Songsihonei Chem Dangda

Chem lea hoba khümenbü. Chem che songsihonei leakei, hoba saopobü müt cheei ik takda, lausikei tou langda. Habü kho dangboueibü taktibü olinbü to alothedada, hoba müt shuong hailabü la leiyeibü chaloua “künei ho angekei” dogo laubü to alothedada. Sangei nyakbü semlüh yama cheei khübü tedühda.

Chapter 24.

Amaibü müt shuong to nyi tedüh, hoba haoen yoa kila temangsüh, aishanga haoeneibü maangponei ik shatyobü huon takda, hoba haoeneibü subüjabüa maangmau la lenda.

Songsihonei chem dangda, hoba hapbü ngebüei kho yaüda; hoba hapbüngebü danko khoeibü shemjang shuong kho namsek hoba maangamaibü nyaksinam pendouei shentia.

Songsido kibü müt hauei jakakei, hoba hapbüngebü kibü müt haoeibü seisihau kungaida, aishanga songsidobü damanchühbü danko nyi kaibü wapyobü wapyola thükda, hoba damanchühbü juongei thüksimin longda.

Songsihon kho ngoubü müt shanga yongko hauko kia; bakhüna, haoei lenlabü ai aki. Aoei amaibü kümla huon takda kho müt kho huon takbü dogo ngalabü. Ngoubü müteibü huon takbü kho shabü ki, hoba nyikubü kho müt shanga shalabü ki.

Thushed chaloua nyi semthetalonga, kaibü hau hanbü ki. Haila leian apbü shuong khümenshi, hoba haitishang to shiphaiyetbü shuong takashi. Nyi laualonga, “Chühashi, künei ho angekei,” maangpon webouei ho achühda lo? Kaibü soushou lombouei ho angeda lo? Hoba haoei müt pendou la haoeibü kümbü thüng pailetbü kulabü lo?

Kü shou, honei shauashi, aishanga kho maibü ki, hoba honei yantibü kho kaibü sembunga teikei. Songsihon kho kaibü soushou shanga haibütham ki dogo ngeashi; nyi kho hapalonga, loulabü kia, hoba kaibü maanglem adankhümlabü.

No amaibü müt, saopobü müteibü chem khulimbo tehaiyei; haoeibü haksoshang temauti, aishanga saopobü müt nyetnei phaiyetsikei, haoei nyibou loenlabü, lausikei amaibü shuong thusheda phaiyetlabü.

Kaibü dangbou phaiyetalonga teolin, hoba hao akühko hauenalonga kaibü maangpon teolinti, aingenyu seneibü Bouei kho chühan maangmaulabü, hoba haoeibü khauangbü hao ka sepeilabü.

Amaibü kümbü shuong shanga temaangmau, hoba amaibü shuong to tedüh, aishanga amaibü müt shanga loulabü aki; amaibü shuongeibü hantin thonlabü.

Kü shou, seneibü Bou hoba choba to hatashi, hoba haosi khulimbo lobü shuong yoa temeimei, aishanga haoeneibü thushed mangde loulabü, hoba haosi penyiei kümlabü leilubü kho aoei ngeda?

Theto Achühbü Matjem

Hibü shuong kei songsido kibü shuongeibü ngüh ki: Matjema theto chühbü kho maibü aying. Aoei shedbü müt to, “No shed akibü ki,” dogo laulaje, kho müt mütshuongei khüklauoklabü hoba phangshuongei huiletlabü, lausikei shedbü müt to shedtiyatibü shuong shanga mailabü, hoba haoen thükto haülabü yaang loulabü. Ngühmaanglanbü jongaibü kho sembung shepbo tegü ki. Maanga kaibü kümsilei lamleashi, kaibü sek jemetsangettiashi, hoba kho phaia kaibü chem dangashi. Ai ayingnyu kaibü lepbou khulimbo aukabü teying; nyi kaibü subüjabüa huonettila sai? Telau, “Haoei kü to kümbü tegü ngeikei hao to kümlabü; haoei kümbü shanga ngeikei müt kho la pailetbü kulabü.” Ngei haulohaushedbü müt sek aeto, hoba sensimaang akibü müt semlühlaak aeto danjung dankei, hoba chühashi, kho pendou jak angko shenkei; kao kho yamkabü pikshik angko khuilepbei, hoba khoeibü laang kümthang leiluan kikei. Kheijinei ngei chühan maanga damanchühkei; ngei hapbei hoba ditenbü sungletkei. Yep shisho, nyeketlou shisho, haksola shanga ik liko phobü shisho, hoba kongbü no thükto kokbü müt tegü loulabü, hoba mühbünou kho insiaubu lamlean kibü müt tegü loulabü.