Buddhi pora Ghor Bonai
Bonai diya aru bachai diya. Ghor tu gyan pora bonai, aru dharmik manuh saat bar giri kene bhi uthi jai. Dushman giri jai thaka te khushi hobole etu mana kore, aru jitia manuh ke morone ke loijai, amikhan najane koi kene bahana kora tu bhi mana kore. Jongol pora bhorti hoi juwa angur bari pora etu shikhai.
24 1Biya manuh khan ke suku nakoribi, aru tarkhan logot thakibole itcha nakoribi, 2kilemane tarkhan laga mon pora mara-mari bhabe, aru tarkhan laga oth pora digdar laga kotha koi ase.
3Buddhi pora ghor bona hoi, aru gyaan pora etu thir hoi; 4aru gyaan pora etu laga kamra khan sob daam thaka aru bhal dhun pora bhorta hoi.
5Buddhiman manuh takot pora bhorta ase, aru gyaani manuh tar laga takot bisi kore, 6kilemane buddhi laga salah pora tumi tumar lorai koribo pare, aru bisi salah diya manuh khan pora jit ahhe.
7Murkho manuh karne buddhi bisi untcha ase; dorja te, tar kobole eku nai. 8Kun pora biya kaam koribole bhabe tar ke biya upai kora manuh koi dibo. 9Murkho laga upai paap ase, aru thatta kora manuh ke manuh khan ghin kore.
10Jodi digdar laga homoi te tumi komjur hoi jai, tumar takot chutu ase. 11Mori bole loi ja thaka khan ke bachai dibi, aru mara jabole giri ja khan ke rukhai lobi. 12Jodi tumi koi, “Sabi, amikhan etu jana nai,” mon ke jukhi loa Jon pora etu nabuje naki? Tumar atma ke rukhi thaka Jon pora etu najane naki? Aru Tar pora manuh ekjon-ekjon ke tar laga kaam hisab te badla nadibo naki?
13Moi laga putro, mou khabi, kilemane etu bhal ase, aru mou-chak laga chuwa tumar jiba te mitha lage. 14Jani lobi buddhi bhi tumar atma karne eneka he ase; jodi tumi etu pai, ahhiba din ase, aru tumar asha kati nadibo.
15He biya manuh, dharmik manuh laga ghor birodh te lukai nathakibi; tar aram kora jaga ke nosto nakoribi, 16kilemane dharmik manuh sat-bar giri bhi, tai aru uthe, kintu biya manuh khan bipod te giri jai.
17Tumar dushman giri ja homoi te khusi nakoribi, aru tai thokar khai ja homoi te tumar mon ke khushi hobole nadibi, 18nahole amar Pitri etu dikhi kene khushi napabo, aru Tar khong tai pora hatai dibo.
19Biya kaam kora khan nimite chinta nakoribi, aru biya manuh khan ke suku nakoribi, 20kilemane biya manuh karne ahhiba din nai; biya manuh laga saki bujai dibo.
21Moi laga putro, amar Pitri aru raja ke bhoi koribi, aru tarkhan birodh te uthi ja khan logot namilibi, 22kilemane tarkhan laga bipod achanak uthibo, aru duijon pora ana nosto tu kun jane?
Mukh Nachai Kene Bichar
23Eitu khan bhi buddhiman khan laga kotha ase: Bichar te mukh chai kene kora bhal nohoi. 24Kun pora dushi manuh ke, “Tumi dosh nai,” koi, tai ke manuh khan shrap dibo aru desh khan tai ke ninda koribo, 25kintu dushi manuh ke sajai diya khan karne bhal hobo, aru bhorpur asirbad tarkhan uporte ahhibo. 26Hosa jawab tu oth te chuma diya nisena ase. 27Bahar te tumar kaam taiyar koribi, tumar kheti khan thik koribi, aru etu pichete tumar ghor bonabi. 28Eku karon chara tumar ghor-usor manuh birodh te gawah nahobi; tumi tumar oth pora thogabo naki? 29Eneka nakobi, “Tai moi ke kora nisena moi bhi tai ke koribo; tai ki korise, etu laga badla moi hei manuh ke dibo.” 30Moi ekjon alsi manuh laga kheti usor pora paar hoise, buddhi nathaka ekjon laga angur bari usor pora, 31aru ta te, sob kata pora bhorta hoi jaise; mati tu biya ghas pora dhaki jaise, aru etu laga pathor laga deal bhangi jaise. 32Titia moi saise aru etu mon te rakhise; moi dikhise aru sikhani loise. 33Olop ghum, olop joki thaka, olop aram koribole hath gutai rakha, 34aru goribi chor nisena tumar uporte ahhibo, aru komti thaka hathiar loa manuh nisena ahhibo.