Mkpokọta Hezekaya
Ndị ikom Hezekaya depụtara ya, o jukwara anya nʼilu ntụnyere: apụl ọlaedo, snoo nʼoge owuwe ihe ubi, eze ọjọọ, mmanya gbara ụka nʼelu soda, obodo na-enweghị mgbidi. Ndụmọdụ ya doro anya, site nʼịghara ịkwagara onwe gị nʼihu eze ruo nʼịghara ịnọkarị nʼụlọ onye agbata obi gị ruo mgbe ike gwụrụ ya.
25 1Ndị a bụkwa ilu Solomọn, bụ nke ndị ikom Hezekaya eze Juda deghachiri. 2Ọ bụ ebube Nna anyị izo okwu, ma ọ bụ ebube ndị eze inyocha okwu. 3Dịka eluigwe si dị elu na ụwa si miri emi, otu a ka obi ndị eze dị ihe a na-apụghị ịchọpụta. 4Wepụ nchara site nʼọlaọcha, arịa ga-esikwa na ya pụta nye onye na-anụcha ọla. 5Wepụ ndị ajọ omume nʼihu eze, a ga-emekwa ka ocheeze ya guzosie ike site nʼezi omume. 6Emela onwe gị ihe dị ukwuu nʼihu eze, eguzokwala nʼọnọdụ ndị dị ukwuu; 7nʼihi na ọ ka mma ịgwa gị, “Bịa nʼelu ebe a,” karịa ka e weda gị nʼọnọdụ dị ala nʼihu onyeisi nke ị na-ahụ anya. 8Emela ngwa ngwa ịba nʼese okwu, nʼihi na gịnị ka ị ga-eme nʼikpeazụ mgbe onye agbataobi gị mere gị ihere? 9Soro onye agbataobi gị onwe ya kpee okwu gị, ma ekpughela ihe nzuzo nke onye ọzọ, 10ka onye nụrụ ya ghara imeru gị ihere, aha ọjọọ gịkwa agaghị apụ apụ. 11Okwu a kwuru nʼoge kwesịrị ekwesị dị ka mkpụrụ apụl ọlaedo nʼime ihe e ji ọlaọcha kpụọ. 12Dị ka mgbanaka ọlaedo maọbụ ihe ịchọ mma e ji ọlaedo a nụchara kpụọ ka ịdọ aka na ntị nke amamihe dị nye ntị na-ege ntị. 13Dị ka oyi nke snoo nʼoge owuwe ihe ubi ka onye ozi kwesịrị ntụkwasị obi dịịrị ndị zitere ya; ọ na-eme ka mkpụrụ obi ndị nwe ya nwee ume ọhụrụ. 14Dị ka igwe ojii na ifufe na-enweghị mmiri ozuzo ka onye na-anya isi maka onyinye ọ na-enyeghị dị. 15Site na ndidi ka a na-eme ka onye na-achị achị kwenye, ire dị nro na-agbajikwa ọkpụkpụ. 16Ọ bụrụ na ị chọta mmanụ aṅụ, rie naanị ihe ga-ezuru gị, ka i ghara iri nke oke wee gbọọ ya. 17Emela ka ụkwụ gị na-ejikarị abịa nʼụlọ onye agbataobi gị, ka ọ ghara ike gị ike wee kpọọ gị asị. 18Dị ka mkpọ, mma agha, na àkụ dị nkọ ka onye na-agba àmà ụgha megide onye agbataobi ya dị. 19Dị ka ezé rụrụ arụ maọbụ ụkwụ sị nʼọnọdụ ya pụọ ka ịtụkwasị onye na-ekwesịghị ntụkwasị obi obi nʼoge nsogbu dị. 20Dị ka onye na-eyipụ uwe nʼụbọchị oyi, dị ka vinigà a wụkwasịrị na soda, ka onye na-abụ abụ nye obi dị arọ dị. 21Ọ bụrụ na agụụ na-agụ onye iro gị, nye ya nri ka o rie, ọ bụrụ na akpịrị na-akpọ ya nkụ, nye ya mmiri ka ọ ṅụọ; 22nʼihi na ị ga-akpakwasị icheku ọkụ nʼisi ya, Nna anyị ga-akwụghachikwa gị ụgwọ. 23Ifufe si nʼugwu na-ebute mmiri ozuzo, ire nzuzo na-ebutekwa ihu iwe. 24Ọ ka mma ibi nʼotu akụkụ elu ụlọ karịa iso nwunye na-ese okwu biri nʼotu ụlọ. 25Dị ka mmiri jụrụ oyi nye mkpụrụ obi ike gwụrụ ka ozi ọma si nʼala dị anya dị. 26Dị ka isi iyi gbara uro maọbụ olulu mmiri merụrụ emerụ ka onye ezi omume nke na-ada nʼihu ndị ajọ omume dị. 27Ọ dịghị mma iri mmanụ aṅụ nke oke, otu a kwa ịchọ otuto nke onwe gị. 28Dị ka obodo e tipuru etipu nke a hapụrụ na-enweghị mgbidi ka onye na-enweghị njide nʼahụ mmụọ nke onwe ya dị.
