Baabi a Adiyisɛm Nni
Ɛfa sodifo, abufuw ne mmofra ho. Sɛ atreneefo yiye a, ɔman no ani gye, na sɛ abɔnefo di tumi a, wɔsi apini. Ɔkwasea pae n'abufuw nyinaa gu, na ɔkwasea mpo ye sen nea ɔpere ne ho kasa. Baabi a adiyisɛm nni no, nnipa yɛ basabasa.
29 1Obiara a wɔtaa teɛ no nanso ɔpow sɛ ɔbɛtie no, wɔbɛbubu no mpofirim a ɔrennya ayaresa. 2Sɛ atreneefo nya nkɔso a, nnipa no di ahurusi, nanso sɛ amumɔyɛfo di tumi a, nnipa no si apini. 3Ɔbarima a ɔdɔ nyansa no ma nʼagya ani gye, nanso nea ɔne nguamanfo bɔ no sɛe nʼahonyade. 4Ɔhene de atɛntrenee ma ɔman gyina pintinn, nanso nea ɔpere kɛtɛasehyɛ akyi no bubu no. 5Ɔbarima a ɔka nsɛm dɛdɛ kyerɛ ne yɔnko no trɛw asau sum ne nan. 6Ɔbɔnefo ankasa bɔne yi no afiri, nanso atreneefo to dwom di ahurusi. 7Atreneefo dwen ahiafo atɛntrenee ho, nanso amumɔyɛfo nni saa ntease no. 8Fɛwdifo hyɛ kurow ma ɛdɛw, nanso anyansafo dwodwo abufuw no. 9Sɛ onyansafo ne ɔkwasea kɔ asennii a, ɔkwasea no bo fuw, di fɛw, na asomdwoe nni hɔ. 10Mogyapɛfo tan wɔn a wɔn ho nni asɛm, na wɔpɛ sɛ wɔkum wɔn a wɔteɛ. 11Ɔkwasea da ne bo fuw nyinaa adi, nanso onyansafo si ano, na ɔma ne ho dwo. 12Sɛ sodifo tie atosɛm a, ne mpanyimfo nyinaa dan amumɔyɛfo. 13Ohiani ne ɔhyɛsofo wɔ biribi a ɛyɛ pɛ: yɛn Agya ma wɔn baanu nyinaa aniwa hu ade. 14Sɛ ɔhene de pɛpɛyɛ bu ahiafo atɛn a, nʼahennwa bɛtim daa. 15Abaa ne nteɛso asɛm ma nyansa, nanso abofra a wɔagyaw no ma ɔyɛ nea ɔpɛ no de aniwu ba ne na so. 16Sɛ amumɔyɛfo nya nkɔso a, bɔne nya nkɔso, nanso atreneefo bɛhu amumɔyɛfo asehwe. 17Teɛ wo ba, na ɔbɛma wo asomdwoe; ɔbɛma wo koma ani agye. 18Baabi a adiyisɛm nni no, nnipa no yɛ basabasa, nanso nea odi mmara no so no nya nhyira. 19Wɔrentumi mfa nsɛm nko ara nteɛ akoa; sɛ ɔte ase mpo a, ɔrentie. 20Wohu ɔbarima a ɔpere ne ho kasa? Anidaso wɔ ɔkwasea ho sen ɔno. 21Fa ayamye pa ara tete akoa fi ne mmofraase, na awiei no ɔbɛyɛ sɛ agyapadedifo. 22Ɔbarima a ne bo afuw kanyan ntawntawdi, na ɔbarima a ne bo hyew ntɛm yɛ bɔne pii. 23Onipa ahantan brɛ no ase, nanso honhom a ɛbrɛ ne ho ase nya anuonyam. 24Nea ɔne ɔkorɔmfo bɔ no yɛ ne ho ɔtamfo; ɔte nnome no, nanso ɔnka hwee. a a v24 “Nnome” no yɛ ntam a wɔka wɔ baguam, na ɛhyɛ obiara a ohuu bɔne no sɛ ɔmmra mmedi adanse. 25Onipa ho suro sum afiri, nanso obiara a ɔde ne ho to yɛn Agya so no nya ahobammɔ. 26Nnipa pii hwehwɛ sodifo anim dom, nanso yɛn Agya nkyɛn na onipa atɛntrenee fi. 27Ɔbarima a ɔnteɛ yɛ akyiwade ma atreneefo, na onipa a ɔteɛ yɛ akyiwade ma amumɔyɛfo.
