സിംഹത്തെപ്പോലെ ധൈര്യമുള്ളവർ

അധികാരവും പണവും ഒരുമിച്ച്. മത്സരിക്കുന്ന ദേശത്തിന് അധിപതികൾ പലരാണ്; ദുഷ്ടനായ അധിപതി പാഞ്ഞുവരുന്ന കരടിയാണ്; ദുഷ്ടന്മാർ ഉയരുമ്പോൾ ആളുകൾ ഒളിക്കുന്നു. പാപങ്ങൾ മറച്ചുവയ്ക്കുന്നത് ഫലിക്കുകയില്ല, അവ ഏറ്റുപറയുന്നവന് കരുണ ലഭിക്കും; ധനവാനാകാനുള്ള ബദ്ധപ്പാടാണ് മനുഷ്യനെ നശിപ്പിക്കുന്നതെന്ന് ഇത് ആവർത്തിച്ചു പറയുന്നു.

അധ്യായം 28.

ആരും പിന്തുടരാതിരിക്കെ ദുഷ്ടന്മാർ ഓടിപ്പോകുന്നു; എന്നാൽ നീതിമാന്മാർ സിംഹത്തെപ്പോലെ ധൈര്യമുള്ളവരാകുന്നു. ദേശം മത്സരിക്കുമ്പോൾ അതിന് അധിപന്മാർ പലരുണ്ടാകുന്നു; എന്നാൽ വിവേകവും അറിവുമുള്ള മനുഷ്യനാൽ അതു സുസ്ഥിരമായി നിലനില്ക്കുന്നു. നിസ്സഹായരെ പീഡിപ്പിക്കുന്ന ദരിദ്രൻ ആഹാരമൊന്നും ശേഷിപ്പിക്കാത്ത കൊടുമഴപോലെയാകുന്നു. ന്യായപ്രമാണം ഉപേക്ഷിക്കുന്നവർ ദുഷ്ടന്മാരെ പ്രശംസിക്കുന്നു; എന്നാൽ ന്യായപ്രമാണം പാലിക്കുന്നവർ അവരോട് എതിർത്തുനില്ക്കുന്നു. ദുഷ്ടജനം നീതി ഗ്രഹിക്കുന്നില്ല; എന്നാൽ നമ്മുടെ പിതാവിനെ അന്വേഷിക്കുന്നവർ അതു പൂർണമായി ഗ്രഹിക്കുന്നു. തന്റെ വഴികളിൽ വക്രതയുള്ള ധനവാനെക്കാൾ നിഷ്കളങ്കതയോടെ നടക്കുന്ന ദരിദ്രൻ ശ്രേഷ്ഠൻ. ന്യായപ്രമാണം പാലിക്കുന്നവൻ വിവേകമുള്ള പുത്രൻ; എന്നാൽ അമിതഭോജികളുടെ കൂട്ടാളി തന്റെ പിതാവിന് ലജ്ജ വരുത്തുന്നു. പലിശയാലും അന്യായലാഭത്താലും തന്റെ സമ്പത്തു വർധിപ്പിക്കുന്നവൻ ദരിദ്രരോട് ഉദാരനായവനുവേണ്ടി അതു ശേഖരിക്കുന്നു. ആരെങ്കിലും ന്യായപ്രമാണം കേൾക്കാൻ വിസമ്മതിച്ചാൽ അവന്റെ പ്രാർഥനപോലും വെറുപ്പാകുന്നു. നേരുള്ളവരെ ദുർമാർഗത്തിലൂടെ വഴിതെറ്റിക്കുന്നവൻ തന്റെ സ്വന്തം കുഴിയിൽ വീഴും; എന്നാൽ നിഷ്കളങ്കർ നന്മകൾ അവകാശമാക്കും. ധനവാൻ തന്റെ സ്വന്തം ദൃഷ്ടിയിൽ ജ്ഞാനിയാകുന്നു; എന്നാൽ വിവേകമുള്ള ദരിദ്രൻ അവനെ കൃത്യമായി കണ്ടുപിടിക്കുന്നു. നീതിമാന്മാർ ജയിക്കുമ്പോൾ മഹാ മഹത്ത്വമുണ്ടാകുന്നു; എന്നാൽ ദുഷ്ടന്മാർ ഉയരുമ്പോൾ ജനം ഒളിച്ചുപോകുന്നു. തന്റെ പാപങ്ങൾ മറച്ചുവെക്കുന്നവൻ അഭിവൃദ്ധിപ്പെടുകയില്ല; എന്നാൽ അവ ഏറ്റുപറഞ്ഞ് ഉപേക്ഷിക്കുന്നവന് കരുണ ലഭിക്കും. എപ്പോഴും ഭയഭക്തിയോടെ നിലകൊള്ളുന്നവൻ അനുഗൃഹീതൻ; എന്നാൽ തന്റെ ഹൃദയം കഠിനമാക്കുന്നവൻ അനർഥത്തിൽ വീഴും. നിസ്സഹായജനത്തിന്മേലുള്ള ദുഷ്ട അധിപൻ അലറുന്ന സിംഹത്തെപ്പോലെയും പാഞ്ഞടുക്കുന്ന കരടിയെപ്പോലെയുമാകുന്നു. വിവേകമില്ലാത്ത അധിപൻ ക്രൂരനായ പീഡകൻ; എന്നാൽ അന്യായലാഭം വെറുക്കുന്നവൻ തന്റെ ആയുസ്സു ദീർഘമാക്കും. രക്തച്ചൊരിച്ചിലിന്റെ കുറ്റഭാരം ചുമക്കുന്ന മനുഷ്യൻ മരണംവരെ ഒളിച്ചോടുന്നവനായിരിക്കും; ആരും അവനെ താങ്ങരുത്. നിഷ്കളങ്കതയോടെ നടക്കുന്നവൻ സുരക്ഷിതനായി കാക്കപ്പെടും; എന്നാൽ തന്റെ വഴികളിൽ വക്രതയുള്ളവൻ പെട്ടെന്നു വീഴും. തന്റെ നിലം കൃഷിചെയ്യുന്നവന് ആഹാരം സമൃദ്ധിയായി ഉണ്ടാകും; എന്നാൽ വ്യർഥകാര്യങ്ങളെ പിന്തുടരുന്നവന് ദാരിദ്ര്യം സമൃദ്ധിയായി ഉണ്ടാകും. വിശ്വസ്തനായ മനുഷ്യൻ അനുഗ്രഹങ്ങളാൽ നിറയും; എന്നാൽ ധനവാനാകാൻ ധൃതികൂട്ടുന്നവൻ ശിക്ഷ ഒഴിഞ്ഞുപോകയില്ല. പക്ഷപാതം കാട്ടുന്നതു നന്നല്ല; എങ്കിലും ഒരു കഷണം അപ്പത്തിനുവേണ്ടി മനുഷ്യൻ അന്യായം ചെയ്യും. പിശുക്കൻ ധനത്തിനു പിന്നാലെ പായുന്നു; ദാരിദ്ര്യം തന്നെ പിടികൂടുമെന്ന് അവൻ അറിയുന്നില്ല. തന്റെ നാവുകൊണ്ടു മുഖസ്തുതി പറയുന്നവനെക്കാൾ ഒരുവനെ ശാസിക്കുന്നവൻ ഒടുവിൽ അധികം പ്രീതി കണ്ടെത്തും. തന്റെ പിതാവിനെയോ മാതാവിനെയോ കവർന്നിട്ട് “ഇതു പാപമല്ല” എന്നു പറയുന്നവൻ നശിപ്പിക്കുന്നവന്റെ കൂട്ടാളിയാകുന്നു. അത്യാഗ്രഹിയായ മനുഷ്യൻ കലഹം ഇളക്കിവിടുന്നു; എന്നാൽ നമ്മുടെ പിതാവിൽ ആശ്രയിക്കുന്നവൻ സമൃദ്ധനാക്കപ്പെടും. തന്റെ സ്വന്തം ഹൃദയത്തിൽ ആശ്രയിക്കുന്നവൻ ഭോഷൻ; എന്നാൽ ജ്ഞാനത്തിൽ നടക്കുന്നവൻ സുരക്ഷിതനായി കാക്കപ്പെടും. ദരിദ്രർക്കു കൊടുക്കുന്നവന് ഒന്നിനും കുറവുണ്ടാകയില്ല; എന്നാൽ അവരോട് കണ്ണടയ്ക്കുന്നവന് അനേകം ശാപങ്ങൾ ലഭിക്കും. ദുഷ്ടന്മാർ ഉയരുമ്പോൾ ജനം ഒളിച്ചുപോകുന്നു; എന്നാൽ അവർ നശിക്കുമ്പോൾ നീതിമാന്മാർ അഭിവൃദ്ധിപ്പെടുന്നു.