Òwe 30

30 ¹Ọ̀rọ̀ Aguri ọmọ Jakee—àsọtẹ́lẹ̀ náà. Ọkùnrin náà sọ pé: Agara dá mi, Baba mi; agara dá mi, Baba mi, mo sì rẹ̀wẹ̀sì. ²Nítòótọ́, mo jẹ́ ẹranko ju kí n jẹ́ ènìyàn lọ; èmi kò ní òye ènìyàn. ³Èmi kò kọ́ ọgbọ́n, bẹ́ẹ̀ ni èmi kò ní ìmọ̀ Ẹni Mímọ́ náà. ⁴Ta ni ó ti gòkè lọ sí ọ̀run tí ó sì sọ̀kalẹ̀? Ta ni ó ti ko afẹ́fẹ́ jọ sí àtẹ́lẹwọ́ rẹ̀? Ta ni ó ti fi aṣọ wé omi? Ta ni ó ti fìdí gbogbo òpin ayé múlẹ̀? Kí ni orúkọ rẹ̀, kí sì ni orúkọ ọmọ rẹ̀? Nítòótọ́, ìwọ mọ̀! ^a a v4 Aguri béèrè ẹni tí ó ṣe àwọn nǹkan wọ̀nyí àti orúkọ ọmọ rẹ̀. Jesu dá àlọ́ náà lóhùn pé: “Kò sí ẹnikẹ́ni tí ó ti gòkè lọ sí ọ̀run bí kò ṣe ẹni tí ó ti ọ̀run sọ̀kalẹ̀ wá—Ọmọ Ènìyàn” (Johannu 3:13). Baba ní Ọmọ kan. ⁵Gbogbo ọ̀rọ̀ Baba wa jẹ́ òtítọ́; òun ni asà fún àwọn tí ń sá di i. ⁶Má ṣe fi kún ọ̀rọ̀ rẹ̀, bí bẹ́ẹ̀ kọ́, yóò bá ọ wí, yóò sì fihàn pé òpùrọ́ ni ọ́. ⁷Ohun méjì ni mo ń béèrè lọ́wọ́ rẹ; má ṣe fà wọ́n sẹ́yìn kúrò lọ́dọ̀ mi kí èmi tó kú: ⁸Mú ẹ̀tàn àti irọ́ jìnnà sí mi; má ṣe fún mi ní òṣì tàbí ọrọ̀; bọ́ mi pẹ̀lú oúnjẹ tí ó jẹ́ ìpín mi nìkan, ⁹nítorí bí mo bá yó, mo lè sẹ́ ọ, kí n sì wí pé, “Ta ni Ọlọ́run?” tàbí bí mo bá di tálákà, mo lè jalè, kí n sì ba orúkọ Ọlọ́run mi jẹ́. ¹⁰Má ṣe sọ ọ̀rọ̀ èké sí ọmọ ọ̀dọ̀ lọ́dọ̀ olúwa rẹ̀, bí bẹ́ẹ̀ kọ́, yóò fi ọ́ gégùn, ìwọ yóò sì jẹ̀bi. ¹¹Ìran kan wà tí ń fi baba rẹ̀ gégùn tí kì í sì í súre fún ìyá rẹ̀. ¹²Ìran kan wà tí ó mọ́ ní ojú ara rẹ̀ síbẹ̀ tí a kò wẹ̀ kúrò nínú ẹ̀gbin rẹ̀. ¹³Ìran kan wà—báwo ni ojú rẹ̀ ṣe gbéraga tó, báwo ni ìwò rẹ̀ ṣe kún fún ẹ̀gàn tó! ¹⁴Ìran kan wà tí eyín rẹ̀ jẹ́ idà, tí èrìgì rẹ̀ jẹ́ ọ̀bẹ, láti pa àwọn tálákà run kúrò lórí ilẹ̀ ayé àti àwọn aláìní kúrò láàrín àwọn ọmọ ènìyàn. ¹⁵Eṣúṣú ní ọmọbìnrin méjì: “Fúnni” àti “Fúnni.” Ohun mẹ́ta kì í ní ìtẹ́lọ́rùn láéláé; mẹ́rin kì í wí pé, “Ó tó”: ¹⁶Isà òkú, inú àgàn, ilẹ̀ tí omi kì í tẹ́ lọ́rùn láéláé, àti iná tí kì í wí pé, “Ó tó.” ¹⁷Ojú tí ń fi baba ṣẹ̀fẹ̀ tí ó sì kẹ́gàn láti gbọ́rọ̀ sí ìyá—àwọn ẹyẹ ìwò àfonífojì yóò yọ ọ́ jáde, àwọn ọmọ igún yóò sì jẹ ẹ́. ¹⁸Ohun mẹ́ta wà tí ó ya mí lẹ́nu jù; mẹ́rin tí kò yé mi: ¹⁹ọ̀nà idì ní òfúrufú, ọ̀nà ejò lórí àpáta, ọ̀nà ọkọ̀ ojú omi ní àárín òkun, àti ọ̀nà ọkùnrin pẹ̀lú ọ̀dọ́bìnrin. ²⁰Èyí ni ọ̀nà panṣágà obìnrin: ó jẹun, ó sì nu ẹnu rẹ̀, ó sì wí pé, “Èmi kò ṣe ohun tí kò dára.” ²¹Lábẹ́ ohun mẹ́ta ni ilẹ̀ ayé ń wárìrì; lábẹ́ mẹ́rin ni kò lè faradà: ²²ọmọ ọ̀dọ̀ nígbà tí ó bá di ọba, àti aṣiwèrè nígbà tí ó bá yó fún oúnjẹ; ²³obìnrin tí a kò fẹ́ràn nígbà tí ó bá rí ẹni fẹ́ ẹ́ nígbẹ̀yìn, àti ọmọbìnrin ọ̀dọ̀ nígbà tí ó bá gba ipò ìyàá rẹ̀. ²⁴Ohun mẹ́rin wà ní ayé tí ó kéré, síbẹ̀ tí wọ́n gbọ́n gidigidi: ²⁵èèrà jẹ́ ẹ̀dá tí kò lágbára, síbẹ̀ tí wọ́n ń kó oúnjẹ wọn pamọ́ ní àkókò ẹ̀ẹ̀rùn; ²⁶àwọn ehoro àpáta jẹ́ ẹ̀dá tí kò lágbára púpọ̀, síbẹ̀ tí wọ́n ń kọ́ ilé wọn sí orí àpáta; ²⁷eṣú kò ní ọba, síbẹ̀ gbogbo wọn ń jáde lọ ní ọ̀wọ̀ọ̀wọ́; ²⁸aláǹgbá tí o lè fi ọwọ́ rẹ mú, síbẹ̀ tí a ń rí i nínú ààfin àwọn ọba. ²⁹Ohun mẹ́ta ni ìrìn wọn ní ọlá; mẹ́rin ni ìrìnkiri wọn ní ọlá: ³⁰kìnnìún, alágbára jùlọ nínú àwọn ẹranko, tí kì í padà sẹ́yìn fún ohunkóhun; ³¹àkùkọ tí ń rìn fẹ̀rẹ̀fẹ̀rẹ̀, òbúkọ, àti ọba tí ọmọ ogun rẹ̀ wà pẹ̀lú rẹ̀. ³²Bí ìwọ bá ti hùwà òmùgọ̀, tí o gbé ara rẹ ga, tàbí bí o bá ti gbèrò ibi, fi ọwọ́ rẹ bo ẹnu rẹ. ³³Nítorí fífún wàrà mú wàràkàṣì jáde, fífún imú mú ẹ̀jẹ̀ jáde, àti ríru ìbínú mú ìjà jáde.