Chānsam 22

22 ¹Kashāng makhavātwui mahutle aming kaphā chi khuitha̱lu, kala lupāsā lah sinawui vanga ngahānkhangai phāmei. ²Kashānga kala kachāma rārāda zatkasa; ithumwui Avā hi athum saikorawui kasaana. ³Kalākashi chi thangkhama mina theida, akhalatta yāmngathuma; kha ningpai eina ningkapaina chota. ⁴Khangahui kala ithumwui Avāli khangacheewui sāman hi kashāng, khayākakā kala kharingna. ⁵Kha̱khamakhei miwui shongfali ka̱shāt kala khalen leili; akhalattawui mirin khāmshapa china chiwui eina tāda leira. ⁶Nao chi azatkhavai shongfali tamlu, chieina a kasāng tharanla chiwui eina mapākthuimara. ⁷Kashāngana kachāma mibingtungli mungra, kala kachishuta china kashukawui raonao sāra. ⁸Makhamashung khayao mi china kalāshāt hātkhuira, kala awui malungkhavātwui lijei nguithuihaora. ⁹Hānkaphā mik kakā a chi sokhamina, kaja ana awui kashakazā kachāmali ngayarmi. ¹⁰Mana̱shikazārali kashamhaolu, chieina nganang chi awui eina thuihaora; kharar kala mana̱kashi tanghaora. ¹¹Wuklung tharzā leishi kala leishilak eina hānga a china, awunga chi awui ngasotnao sāra. ¹²Ithumwui Avāwui mikna aworli phārimi, kha ana yorkazāwui tui ngasuitā ngasaka. ¹³Chāngshena hānga, "Kayāngli kazingkha̱ lei! Chānreili ili shaothatra!" ¹⁴Kapā-khayong sha̱naowui khamor hi kathuka chomna; ithumwui Avāna malungvāthaowa a china chiwui alungli pitāra. ¹⁵Mangkhama̱ hi naoshinaowui ningli manhaida lei, kha kharākwui lijeina chi tākta kashamshokra. ¹⁶Kachāmali rekakhareka akhalatta shāng khavai, lah kashāngali khami china, kachām maningla samphangra.

Kaphā eina Nganālu

¹⁷Thangkhama mibingwui tui ningsanglak eina nganālu, kala iwui theithangkhameili ningsanglu, ¹⁸kaja nana chi nawui lungli mayonda, saikora nawui morchaili ngarānda leiakha chi ningyāngkhaung ngasakra. ¹⁹Nawui shitkasang ithumwui Avāli leikhavai, aja ina nali tangda chi chitheimihaira. ²⁰Hāngkachithei kala theikakhuiwui chānsam thumrā ina nali kapikahai maleimalā, ²¹khamashung kala mashun chi nali tamchithei khavai, nali kachihovābingli mashun tui nana ngahānkā khavai maningmalā?

²²Kachāma mili a chām china vang eina mangaponalu, lah kachotabingli ngaveili masākachupalu, ^a a v22 Keinungwui ngavei chi achālakhawui keinungbingli bicharwui tuikashok kala mibingwui otsak shokkahaiwui pamna. ²³kaja ithumwui Avāna athumwui angalang theira, kala athumli kaponabingwui mirin ngaponra.

²⁴Malungvāt kahai mili ngasotnao masāalu, kala malungthuikazar mili ngarumda mavāalu, ²⁵chi maningakha nana awui shongfa tamkhuida nakhalatta khalenli yonngasakra.

²⁶Khangashit kasā, leimanwui vang shākhi nganingmibingwui ngachaili akha masaalu. ²⁷Nana runkhavai khikha maleiakha, khisāda nawui pet nawui azingli eina khuithuiranglakhala?

²⁸Navā ngarāna sahairakasā achālakhawui thari maphuralu.

²⁹Awui otli kashapa mi akha nana theila? Ana awungabingwui mangāli nganingra; ana shairanra̱ mibingwui mangāli manganingmara.