ምሳሌ 25

25 ¹እነዚህ ደግሞ የይሁዳ ንጉሥ የሕዝቅያስ ሰዎች የገለበጧቸው የሰሎሞን ምሳሌዎች ናቸው። ²ነገርን መሰወር የአባታችን ክብር ነው፤ ነገርን መመርመር ግን የነገሥታት ክብር ነው። ³ሰማይ ከፍ እንደሆነ፣ ምድርም ጥልቅ እንደሆነች፣ የነገሥታት ልብም እንዲሁ አይመረመርም። ⁴ከብር ዝቃጩን አስወግድ፤ ለአንጥረኛውም ዕቃ ይወጣል። ⁵ክፉዎችን ከንጉሡ ፊት አስወግድ፤ ዙፋኑም በጽድቅ ጸንቶ ይቆማል። ⁶በንጉሡ ፊት ራስህን ከፍ አታድርግ፤ በታላላቆችም ስፍራ አትቁም፤ ⁷ዐይንህ ካየው መኰንን ፊት ዝቅ ወዳለ ስፍራ ከመውረድ ይልቅ፣ “ወደዚህ ውጣ” መባል ይሻላልና። ⁸ወደ ክርክር አትቸኵል፤ ጎረቤትህ ባሳፈረህ ጊዜ በመጨረሻ ምን ታደርጋለህ? ⁹ነገርህን ከጎረቤትህ ጋራ ተከራከር፤ የሌላውን ሰው ምስጢር ግን አትግለጥ፤ ¹⁰ያለዚያ የሚሰማው ሰው ያሳፍርህ ይሆናል፤ መጥፎ ስምህም ከቶ አይጠፋም። ¹¹በተገቢው ጊዜ የተነገረ ቃል በብር ጌጥ ላይ እንዳለ የወርቅ ፖም ነው። ¹²ለሚሰማ ጆሮ ጥበበኛ ተግሣጽ የወርቅ ቀለበት ወይም የጥሩ ወርቅ ጌጥ ነው። ¹³በመከር ወቅት እንዳለ የበረዶ ቅዝቃዜ፣ ለሚልኩት ታማኝ መልእክተኛ እንዲሁ ነው፤ የጌቶቹንም ነፍስ ያድሳል። ¹⁴ዝናብ የሌለው ደመናና ነፋስ እንዳለ፣ ባልሰጠው ስጦታ የሚመካ ሰው እንዲሁ ነው። ¹⁵በትዕግሥት ገዥን ማሳመን ይቻላል፤ ለስለስ ያለ ምላስም ዐጥንትን ይሰብራል። ¹⁶ማር ባገኘህ ጊዜ የሚበቃህን ብቻ ብላ፤ ያለዚያ ትጠግብና ታስታውካለህ። ¹⁷ወደ ጎረቤትህ ቤት ተደጋግመህ አትሂድ፤ ያለዚያ ይሰለችህና ይጠላሃል። ¹⁸በጎረቤቱ ላይ የሐሰት ምስክር የሚሆን ሰው፣ እንደ ዱላ፣ እንደ ሰይፍና እንደ ሹል ፍላጻ ነው። ¹⁹በመከራ ጊዜ በማይታመን ሰው መታመን፣ እንደ ተበላሸ ጥርስ ወይም እንደ ወለም ያለ እግር ነው። ²⁰በብርድ ቀን ልብሱን እንደሚያወልቅ ሰው፣ በሶዳ ላይ እንደሚፈስ ኮምጣጤ፣ ለተከዘ ልብ መዝሙር የሚዘምር ሰው እንዲሁ ነው። ²¹ጠላትህ ተርቦ እንደሆነ የሚበላውን እንጀራ ስጠው፤ ተጠምቶም እንደሆነ የሚጠጣውን ውሃ ስጠው፤ ²²በራሱ ላይ የእሳት ፍም ትከምርበታለህና፤ አባታችንም ብድራትህን ይከፍልሃል። ²³የሰሜን ነፋስ ዝናብን ያመጣል፤ የሚያሜ ምላስም የተቈጣ ፊትን ያስከትላል። ²⁴ከተጣይ ሚስት ጋራ በአንድ ቤት ከመኖር ይልቅ፣ በሰገነት ጥግ መኖር ይሻላል። ²⁵ለደከመች ነፍስ ቀዝቃዛ ውሃ እንደሆነ፣ ከሩቅ አገር የሚመጣ መልካም ዜና እንዲሁ ነው። ²⁶በክፉዎች ፊት የሚንገዳገድ ጻድቅ ሰው፣ እንደ ተደፈረሰ ምንጭ ወይም እንደ ተበከለ የውሃ ጕድጓድ ነው። ²⁷ብዙ ማር መብላት መልካም አይደለም፤ የገዛ ራስንም ክብር መፈለግ እንዲሁ። ²⁸መንፈሱን መቈጣጠር የማይችል ሰው፣ እንደ ተደፈረና ቅጥር እንደሌለው ከተማ ነው።