Ye Ma Mi Ng'ang'utyet
Agobo laitorinik, ng'etunet ak lagok. Ye tuneni piik che po imanda koboiboitu piik, ago ye pou kiptengeginik kotigendos piik. Istoi chiito ne abusat angeennyi tugul, ago ne ng'alaali eng' katerteeret ko ya kosiir chiito ne abusat. Ye ma mi ng'ang'utyet, kolabana piik.
29 1Age tugul ne kipolji kila ago koeesyo kogas, kobut eng' yooto ago ma mi chametapkei. 2Ye tuneni piik che po imanda, koboiboitu piik, ago ye pou kiptengeginik, kotigendos piik. 3Muren ne chamei utaatyet koboiboisyei kwandanyi, ago chorweetap chepkugonik koam tuguukyik. 4Eng' kirwooget kogimit laitoryat emet, ago chiito ne machei asoya kong'emi. 5Muren ne iboiboisyei chiitap kokwennyi eng' ng'aleek koyaei mesteet eng' keelyekyik. 6Egu tengektap chiito ne ya mesteet agobo ineendet, ago tyeni ak koboiboitu piik che po imanda. 7Ngen piik che po imanda kirwoogetap poorto, ago matinyei kiptengeginik kaguiyet nooto. 8Ilaalji chotiik nganaseet, ago koibanye piik che utaatiin angeet. 9Ye kwo chiito ne utaat kirwooget ak chiito ne abusat, konereech ak chotei abusanani, ago ma mi kaalyeet. 10Wechei piik che mache korotiik chiito ne ititaat, ago cheeng'ei saboondap che po imanda. 11Istoi angeennyi tugul chiito ne abusat, ago isiisei chiito ne utaat ak koibanyegei. 12Ngo kogas pounindet ng'aleek che ma po imanda, koegu otwogikyik tugul kiptengeginik. 13Tuiyoni pooryeet ak chiito ne nyeroni piik eng' kiit age: koonu Kwandanyo lapkeiyet konyegap icheek aeng'. 14Ngo irwookyin laitoryat poorto eng' iman, kogimit ng'echerennyi koigeny. 15Koonu kirokto ak katigonet utaatyet, ago lakweet ne kipagakta ineegei korong kamennyi. 16Ye tuneni kiptengeginik, kotesak yaityet, ago keerei piik che po imanda putuletap kiptengeginik. 17Tigoon weeriing'ung', ak koonin kaalyeet; ak koboiboisyei muguleldang'ung'. 18Ye ma mi ng'ang'utyet, kolegetei piik saang', ago paibai chiito ne riibei ng'atuutik. 19Ma kipolji otwogindet eng' ng'aleek kityo; agot ngo tinyei kaguiyet, ma kas iit. 20Tos igeeri chiito ne kaataam eng' ng'aleekyik? Mi mang'unet ne oo agobo chiito ne abusat kosiir ineendet. 21Ngo iriip komyee otwogindet kobunu chileiywotap, koegu eng' let ko uu namindet. 22Ing'eeti chiito ne nereech pooryeet, ak koyaei chiito ne pichiien angeet tengekwogik che chaang'. 23Iming'ini menatetap chiito ineendet, ago nyooru chiito ne iming'inegei toroornatet. 24Chorweetap choorindet ko puunyoonnyi ineegei; kogas chubisyet ago ma mwa kiy. a a v24 'Chubisyet' ko kaarortaet ne po piik tugul, ne nyolu kobiit chiito age tugul ne kigeer yaityet, kong'eet taai ak kopaoryan. 25Egu iywenetap chiito mesteet, ago age tugul ne iyani Kwandanyo ko riiboot. 26Cheeng'ei piik che chaang' taitap laitoryat, ago punu eng' Kwandanyo kirwooget ne po chiito. 27Wechei piik che po imanda chiito ne ma po imanda, ak wechei kiptengeginik chiito ne iman.