad da mugaye suke ci gaba, mugunta tana ƙaruwa, amma masu adalci za su ga faɗuwar mugaye. Ka hori ɗanka, zai kuwa ba ka salama; zai faranta maka zuciya. Inda babu wahayi, mutane sukan watsar da ƙa'ida, amma mai albarka shi ne wanda yake kiyaye shari'a. Ba a iya gyara bawa da magana kaɗai ba; ko da ya fahimta, ba zai yi biyayya ba. Ka ga mutumin da yake garaje da maganarsa? Akwai bege ga wawa fiye da shi. In ka yi wa bawa shagwaɓa tun yarinta, a ƙarshe zai zama kamar magaji. Mai fushi yakan tā da faɗa, mai zafin rai kuwa yakan aikata zunubai masu yawa. Girman kan mutum yakan ƙasƙantar da shi, amma mai tawali'u yakan sami girma. Abokin ɓarawo maƙiyin kansa ne; yana jin la'ana amma ba ya cewa kome. ^a Tsoron mutum yakan sa tarko, amma duk wanda ya dogara ga Ubanmu za a kiyaye shi lafiya. Mutane da yawa suna neman farin jinin mai mulki, amma adalci ga mutum daga wurin Ubanmu yake. Marar adalci abin ƙyama ne ga masu adalci, adali kuwa abin ƙyama ne ga mugaye.