箴言 25

25 ¹呢啲都係所羅門嘅箴言,係猶大王希西家嘅臣僕抄錄出嚟嘅。 ²隱藏一件事係我哋嘅父嘅榮耀, 查明一件事就係君王嘅榮耀。 ³天有幾高,地有幾深, 君王嘅心一樣係測不透嘅。 ⁴除去銀裏面嘅渣滓, 銀匠就煉得出器皿嚟。 ⁵除去君王面前嘅惡人, 佢嘅寶座就靠住義得以堅立。 ⁶喺君王面前唔好自抬身價, 亦都唔好企喺大人物嘅位度; ⁷因為人對你講「上嚟呢度啦」, 好過喺你親眼見到嘅貴人面前被人降到低位。 ⁸唔好急住去同人爭吵,因為到最後, 鄰舍令你蒙羞嗰陣,你又可以點做呢? ⁹你要親自同鄰舍 辯明你嘅理由,但係唔好洩露人哋嘅秘密, ¹⁰免得聽見嘅人羞辱你,令你嘅壞名聲永遠洗唔甩。 ¹¹一句話 講得合時,就好似金蘋果鑲喺銀器上面咁。 ¹²智慧嘅責備臨到肯聽嘅耳朵, 就好似金環同精金嘅飾物咁。 ¹³忠信嘅使者對打發佢 嘅人 嚟講,就好似收割時候嘅雪咁清涼;佢令主人嘅心舒暢。 ¹⁴誇口話送禮卻從來冇送嘅人, 就好似有雲有風卻冇雨咁。 ¹⁵靠住忍耐可以說服掌權嘅人, 溫柔嘅舌頭可以折斷骨頭。 ¹⁶你搵到蜜糖,只可以食夠就算,否則食得太多就會嘔出嚟。 ¹⁷唔好太過頻密 去鄰舍屋企,否則佢就會厭煩你,甚至憎你。 ¹⁸作假見證陷害鄰舍嘅人, 就好似大棍、刀劍同利箭咁。 ¹⁹患難嘅時候倚靠唔忠信嘅人, 就好似爛牙同脫臼嘅腳咁。 ²⁰對住愁苦嘅心唱歌嘅人,就好似寒冷天脫衫嘅人, 又好似將醋倒喺蘇打上面咁。 ²¹你嘅仇敵餓嘅時候,你要俾嘢佢食; 佢渴嘅時候,你要俾水佢飲; ²²因為你咁樣做,就係將炭火堆喺佢頭上, 我哋嘅父亦都會賞賜你。 ²³北風帶嚟雨水, 愛講是非嘅舌頭就帶嚟怒容。 ²⁴寧願住喺屋頂嘅一角,都好過同愛爭吵嘅妻子同住一間屋。 ²⁵從遠方嚟嘅好消息,對疲乏嘅心嚟講, 就好似清涼嘅水咁。 ²⁶義人喺惡人面前退讓,就好似攪渾咗嘅泉源或者受污染嘅水井咁。 ²⁷食太多蜜糖唔好, 尋求自己嘅榮耀一樣唔好。 ²⁸管唔住自己心靈嘅人,就好似被人攻破、冇咗城牆嘅城咁。