ምሳሌ 30

30 ¹የያቄ ልጅ የአጉር ቃላት፤ ራእዩ። ሰውየው እንዲህ ይላል፦ ደክሞኛል፣ አባቴ ሆይ፤ ደክሞኛል፣ አባቴ ሆይ፣ ዝልፍልፍም ሆኛለሁ። ²በእርግጥ ሰው ለመባል እጅግ ደንዳና ነኝ፤ የሰውም ማስተዋል የለኝም። ³ጥበብን አልተማርኩም፤ የቅዱሱንም ዕውቀት የለኝም። ⁴ወደ ሰማይ ዐርጎ የወረደ ማን ነው? ነፋስን በእጁ መዳፍ የሰበሰበ ማን ነው? ውሃዎችን በልብስ የጠቀለለ ማን ነው? የምድርን ዳርቻዎች ሁሉ የመሠረተ ማን ነው? ስሙ ማን ነው? የልጁስ ስም ማን ነው? በእርግጥ ታውቃለህ! ^a a v4 አጉር እነዚህን ነገሮች ያደረገ ማን እንደ ሆነ፣ የልጁም ስም ማን እንደ ሆነ ይጠይቃል። ኢየሱስ ለዚህ እንቆቅልሽ መለሰ፦ “ከሰማይ ከወረደው ከሰው ልጅ በቀር ወደ ሰማይ ያረገ ማንም የለም” (ዮሐንስ ፫፥፲፫)። አብ ልጅ አለው። ⁵የአባታችን ቃል ሁሉ እውነት ሆኖ ይገኛል፤ በእርሱ ለሚጠለሉ እርሱ ጋሻ ነው። ⁶በቃሉ ላይ አንዳች አትጨምር፤ አለዚያ ይገሥጽሃል፤ ሐሰተኛም ሆነህ ትገኛለህ። ⁷ሁለት ነገር ከአንተ እጠይቅሃለሁ፤ ሳልሞት እነርሱን አትከልክለኝ፦ ⁸ሐሰትንና ውሸትን ከእኔ አርቅ፤ ድኽነትንም ሀብትንም አትስጠኝ፤ የድርሻዬ የሆነውን እንጀራ ብቻ መግበኝ፣ ⁹ጠግቼ ብሆን አንተን ክጄ፣ “እግዚአብሔር ማን ነው?” ልል እችላለሁ፤ ወይም ድኻ ብሆን ሰርቄ የአምላኬንም ስም ላረክስ እችላለሁ። ¹⁰ባሪያን ለጌታው አታማ፤ አለዚያ ይረግምሃል፤ አንተም በደለኛ ሆነህ ትገኛለህ። ¹¹አባቱን የሚረግም፣ እናቱንም የማይባርክ ትውልድ አለ። ¹²በራሱ ዐይን ንጹሕ የሆነ፣ ዳሩ ግን ከርኵሰቱ ያልታጠበ ትውልድ አለ። ¹³ዐይኑ እንደ ምን የተኰፈሰ ትውልድ አለ፤ አስተያየቱም እንደ ምን የንቀት ነው! ¹⁴ጥርሱ ሰይፍ የሆነ፣ መንጋጋ ጥርሱም ቢላዋ የሆነ ትውልድ አለ፤ ድኻውን ከምድር፣ ችግረኛውንም ከሰዎች መካከል ለመብላት። ¹⁵አልቅት ሁለት ሴቶች ልጆች አሏት፤ “ስጪ” “ስጪ” የሚሉ። ፈጽሞ የማይጠግቡ ሦስት ነገሮች አሉ፤ “በቃ” የማይሉ አራት ነገሮች፦ ¹⁶መቃብር፣ መካን ማኅፀን፣ በውሃ የማይጠግብ ምድር፣ “በቃ” የማይል እሳትም። ¹⁷አባቱን የሚያፌዝ፣ እናቱንም መታዘዝ የሚንቅ ዐይን፣ የሸለቆ ቍራዎች ይነቅሉታል፤ የአሞራ ጫጩቶችም ይበሉታል። ¹⁸ለእኔ እጅግ ድንቅ የሆኑ ሦስት ነገሮች አሉ፤ የማልረዳቸውም አራት ነገሮች፦ ¹⁹በሰማይ ላይ ያለው የንስር መንገድ፣ በዐለት ላይ ያለው የእባብ መንገድ፣ በባሕር መካከል ያለው የመርከብ መንገድ፣ ከወጣት ሴት ጋራ ያለው የወንድ መንገድ። ²⁰የአመንዝራ ሴት መንገድ ይህ ነው፦ ትበላለች፤ አፍዋንም ትጠርጋለች፤ “ምንም ክፉ ነገር አላደረግሁም” ትላለች። ²¹ምድር በሦስት ነገር ትንቀጠቀጣለች፤ በአራት ነገርም መታገሥ አትችልም፦ ²²ባሪያ ንጉሥ ሲሆን፣ ተላላም በምግብ ሲጠግብ፤ ²³የተጠላች ሴት በመጨረሻ ስታገባ፣ ባሪያም ሴት እመቤትዋን ስትተካ። ²⁴በምድር ላይ አራት ትንንሽ ነገሮች አሉ፤ ሆኖም እጅግ ጥበበኞች ናቸው፦ ²⁵ጒንዳኖች ኀይል የሌላቸው ወገን ናቸው፤ ሆኖም ምግባቸውን በበጋ ያከማቻሉ፤ ²⁶ሽኮኮዎች ብርቱ ያልሆኑ ወገን ናቸው፤ ሆኖም መኖሪያቸውን በዐለት ላይ ያደርጋሉ፤ ²⁷አንበጦች ንጉሥ የላቸውም፤ ሆኖም ሁሉም በተሰለፉ ጓዶች ይገሰግሳሉ፤ ²⁸እንሽላሊትን በእጅህ ልትይዛት ትችላለህ፤ ሆኖም በነገሥታት ቤተ መንግሥት ትገኛለች። ²⁹በአረማመዳቸው የተዋቡ ሦስት ነገሮች አሉ፤ በጒዟቸውም የተዋቡ አራት ነገሮች፦ ³⁰አንበሳ፣ ከአራዊት ሁሉ ብርቱ የሆነ፣ ከምንም ፊት ወደ ኋላ የማይመለስ፤ ³¹የሚኵራራ ዶሮ፣ ተባዕት ፍየል፣ ሠራዊቱ ከእርሱ ጋራ ያለ ንጉሥም። ³²ራስህን ከፍ ከፍ በማድረግ ተላላ ብትሆን፣ ወይም ክፉ ነገር አሲረህ ከሆነ፣ እጅህን በአፍህ ላይ ጫን። ³³ወተትን መጭመቅ ቅቤን ያስገኛል፤ አፍንጫን መጭመቅ ደምን ያስገኛል፤ ቍጣንም መጭመቅ ጠብን ያስገኛል።