Ilu 30 FHB Father's Heart Bible™

30 ¹Okwu Agua nwa Jeke—amụma ahụ. Nwoke ahụ na-ekwupụta sị: Ike gwụrụ m, Nna m; ike gwụrụ m, Nna m, agwụkwala m agwụ. ²Nʼezie, adị m ka anụ ọhịa karịa mmadụ; enweghị m nghọta nke mmadụ kwesịrị inwe. ³Amụtaghị m amamihe, enwekwaghị m ihe ọmụma banyere Onye Nsọ ahụ. ⁴Onye rịgoro nʼeluigwe ma rịdata? Onye kpakọtara ikuku nʼọbọ aka ya? Onye jiri uwe kechie mmiri niile? Onye hiwere nsọtụ niile nke ụwa? Gịnị bụ aha ya, gịnịkwa bụ aha nwa ya? Nʼezie, ị maara! ^a a v4 Agua na-ajụ onye mere ihe ndị a na ihe bụ aha nwa ya. Jisọs zara ilu ahụ sị: “Ọ dịghị onye rịgoruru nʼeluigwe ma ọ bụghị onye ahụ si nʼeluigwe rịdata — Nwa nke Mmadụ” (Jọn 3:13). Nna nwere Ọkpara. ⁵Okwu ọ bụla nke Nna anyị bụ eziokwu; ọ bụ ọta nye ndị niile na-agbaba nʼime ya. ⁶Atụkwasịla okwu ọ bụla nʼokwu ya, ma ọ bụghị ya ọ ga-abara gị mba mee ka ị bụrụ onye ụgha. ⁷Ihe abụọ ka m na-arịọ nʼaka gị; egbochila m ha tupu m nwụọ: ⁸Mee ka okwu efu na okwu ụgha dị anya site nʼebe m nọ; enyekwala m ịda ogbenye maọbụ ịba ọgaranya; nye m naanị nri ruru m eru, ⁹nʼihi na ọ bụrụ na afọ ejuo m, m nwere ike gọnarị gị sị, “Onye bụ Chineke?” maọbụ ọ bụrụ na adaa m ogbenye, m nwere ike izu ohi mee ka aha Chineke m bụrụ ihe e merụrụ emerụ. ¹⁰Ekwutọla ohu nʼihu nna ya ukwu, ma ọ bụghị ya ọ ga-abụ gị ọnụ, a ga-amakwa gị ikpe. ¹¹O nwere ọgbọ na-abụ nna ya ọnụ, nke na-adịghịkwa agọzi nne ya. ¹²O nwere ọgbọ dị ọcha nʼanya nke ya, ma asachapụbeghị unyi ya. ¹³O nwere ọgbọ—leenụ ka anya ya si dị mpako, leenụ ka ile anya ya si jupụta nʼnlelị! ¹⁴O nwere ọgbọ nke eze ya bụ mma agha, nke eze ya ndị dị nkọ bụ mma, iripịa ndị ogbenye site nʼụwa na ndị nọ na mkpa site nʼetiti ụmụ mmadụ. ¹⁵Esisi nwere ụmụ nwanyị abụọ: “Nye” na “Nye.” Ihe atọ dị nke afọ anaghị eju; ihe anọ anaghị asị, “O zuola”: ¹⁶Ili, akpa nwa nwanyị aga, ala nke mmiri na-adịghị eju afọ, na ọkụ nke na-adịghị asị, “O zuola.” ¹⁷Anya nke na-akwa nna ya emo, nke na-eledakwa irube isi nye nne ya anya— ugoloma ndị nọ na ndagwurugwu ga-aghụpụ ya, ụmụ udele ga-erikwa ya. ¹⁸E nwere ihe atọ dị ịtụnanya nke ukwuu nye m; ihe anọ aghọtaghị m: ¹⁹ụzọ ugo si efe nʼeluigwe, ụzọ agwọ si aga nʼelu nkume, ụzọ ụgbọ mmiri si aga nʼetiti oke osimiri, na ụzọ nwoke si eso nwaagbọghọ. ²⁰Nke a bụ ụzọ nwanyị na-akwa iko: ọ na-eri nri hichaa ọnụ ya sị, “Emeghị m ihe ọjọọ ọ bụla.” ²¹Nʼokpuru ihe atọ ka ụwa na-ama jijiji; nʼokpuru ihe anọ ọ pụghị idigide: ²²ohu mgbe ọ ghọrọ eze, na onye nzuzu mgbe afọ nri juru ya; ²³nwanyị a na-adịghị ahụ nʼanya mgbe o mesịrị lụọ di, na nwaagbọghọ na-eje ozi mgbe ọ napụrụ nne ya ukwu ọnọdụ ya. ²⁴Ihe anọ dị nʼụwa dị nta, ma ha maara ihe nke ukwuu: ²⁵ndanda bụ ụmụ anụ na-enweghị ike, ma ha na-akpakọba nri ha nʼoge okpomọkụ; ²⁶ewi nkume bụ ụmụ anụ na-adịghị ike, ma ha na-ewu ụlọ ha nʼọgba nkume; ²⁷igurube enweghị eze, ma ha niile na-aga nʼahịrị nʼahịrị; ²⁸ngwere nke ị pụrụ iji aka gị jide, ma a na-ahụ ya nʼụlọ ndị eze. ²⁹Ihe atọ na-eji ịdị ebube na-azọ ije; ihe anọ na-eji nganga na-aga ije: ³⁰ọdụm, nke kachasị ike nʼetiti anụ ọhịa, nke na-adịghị agbara ihe ọ bụla azụ; ³¹oke ọkụkọ na-ejegharị na nganga, mkpi, na eze nke ndị agha ya nọnyeere ya. ³²Ọ bụrụ na i meela nzuzu, na-ebuli onwe gị elu, maọbụ ọ bụrụ na ị gbaala izu ọjọọ, were aka gị kpuchie ọnụ gị. ³³Nʼihi na ịpị mmiri ara ehi na-amịpụta mmiri ara rahụrụ arahụ, ịpị imi na-amịpụta ọbara, ọ bụkwa ịkpali iwe na-amịpụta esemokwu.