ምሳሌ 29 FHB Father's Heart Bible™

29 ¹ብዙሕ ጊዜ እናተገስፀ ኽሰምዕ ዘይደሊ ሰብ፥ ብድንገት ፈውሲ ብዘይብሉ ኽስበር እዩ። ²ፃድቃን ምስ ዝዕምብቡ፥ ህዝቢ ይሕጐስ፤ ሓጢኣተኛታት ምስ ዝገዝኡ ግና፥ ህዝቢ ይግዕር። ³ጥበብ ዘፍቅር ሰብ፥ ንኣቦኡ የሐጕሶ፤ ብፃይ ኣመንዝራታት ግና፥ ሃብቱ ይብትን። ⁴ንጉስ ብፍርዲ ንሃገር የፅንዓ፤ ጉቦ ዝደሊ ሰብ ግና የፍርሳ። ⁵ንብፃዩ ዘሞጕስ ሰብ፥ ንኣእጋሩ መርበብ ይዝርግሓሉ። ⁶ክፉእ ሰብ ብገዛእ ሓጢኣቱ ይፍንጠር፤ ፃድቕ ግና ይዝምር፥ ይሕጐስ ድማ። ⁷ፃድቕ ንፍርዲ ድኻ ይግደሰሉ፤ ሓጢኣተኛ ግና ከምዙይ ዝበለ ምስትውዓል የብሉን። ⁸መላገፅቲ ንኸተማ የንድድዋ፤ ጠቢባን ግና ንቝጥዓ የህድኡ። ⁹ጥበበኛ ሰብ ምስ ዓሻ ናብ ፍርዲ ምስ ዝኸይድ፥ እቲ ዓሻ ይቝጥዕን የላግፅን፤ ሰላምውን የለን። ¹⁰ደመኛታት ንፍፁም ይፀልኡ፤ ንቅኑዕ ከዓ ኽቐትልዎ ይደልዩ። ¹¹ዓሻ ኵሉ ቝጥዓኡ የውፅእ፤ ጥበበኛ ግና ይገትኦ፥ ንርእሱ የህድእ። ¹²ገዛኢ ንሓሶት እንተ ሰሚዑ፥ ኵሎም ሹማምቱ ክፉኣት ይኾኑ። ¹³ድኻን ገፋዒን ሓደ ዝሓብሮም ነገር ኣለዎም፦ ኣቦና ንኣዒንቲ ክልቲኦም የብርሃለን። ¹⁴ንጉስ ንድኻ ብቕንዕና እንተ ፈረደ፥ ዙፋኑ ንዘለኣለም ፅኑዕ ይኸውን። ¹⁵በትሪ ምስ ቃል ተግሳፅ ጥበብ ይህብ፤ ንርእሱ ዝተገደፈ ውሉድ ግና፥ ንእኖኡ የሕፍራ። ¹⁶ሓጢኣተኛታት ምስ ዝዕምብቡ፥ ዓመፅ ይዕምብብ፤ ፃድቃን ግና፥ ውድቀት እቶም ሓጢኣተኛታት ክርእዩ እዮም። ¹⁷ንወድኻ ገስፆ፥ ንሱ ኸዓ ሰላም ክህበካ እዩ፤ ንልብኻውን ደስ ከብሎ እዩ። ¹⁸ራእይ ኣብ ዘይብሉ፥ ህዝቢ ይዘባረቕ፤ ሕጊ ዝሕሉ ግና፥ ብፁእ እዩ። ¹⁹ባርያ ብቓል ጥራሕ ኣይግሰፅን፤ እንተ ኣስተውዓለ እኳ፥ ኣይእዘዝን እዩ። ²⁰ብዘረባኡ ዝሃውኽ ሰብ ትርኢ ዲኻ? ካብኡ ንዓሻ ዝበለፀ ተስፋ ኣሎ። ²¹ባርያ ኻብ ንእስነቱ ጀሚርካ ብቕብጠት እንተ ኣዕበኻዮ፥ ኣብ መወዳእታ ኸም ወራሲ ክኸውን እዩ። ²²ዝቝጣዕ ሰብ ባእሲ የለዓዕል፤ ሕንቁቕ ሰብ ከዓ ብዙሕ ሓጢኣት ይገብር። ²³ትዕቢት ሰብ የዋርዶ፤ ትሑት መንፈስ ግና፥ ክብሪ የጥሪ። ²⁴መሻርኽቲ ሰራቒ፥ ንገዛእ ነፍሱ ፀላኢ እዩ፤ መርገም ይሰምዕ፥ ገለ ግና ኣይዛረብን። ^a a v24 እቲ ‘መርገም’ ነቲ ገበን ዝረኣየ ዝኾነ ሰብ ቀሪቡ ክምስክር ዝግድድ ህዝባዊ መሐላ እዩ። ²⁵ፍርሓት ሰብ መፈንጠር የንብር፤ ኣብ ኣቦና ዝተኣማመን ግና፥ ብሰላም ይነብር። ²⁶ብዙሓት ሞገስ ገዛኢ ይደልዩ፤ ፍርዲ ሰብ ግና፥ ካብ ኣቦና እዩ ዝመፅእ። ²⁷ዓማፃይ ሰብ ኣብ ቅድሚ ፃድቃን ርኹስ እዩ፤ ቅኑዕ ሰብ ከዓ፥ ኣብ ቅድሚ ሓጢኣተኛታት ርኹስ እዩ።