Òwe 28

28 ¹Àwọn ènìyàn búburú a máa sá nígbà tí kò sí ẹni tí ń lé wọn, ṣùgbọ́n olódodo gboyà bí kìnnìún. ²Nígbà tí ilẹ̀ kan bá ṣọ̀tẹ̀, ọ̀pọ̀ olórí ni yóò ní, ṣùgbọ́n nípa ọkùnrin tí ó ní òye àti ìmọ̀, yóò dúró ṣinṣin. ³Ọkùnrin tálákà tí ó ń ni àwọn aláìní lára dàbí òjò ńlá tí kì í fi oúnjẹ kankan sílẹ̀. ⁴Àwọn tí ó kọ òfin sílẹ̀ ń gbé ènìyàn búburú ga, ṣùgbọ́n àwọn tí ó pa òfin mọ́ ń bá wọn jà. ⁵Àwọn ènìyàn búburú kò mọ ìdájọ́ òdodo, ṣùgbọ́n àwọn tí ń wá Baba wa yé e ní kíkún. ⁶Ó sàn kí ènìyàn jẹ́ tálákà tí ó ń rìn ní ìdúró ṣinṣin ju ọlọ́rọ̀ tí ọ̀nà rẹ̀ kún fún wíwọ́. ⁷Ẹnikẹ́ni tí ó bá pa òfin mọ́ jẹ́ ọmọ onímòye, ṣùgbọ́n ọ̀rẹ́ àwọn ọ̀jẹun ń dójútì baba rẹ̀. ⁸Ẹnikẹ́ni tí ó bá fi èlé àti èrè àìṣòdodo sọ ọrọ̀ rẹ̀ di púpọ̀, ó ń kó o jọ fún ẹni tí ó ń ṣàánú àwọn tálákà. ⁹Bí ẹnikẹ́ni bá kọ̀ láti fetí sí òfin, àní àdúrà rẹ̀ pàápàá jẹ́ ìríra. ¹⁰Ẹnikẹ́ni tí ó bá ṣi olódodo lọ́nà sí ọ̀nà búburú yóò ṣubú sínú kòtò ara rẹ̀, ṣùgbọ́n aláìlẹ́gàn yóò jogún ohun rere. ¹¹Ọlọ́rọ̀ jẹ́ ọlọ́gbọ́n lójú ara rẹ̀, ṣùgbọ́n tálákà tí ó ní òye rí òtítọ́ inú rẹ̀ kedere. ¹²Nígbà tí olódodo bá ṣẹgun, ògo ńlá ni ó wà, ṣùgbọ́n nígbà tí ènìyàn búburú bá dìde, àwọn ènìyàn a máa fi ara pamọ́. ¹³Ẹnikẹ́ni tí ó bá fi ẹ̀ṣẹ̀ rẹ̀ pamọ́ kì yóò ṣe rere, ṣùgbọ́n ẹnikẹ́ni tí ó bá jẹ́wọ́ tí ó sì yípadà kúrò nínú wọn yóò rí àánú gbà. ¹⁴Ìbùkún ni fún ẹni tí ó ní ìbẹ̀rù nígbà gbogbo, ṣùgbọ́n ẹnikẹ́ni tí ó bá sé ọkàn rẹ̀ le yóò ṣubú sínú ìyọnu. ¹⁵Bí kìnnìún tí ń bú ramúramù tàbí beari tí ń dani lé ni olórí búburú tí ń ṣàkóso àwọn ènìyàn aláìní. ¹⁶Olórí tí ó ṣe aláìní òye jẹ́ aninilára oníkà, ṣùgbọ́n ẹnikẹ́ni tí ó bá kórìíra èrè àìṣòdodo yóò mú ọjọ́ rẹ̀ gùn. ¹⁷Ọkùnrin tí ẹ̀bi ìtàjẹ̀ sílẹ̀ bá ni lẹ́rù yóò jẹ́ ìsáǹsá títí di ikú; kí ẹnikẹ́ni má ṣe ràn án lọ́wọ́. ¹⁸Ẹnikẹ́ni tí ó bá ń rìn ní ìdúró ṣinṣin ni a ó pa mọ́ láìléwu, ṣùgbọ́n ẹnikẹ́ni tí ọ̀nà rẹ̀ bá wọ́ yóò ṣubú lójijì. ¹⁹Ẹnikẹ́ni tí ó bá ro ilẹ̀ rẹ̀ yóò ní oúnjẹ lọ́pọ̀lọpọ̀, ṣùgbọ́n ẹnikẹ́ni tí ó bá ń lépa ohun asán yóò ní òsì lọ́pọ̀lọpọ̀. ²⁰Olóòtítọ́ ọkùnrin yóò kún fún ìbùkún, ṣùgbọ́n ẹnikẹ́ni tí ó bá ń kánjú láti là kì yóò lọ láìjìyà. ²¹Ojúsàájú kì í ṣe ohun rere, síbẹ̀ nítorí òkèlè oúnjẹ kan ènìyàn yóò ṣẹ̀. ²²Ọkùnrin ahun ń lépa ọrọ̀, kò sì mọ̀ pé òsì yóò bá a. ²³Ẹnikẹ́ni tí ó bá bá ènìyàn wí yóò rí ojúrere púpọ̀ sí i níkẹyìn ju ẹni tí ó ń fi ahọ́n rẹ̀ pọ́n ni lójú. ²⁴Ẹnikẹ́ni tí ó bá kó baba tàbí ìyá rẹ̀ lólè tí ó sì wí pé, “Kì í ṣe ẹ̀ṣẹ̀,” ọ̀rẹ́ ẹni tí ń parun ni. ²⁵Ọkùnrin ojúkòkòrò ń ru ìjà sókè, ṣùgbọ́n ẹnikẹ́ni tí ó bá gbẹ́kẹ̀lé Baba wa yóò là lọ́rọ̀. ²⁶Ẹnikẹ́ni tí ó bá gbẹ́kẹ̀lé ọkàn ara rẹ̀ jẹ́ òmùgọ̀, ṣùgbọ́n ẹnikẹ́ni tí ó bá ń rìn nínú ọgbọ́n ni a ó pa mọ́ láìléwu. ²⁷Ẹnikẹ́ni tí ó bá ń fi fún àwọn tálákà kì yóò ṣaláìní ohunkóhun, ṣùgbọ́n ẹnikẹ́ni tí ó bá di ojú rẹ̀ sí wọn yóò gba ọ̀pọ̀ ègún. ²⁸Nígbà tí ènìyàn búburú bá dìde, àwọn ènìyàn a máa fi ara pamọ́, ṣùgbọ́n nígbà tí wọ́n bá ṣègbé, olódodo a máa gbilẹ̀.