Hikima ga Mawadata da Matalauta

Suna mai kyau ya fi dukiya nauyi, yayin da mawadata suke mallakar matalauta, mai cin bashi kuma bawan mai ba da bashi ne. A tsakiya murya ta canja zuwa ta malami mai miƙa karin magana talatin: kada ka yi wa matalauci fashi domin shi matalauci ne, kada kuma ka yi abota da mai saurin fushi.

Babi na 22.

Ya fi kyau a zaɓi suna mai kyau fiye da arziki mai yawa, farin jini kuma ya fi azurfa da zinariya. Mawadaci da matalauci sukan haɗu wuri ɗaya; Ubanmu ne Mahaliccinsu duka. Mai hankali yakan ga hadari yă ɓuya, amma marasa azanci sukan ci gaba su sha wahala. Sakamakon tawali'u da tsoron Ubanmu arziki ne da daraja da rai. Ƙayayuwa da tarko suna kan hanyar mai karkata; wanda yake kiyaye ransa yakan yi nesa da su. Ka horar da yaro a hanyar da ya kamata yă bi, har sa'ad da ya tsufa ba zai rabu da ita ba. Mawadaci yakan yi mulki a kan matalauci, mai aron bashi kuma bawa ne ga mai ba da rance. Duk wanda ya shuka rashin adalci zai girbi masifa, sandar fushinsa kuma za ta ƙare. Duk mai idon kyauta zai sami albarka, gama yakan raba abincinsa da matalauta. Ka kori mai ba'a, sa'an nan faɗa zai tafi tare da shi; gardama da zagi kuma za su daina. Duk wanda yake ƙaunar tsabtar zuciya yake kuma magana da alheri, sarki zai zama abokinsa. Idanun Ubanmu suna tsaron sani, amma yakan kā da maganar mayaudari. Rago yakan ce, “Akwai zaki a waje! Za a kashe ni a tituna!” Bakin haramtattun mata rami ne mai zurfi; wanda ya jawo fushin Ubanmu zai faɗa cikinsa. Wauta tana daure a zuciyar yaro, amma sandar horo takan kore ta nesa. Duk wanda yake danne matalauci domin yă azurta kansa, ko yake kyauta ga mawadaci, zai kai ga talauci kawai.

Ka Saurara da Kyau

Ka saurara da kyau ga maganar masu hikima, ka kuma mai da hankalinka ga sanina, gama zai yi daɗi in ka kiyaye su a cikinka, in dukansu suna a shirye a leɓunanka. Domin dogaronka yă kasance ga Ubanmu, na sanar da kai su yau, har gare ka. Ashe, ban rubuta maka karin magana talatin na shawara da sani ba, domin in koya maka abin da yake daidai da gaskiya, domin ka iya ba da amsar gaskiya ga waɗanda suka aike ka?

Kada ka yi wa matalauci fashi domin shi matalauci ne, ko ka murƙushe wanda ake danniya a ƙofar gari, ^a gama Ubanmu zai kāre maganarsu, zai kuma ƙwace ran waɗanda suka washe su.

Kada ka yi abota da mutum mai saurin fushi, kada kuma ka tafi tare da mai zafin rai, don kada ka koyi halayensa ka kuma sa kanka cikin tarko.

Kada ka zama ɗaya daga cikin masu ba da lamuni, waɗanda suke ɗaukar nauyin biyan basussuka. In ba ka da abin da za ka biya da shi, don me za a ƙwace gadonka daga ƙarƙashinka?

Kada ka matsar da dutsen iyakar dā wanda kakanninka suka kafa.

Ka ga mutum gwanin aikinsa? Zai tsaya a gaban sarakuna; ba zai tsaya a gaban talakawa ba.