Mi eng' bukuit

Kalewenaik 24 FHB Father's Heart Bible™

Kiistoi 15% eng' kiy ne iale korook →
Bukuit

Teechei Utaatyet Koot

Teeet ak saruunet. Keteechei koot eng' utaatyet, ak but chiito ne po iman tisap ago ng'eetu kogeny. Mochige poiboiyet agobo but ne po puunyoot, ak mochige lotania ne le ma kingen ye ki ibei piik koba meet. Ineeti mbareetap sabibuk ne kaichut susweek.

Sura 24.

Amat koamjin ng'etkong' piik che yaacheen, ak amemach imi kobooto icheek, amu chopchei muguleldanywa koroomnateet, ak ng'alaali kutinnywa agobo nyalilda.

Keteechei koot eng' utaatyet, ak kegimitei eng' kaguiyet; ak eng' naet konyiitaat kooriik mogornatosyek tugul che po kamanuutyet ak che karaaran.

Nyiitaat chii ne utaat kimnateet, ak tesyin chii ne tinyei naet kamugennyi, amu eng' ing'omindet ne utaat imuuchi iyai pooryeet, ak punu katerteeret eng' ing'omik che chaang'.

Koi utaatyet kosiir abusandet; eng' kurgeet, ma tinyei ng'olyoot ne mwaei. Age tugul ne chobei koyai yaityet keguure ineendet chopchiindetap yaityet. Tengek kabwaatutigap abusandet, ak chombilindet ko ne kerere eng' piik.

Ngot inyaluli eng' sait ne po nyalilda, ko ming'in kimnateeng'ung'. Isaru che ki ibei meet, ak iriip che riichei kobwa ole kibarenoot. Ngot imwae, “Keero, ma kingen kiit ni,” ma ngen ne weigei muguleldo? Ma ngen ne riibei saboondang'ung'? Ak ma repaik chii age tugul ko uu yoeguk?

Weeriinnyu, am kumyat, amu myee, ak anyinyen rewootap kumyat eng' kuting'ung'. Ngen ile ko uu nooto kityo utaatyet eng' saboondang'ung'; ngot inyoor, ko mi peetuusyek che po let, ak ma kitilei kamang'unetap inyee.

Amesapchi, inyee kiptengegin, kap chii ne po imanda; amang'em ole imuung'ee, amu nganda koputyi chii ne po imanda konyil tisap, kong'eetei kogeny, ago riichei kiptengeginik eng' nyalilda.

Amaboiboi ye koputyi puundang'ung', ak amakagasegei muguleldang'ung' ye koriichkei, si mata koger Kwandanyo ak koma boiboi, ak kowal angeennyi kong'eetyi ineendet.

Amanereek agobo yaigap yaityo, ak amat koamjin ng'etkong' kiptengeginik, amu ma tinyei chii ne yaityo peetuusyek che po let; kipeti taitap kiptengeginik.

Weeriinnyu, iywei Kwandanyo ak laitoryat, ak amonamge ak che ng'eleljiin icheek, amu ng'eetei nyalildanywa eng' yooto, ak ng'o ne ngen ng'emisyet ne imuuchi koip icheek tugul aeng'u?

Kirwooget ne ma Tiytiy Piik

Chu kora ng'aleegap che utaatiin: Ma myee ye kipartoi piik eng' kirwooget. Age tugul ne leenji ne tinyei tengek, “Ma itinye tengek inyee,” kochuptoi ineendet pororyosyek ak konereekyi ineendet emoten, ago komyeeit che baoryanjini che tinyei tengek, ak koonjigei icheek kayaneet ne oo. Ko uu ng'ututet eng' kutit waloot ne po iman. Chopchigei poisyeng'ung' saang', ichopchi mbareeng'ung', ak let nooto iteech koong'ung'. Amegeer paoryat ne agaigai chiitap kokweng'ung' amu ma mi kingonateet; iberberisyee eng' kuting'ung'? Amemwa, “Ayae ineendet ko uu ye kayaewa; arepaik chiito ko uu ye kayai.” Ki alabat mbareetap chiito ne choriren, ak mbareetap sabibuk ne po chiito ne ma tinyei utaatyet, ak keero, kagorut katook komugul; ak kagotuchi susweek ng'wony, ak kagoil inetap koikyik. Yeityo ki ageer ak ki aindoi eng' muguleldanyu; ki ageer ak ki anyoor kaneetiset. Rwondo ne ming'in, ak ruiyet ne ming'in, ak tuiyetap euut ne ming'in si kemuung'ei, ak konyonun rerunet ko uu rebindet, ak rubeet ko uu chiito ne tinyei rotweet.