Thimo 30 FHB Father's Heart Bible™

30 ¹Ciugo cia Aguru mũrũ wa Jake—nĩyo ndũmĩrĩri. Mũndũ ũcio ekuuga atĩrĩ: Nĩnogete, Awa wakwa; nĩnogete, Awa wakwa, na ngathira hinya. ²Ti-itherũ ndĩ kĩrimũ mũno ngĩkĩra mũndũ; ndirĩ na ũtaũku wa mũndũ. ³Ndirĩ ndeerutĩte ũũgĩ, o na ndirĩ na ũmenyo wa Ũrĩa Mũtheru. ⁴Nũũ wambatĩte igũrũ agĩcooka agĩikũrũka? Nũũ ũcookanĩrĩirie rũhuho thĩinĩ wa mooko make? Nũũ ũohete maaĩ na nguo? Nũũ ũhaandĩte mĩhaka yoothe ya thĩ? Rĩĩtwa rĩake nĩ rĩrĩkũ, na rĩĩtwa rĩa mũrũwe nĩ rĩrĩkũ? Ti-itherũ nĩũũĩ! ^a a v4 Aguru arooria nũũ wĩkĩte maũndũ maya, na rĩĩtwa rĩa mũrũwe nĩ rĩrĩkũ. Jesũ nĩacookirie ndaĩ ĩyo atĩrĩ: “Gũtirĩ mũndũ wambatĩte igũrũ tiga ũrĩa waikũrũkire oimĩte igũrũ — nĩ we Mũrũ wa Mũndũ” (Johana 3:13). Ithe arĩ na Mũũriũ. ⁵Kiugo gĩothe kĩa Ithe witũ nĩ kĩa ma; nĩ we ngo harĩ arĩa moorĩire harĩ we. ⁶Ndũkoongerere ciugo ciake, kana nĩagakũrũithia, agũtue mũheenania. ⁷Maũndũ meerĩ nĩngũhooya kũrĩ wee; ndũkaananyime mo itaanakua: ⁸Eheria maheeni na ũhinga kũraya na niĩ; ndũkaahe ũthĩĩni kana ũtonga; ndĩĩithie o mũgate ũrĩa ũrĩ igai rĩakwa, ⁹nĩgũkorwo ingĩhũũna, no ngũkaane njuge atĩrĩ, “Ngai nĩ ũũ?” kana ingĩthĩĩna, no njiye, na thaahie rĩĩtwa rĩa Ngai wakwa. ¹⁰Ndũkanacambie ndungata harĩ mwathi wayo, kana nĩĩgakũruma, nawe ũtuĩke mwĩhia. ¹¹Kũrĩ na rũciaro rũrĩa rũrumaga ithe waruo, na rũtaarathimaga nyina waruo. ¹²Kũrĩ na rũciaro rũrĩa rwĩonaga rũrĩ rũtheru maithoinĩ ma ruo rwene, no rũtathambĩtio gĩko kĩaruo. ¹³Kũrĩ na rũciaro—kaĩ maitho maaruo marĩ na mwĩtĩĩo-ĩ, na kaĩ ũrori waruo ũrĩ wa kĩmena-ĩ! ¹⁴Kũrĩ na rũciaro rũrĩa magego maaruo marĩ hiũ cia njora, namo magego maaruo manene marĩ tũhiũ, nĩguo rũtambuure athĩĩni moime thĩ, o na aagi moime gatagatĩinĩ ka andũ. ¹⁵Ndũyũ ĩrĩ na airĩtu eerĩ: “Heaana” na “Heaana.” Maũndũ matatũ matihũũnaga; maana matiugaga atĩrĩ, “Nĩ kũigana”: ¹⁶Mbĩrĩra, nda ĩrĩa ĩtaciaraga, thĩ ĩrĩa ĩtahũũnaga maaĩ, na mwaki ũrĩa ũtoigaga atĩrĩ, “Nĩ kũigana.” ¹⁷Riitho rĩrĩa rĩthekagĩrĩra ithe na rĩkarega gwathĩkĩra nyina— mahuru ma gĩtuamba nĩmakarĩkũũra, nacio njaũ cia nderi nĩikarĩrĩa. ¹⁸Maũndũ matatũ nĩ ma magegania mũno harĩ niĩ; maana matingĩhota kũmenya: ¹⁹mũthiĩre wa nderi rĩĩrĩinĩ, mũthiĩre wa nyoka igũrũ rĩa ihiga, mũthiĩre wa marikabu gatagatĩinĩ ka iria, na mũthiĩre wa mũndũ mũrũme na mũirĩĩtu. ²⁰Ũyũ nĩguo mũthiĩre wa mũndũ-wa-nja mũtharia: nĩarĩĩaga, agĩgirĩria kanua gake, akoiga atĩrĩ, “Ndirĩ ũndũ mũũru njĩkĩte.” ²¹Thĩ ĩinainaga nĩ ũndũ wa maũndũ matatũ; na nĩ ũndũ wa maũndũ maana ĩtingĩhota gũkirĩrĩria: ²²ngombo rĩrĩa yatuĩka mũthamaki, na mũndũ mũkĩĩgu rĩrĩa aahũũna irio; ²³mũndũ-wa-nja ũteendetwo rĩrĩa aahikio, na mũirĩĩtu wa ndungata rĩrĩa akooya handũ ha mũtumia ũrĩa mwathi wake. ²⁴Indo inya irĩ gũkũ thĩ nĩ nini, no irĩ na ũũgĩ mũingĩ mũno: ²⁵thigiriri nĩ kĩrĩndĩ gĩtarĩ na hinya, no nĩcigĩĩaga irio ciacio hĩndĩ ya riũa; ²⁶nyamũ iria ciĩtagwo ikũ nĩ kĩrĩndĩ gĩtarĩ na ũhoti, no nĩciakaga mĩciĩ yacio ndwaroinĩ cia mahiga; ²⁷ngigĩ itirĩ na mũthamaki, no ciothe ithiiaga irĩ mĩhari; ²⁸mũhũnyũ no ũnyiitwo na mooko, no ũkoragwo nyũmbainĩ cia athamaki. ²⁹Indo ithatũ igeeraga irĩ na gĩtĩĩo; o na inya igeeraga irĩ na riiri: ³⁰mũrũũthi, ũrĩa ũrĩ hinya gũkĩra nyamũ ciothe, ũrĩa ũtahũndũkaga mbere ya kĩndũ o na kĩrĩkũ; ³¹njamba ya ngũkũ ĩrĩa ĩĩtĩĩaga, na thenge, na mũthamaki ũrĩa mbũtũ yake ya ita ĩrĩ hamwe nake. ³²Angĩkorwo wĩkĩte ũrimũ, ũgĩĩtũũgĩria wee mwene, kana ũngĩkorwo nĩũthugundĩte ũũru, humbĩra kanua gaku na guoko gwaku. ³³Nĩgũkorwo kũhiha iria kũrehaga mũkamo, na kũhiha iniũrũ kũrehaga thakame, naguo kũhiha marakara kũrehaga haaro.