Mga Panultihon 22

22 ¹Ang maayong ngalan angayng pilion kay sa dagkong bahandi, ug ang pabor mas maayo pa kay sa plata o bulawan. ²Ang dato ug ang kabos nagkatagbo; ang atong Amahan mao ang Magbubuhat nilang tanan. ³Ang maalamon makakita sa katalagman ug motago, apan ang walay alamag mopadayon ug mag-antos sa sangpotan. ⁴Ang ganti sa pagpaubos ug sa pagkahadlok sa atong Amahan mao ang bahandi ug dungog ug kinabuhi. ⁵Mga tunok ug mga lit-ag anaa sa dalan sa mga baliko; ang nagbantay sa iyang kalag magpahilayo gikan niini. ⁶Bansaya ang bata sa dalan nga angay niyang pagalaktan, ug bisan matigulang na siya dili siya motipas gikan niini. ⁷Ang dato nagmando sa kabos, ug ang nagahulam ulipon sa nagapahulam. ⁸Si bisan kinsa nga magpugas ug inhustisya moani ug katalagman, ug ang bunal sa iyang kapungot mapakyas. ⁹Ang tawong mahinatagon panalanginan, kay iyang gipakig-ambit ang iyang tinapay sa kabos. ¹⁰Abuga ang bugalbugalon, ug mohawa ang panagbingkil; mohunong ang panaglalis ug ang pagpanamastamas. ¹¹Si bisan kinsa nga nahigugma sa putli nga kasingkasing ug nagasulti nga mabination, ang hari mahimong iyang higala. ¹²Ang mga mata sa atong Amahan nagabantay sa kahibalo, apan iyang ginapukan ang mga pulong sa maluibon. ¹³Ang tapulan nagaingon, “Adunay liyon sa gawas! Pagapatyon ako diha sa kadalanan!” ¹⁴Ang baba sa gidili nga mga babaye usa ka lawom nga gahong; si bisan kinsa nga gikapungtan sa atong Amahan mahulog niini. ¹⁵Ang kabuang nahigot diha sa kasingkasing sa bata, apan ang bunal sa pagbadlong mag-abog niini sa halayo. ¹⁶Si bisan kinsa nga nagadaugdaog sa kabos aron maadunahan, o nagahatag sa dato, moabot lamang sa kawalad-on.

Pamati Pag-ayo

¹⁷Patalinghogi pag-ayo ang mga pulong sa maalamon, ug ibutang ang imong kasingkasing sa akong kahibalo, ¹⁸kay makalilipay kini kon tipigan mo sila sa imong sulod, kon andam silang tanan diha sa imong mga ngabil. ¹⁹Aron ang imong pagsalig anaa sa atong Amahan, akong gipaila kini kanimo karong adlawa, bisan kanimo. ²⁰Wala ba ako magsulat alang kanimo ug katloan ka panultihon sa tambag ug kahibalo, ²¹aron tudloan ka sa matarong ug sa matuod, aron makahatag ka ug tinuod nga tubag niadtong nagsugo kanimo?

²²Ayaw pangawati ang kabos tungod kay siya kabos, o daugdaogon ang sinakit diha sa ganghaan, ^a a v22 Ang ganghaan sa siyudad mao ang dapit diin ginahusay ang mga panaglalis sa balaod ug ang mga pakiglabot sa publiko didto sa karaang mga lungsod. ²³kay ang atong Amahan maoy molaban sa ilang katungod ug moilog sa kinabuhi niadtong nangawat kanila.

²⁴Ayaw pakighigala sa tawo nga masuk-anon, ug ayaw pagkuyog sa tawong init ug ulo, ²⁵kay tingali makakat-on ka sa iyang mga batasan ug mahiktan mo ang imong kaugalingon sa lit-ag.

²⁶Ayaw pag-apil niadtong naghatag ug pasalig, niadtong nagpasiguro sa mga utang. ²⁷Kon wala kay ikabayad, nganong pagakuhaon man ang imong higdaanan gikan sa ilalom nimo?

²⁸Ayaw balhina ang karaang bato nga utlanan nga gipahimutang sa imong mga katigulangan.

²⁹Nakita mo ba ang tawo nga batid sa iyang buluhaton? Mobarog siya atubangan sa mga hari; dili siya mobarog atubangan sa mga ordinaryong tawo.