Chānsam 30

30 ¹Jakehwui naomayara Agurwui tui—khamarān. Mipā china hānga: Iya chothaira, O iwui Avā; iya chothaira, O iwui Avā, kala ngachāng chathaira. ²Kachangkhatta iya sāyur thāda, mi ngasā mashālakmana; miwui theishingkakhui iwuili maleimana. ³Ina thangkhamei matamkhuimana, kala Kathara chiwui theikakhui iwuili maleimana. ⁴Kazingramli kaida katā chi khipākhala? Masili awui pāng alungli kazipkhui chi khipākhala? Tara̱li kachon akha eina khaluihai chi khipākhala? Okathui vākatang saikorali sākahai chi khipākhala? Awui ming khikhala, kala anaomayarawui ming khikhala? Kachangkhatta na thei! ^a a v4 Agurna saikora hi khipāna sāhaina, kala anaomayarawui ming khikhala da ngahāna. Jishuna hi ngahānkai: "Kazingramwui eina katā miwui Naomayara chi maningla khipākha kazingram kākahai maleimana" (John 3:13). Avāli Naomayara akha leisai. ⁵Ithumwui Avāwui tui saikora mashunga da chitheimi; ana ali khangayina saikorawui chāngveina. ⁶Awui tuili mataisangalu; nana taisangakha ana nali kaharra, kala na kapika da chitheira. ⁷Ot khani ina nawui eina poa; I mathiranglakha eina, iwui eina makhuithuimihaialu: ⁸Mikhanam kala kapik tui iwui eina katāva̱li haimilu; ili kachāmala, kashāngla makhamimihaialu; iwui yar kasā kashakazā maningla ili khamilu, ⁹kaja I pemtaiakha, ina nali makhuisangla "Vare khipākhala?" da hāngra, lah I kachāma ngasaakha, ina leera kala iwui Varewui mingli makathara sāhaira. ¹⁰Raoli awui akhavāwui mangāli mamashātalu; nana mashātakha ana nali khonshira, kala na yona da samphangra. ¹¹Awui avāva̱li khonshi, kala awui ava̱li masomi thot akha lei. ¹²Akhalattawui mikli kathara, kha awui khamakhao masāmathāmimana kaji thot akha lei. ¹³Thot akha lei—amik kayākha lāngkasokhala, awui mikyan kayākha mana̱shikhala! ¹⁴Okathuiwui eina kachāmabingli, miwui alungwui eina khavātabingli tukshai khavai, ahā raighai, kala hāra ghainao kakā thot akha lei. ¹⁵Ashee zima khavai sāyurwui naongalāva̱ khani lei: "Khamilu" kala "Khamilu." Ot kathumna katang ningyāng maungmana; mati chi katang "Shapa" da mahāngmana: ¹⁶Kazeiram, naopam kashumva̱, tara̱na katang ningyāng maung ngalei, kala katang "Shapa" da mahāng meina. ¹⁷Awui avāva̱li mana̱shi, kala ava̱wui kahāng nganā khavai ningkachai amik chi— tampākwui hangkhābingna chi phākhuira, kala khalāngnaobingna chi shaira. ¹⁸Ot kathum hi iwui vang tekmateinai; mati hi ina bhap matāmana: ¹⁹khamasaili khalāngwui shongfa, ngalung tungli phara̱wui shongfa, shamadru alungthungli jahaswui shongfa, kala mayarnao akha ngalānao akhala ngarumwui shongfana. ²⁰Hi makhangatunva̱wui shongfana: ana shaida akhamor mithaida hānga, "Ina khangui ot masālakmana." ²¹Ot kathumwui azingli okathui nganuka; mati azingli chi maphungrarmana: ²²rao akha mungkaphok tharan, kala mangkhama̱ akha kashakazāna pemtinghai tharan; ²³maleikashi sha̱nao akha naomeikapta fathuida tharan, kala rao sha̱nao akha achonva̱wui mahut thuishina tharan. ²⁴Okathuili ot mati kateowana, chithālala athum thangmei kachangkhata: ²⁵sarikbing chi mibing pangshap makatheibing, chithālala athumna lumkachāng tharan athumwui kashakazā kaziphai; ²⁶sākhareibing chi mibing kapinga makatheibing, chithālala athumna lunghārbingli pamkhavai samphang ngasaka; ²⁷khaohbing chi awunga maleimana, chithālala athum saikora rankhala muivai; ²⁸lengvāyur chi nana napāng eina tukkhuishapa, chithālala chi awungabingwui konungli samphanga. ²⁹Ot kathum athumwui zatli yangngai khavaina; mati athumwui kazatli yangngai khavaina: ³⁰kazingkha̱, sāyurbingwui ngachaili kapinga meikapa, khikha eina mangalanmana; ³¹kashang-kharei sāda zata harvā, mevā, kala awunga awui raimibing ala ngarumkha. ³²Nana mangma̱da nakhalatta langsohairasaakha, lah nana makaphā sākhavai khangarān sāhairasaakha, napāng nakhamor tungli khuilu. ³³Kaja seina̱ ngasharda makhan shoka, nātang ngasharda ashee shoka, kala malungkhavāt ngasharda nganang ngasaka.