సామెతలు 28

28 ¹ఎవరూ తరమకపోయినా దుష్టులు పారిపోతారు, అయితే నీతిమంతులు సింహమంత ధైర్యముగా ఉంటారు. ²దేశము తిరుగుబాటు చేసినప్పుడు దానికి అనేకమంది పాలకులు ఉంటారు, అయితే వివేకము, జ్ఞానము గల మనుష్యుని వలన అది స్థిరముగా నిలుస్తుంది. ³నిస్సహాయులను అణచివేసే బీద మనుష్యుడు ఆహారమేమీ మిగల్చని కుంభవృష్టి వంటివాడు. ⁴ధర్మశాస్త్రమును విడిచిపెట్టేవారు దుష్టులను పొగుడుతారు, అయితే ధర్మశాస్త్రమును గైకొనేవారు వారికి విరోధముగా పోరాడతారు. ⁵దుష్టులు న్యాయమును గ్రహించరు, అయితే మన తండ్రిని వెదకువారు దానిని పూర్తిగా గ్రహిస్తారు. ⁶తన మార్గములలో వంకరగా నడిచే ధనవంతునికంటె యథార్థముగా నడుచుకొను బీదవాడు మేలు. ⁷ధర్మశాస్త్రమును గైకొనువాడు వివేకముగల కుమారుడు, అయితే తిండిబోతులతో సహవాసము చేయువాడు తన తండ్రికి అవమానము తెస్తాడు. ⁸వడ్డీ వలనను అన్యాయపు లాభము వలనను తన ఆస్తిని పెంచుకొనువాడు బీదలయెడల ఉదారముగా ఉండువాని కొరకు దానిని కూర్చుకుంటాడు. ⁹ధర్మశాస్త్రమును ఆలకించుటకు ఎవరైనా నిరాకరిస్తే అతని ప్రార్థన కూడా అసహ్యకరమైనది. ¹⁰యథార్థవంతులను దుష్టమార్గములో తప్పిపోవునట్లు నడిపించువాడు తానే తన గోతిలో పడతాడు, అయితే నిర్దోషులు మంచి వస్తువులను స్వాస్థ్యముగా పొందుతారు. ¹¹ధనవంతుడు తన దృష్టికి తాను జ్ఞానవంతుడు, అయితే వివేకముగల బీదవాడు అతనిని పూర్తిగా కనిపెడతాడు. ¹²నీతిమంతులు జయించినప్పుడు గొప్ప మహిమ కలుగుతుంది, అయితే దుష్టులు లేచినప్పుడు ప్రజలు దాగుకొంటారు. ¹³తన పాపములను దాచిపెట్టువాడు వర్ధిల్లడు, అయితే వాటిని ఒప్పుకొని విడిచిపెట్టువాడు కనికరము పొందుతాడు. ¹⁴ఎల్లప్పుడు భయభక్తులు కలిగియుండువాడు ధన్యుడు, అయితే తన హృదయమును కఠినపరచుకొనువాడు ఆపదలో పడతాడు. ¹⁵నిస్సహాయ ప్రజలపై దుష్ట పాలకుడు గర్జించు సింహము వంటివాడు, దాడిచేయు ఎలుగుబంటి వంటివాడు. ¹⁶వివేకము లేని పాలకుడు క్రూరముగా అణచివేయువాడు, అయితే అన్యాయపు లాభమును ద్వేషించువాడు తన దినములను పొడిగించుకుంటాడు. ¹⁷రక్తపాతపు దోషభారము మోయు మనుష్యుడు మరణమువరకు పారిపోతూ ఉంటాడు; అతనికి ఎవరూ ఆసరా ఇవ్వకూడదు. ¹⁸యథార్థముగా నడుచుకొనువాడు సురక్షితముగా కాపాడబడతాడు, అయితే తన మార్గములలో వంకరగా ఉండువాడు అకస్మాత్తుగా పడిపోతాడు. ¹⁹తన భూమిని దున్నువాడు సమృద్ధిగా ఆహారము పొందుతాడు, అయితే వ్యర్థమైన వాటి వెంట పరుగెత్తువాడు సమృద్ధిగా పేదరికమును పొందుతాడు. ²⁰నమ్మకమైన మనుష్యుడు దీవెనలతో నిండి ఉంటాడు, అయితే త్వరగా ధనవంతుడగుటకు తహతహలాడువాడు శిక్ష తప్పించుకోలేడు. ²¹పక్షపాతము చూపుట మంచిది కాదు, అయినా ఒక రొట్టెముక్క కొరకు మనుష్యుడు తప్పు చేస్తాడు. ²²పిసినారి మనుష్యుడు ధనము వెంట తహతహలాడతాడు, పేదరికము తనను ఆవరించునని అతడు ఎరుగడు. ²³నాలుకతో ముఖస్తుతి చేయువానికంటె ఒక మనుష్యుని గద్దించువాడు చివరకు ఎక్కువ దయ పొందుతాడు. ²⁴తన తండ్రిని గాని తల్లిని గాని దోచుకొని, "ఇది పాపము కాదు" అని చెప్పువాడు నాశనము చేయువానికి సహవాసి. ²⁵ఆశపోతు మనుష్యుడు కలహమును రేపుతాడు, అయితే మన తండ్రియందు నమ్మకముంచువాడు వర్ధిల్లుతాడు. ²⁶తన స్వహృదయమును నమ్ముకొనువాడు బుద్ధిహీనుడు, అయితే జ్ఞానముతో నడుచుకొనువాడు సురక్షితముగా కాపాడబడతాడు. ²⁷బీదలకు ఇచ్చువానికి ఏమీ కొదువ ఉండదు, అయితే వారియెడల తన కన్నులు మూసికొనువాడు అనేక శాపములు పొందుతాడు. ²⁸దుష్టులు లేచినప్పుడు ప్రజలు దాగుకొంటారు, అయితే వారు నశించినప్పుడు నీతిమంతులు వర్ధిల్లుతారు.