Phongshokmi Makhalei Pamli
Khamungabing, malungkhavāt kala naongarabingwui maramli. Khangarongana phora tharan mibingna ringphai, kala makhayābingna munga tharan mibingna ngahuiya. Mangkhama̱na awui malungkhavāt saikora phongshoka, kala tui teikakatā mi chi mangkhama̱ vanga kachihān kachangmei. Phongkhami maleipamli mibingna khalattawui ningli sāda kazata.
29 1Ra̱ra̱ hāngkhamachin khuilala nganā ngareithui a china, kashuirak eina kaikazamhaora, kala raikhavai maleimana. 2Khangarongana phora tharan, mibingna ringphai, kha makaphā makhayābingna munga tharan, mibingna ngahuiya. 3Thangkhamei leikashe mi china avāva̱li ringphā ngasaka, kha khayorva̱bingwui khavāknao a china awui lan shaipama. 4Mashun eina awungana ngaleili sakā ngasaka, kha pheisā kasāwui vang khangamar a china chi shimān ngasaka. 5Khongnainaoli sotkhamasao mi china awui pheili khalen sanga. 6Makaphā mi chi awui khalattawui moreina tukkhui ngasaka, kha khamashungana laa sāda ringphai. 7Khamashungana kachāma miwui mashunli ningsanga, kha makaphaana chikathā theishingkakhui maleimana. 8Mashātkazarbingna keinung chi meili chui ngasaka, kha thangkhamabingna malungkhavāt chingrihai ngasaka. 9Thangkhama mina mangkhama̱ mili kārotli khuivā tharan, mangkhama̱ china malungvāta kala mana̱shi, kala chingri kahai maleimana. 10Ashee ra̱kachangabingna shāt makakā mili yangkakharinga, kala wuklung khangatarbingli shaothat khavai phai. 11Mangkhama̱na awui malungkhavāt saikora phongshoka, kha thangkhama mina chi kathumda malungkhanim eina lei. 12Khamungana kakapik tui khuiakha, awui wungnaobing saikora makaphā ngasāra. 13Kachāma mi kala rekakhareka mi hi ngaraichāda lei: ithumwui Avāna anini khaniniwui mikli kahor mi. 14Awungana kachāma mili mashun eina bichar sāakha, awui wungpamkhong katang makhavai eina sakāra. 15Lijei kala hāngkhamachin tuina thangmei ngasaka, kha akhalatta horhaida nao china ava̱va̱li maishi ngasaka. 16Makaphā makhayābing mataisang tharan, morei mataisanga, kha khamashungana makaphābingwui konglui theira. 17Nawui naoli hāngmachinlu, chieina ana nali chingri kahai mira; ana naningli khamathān mira. 18Phongkhami maleipamli, mibingna khalattawui ningli sāda kazata, kha ain khamayona chi sokhamina. 19Rao china tui eina mangmāng machin ngasak masārarmana; ana theishingkakhuila, kahāng manganāmara. 20Khalattawui tuili teikakatā mi nana katheila? Chikathā miwui vanga mangkhama̱li kachihān kachangmei leira. 21Raoli nganuilakhawui eina leishida phungmiakha, awui athitlam ana shimluikatpa thāhaora. 22Malung thuikazar mina nganang ngasaka, kala malung vātkazar mina morei kachungkha sāra. 23Miwui langkasona ali maishi ngasaka, kha malung khanima chi khayākakā samphanga. 24Khalewui ngasotnao china khalattawui yangkashena; ana khonkashi shālala, khikha matuimara. a a v24 'Khonkashi' hi mi saikorawui miktāli sākahai tuingashit akhana, khayon theikahai khipānakha rāda shākhi khami khavai kasohaina. 25Miwui khangachee china khalen sanga, kha ithumwui Avāli shitkasanga mi chi kanshokmira. 26Kachungkhana khamungawui ngahānkhangai phai, kha mi akhawui mashun chi ithumwui Avāwui eina rāra. 27Makhangaronga mi chi khangarong mili ningkakachaina, kala khangatara mi chi makhayā mili ningkakachaina.
