Utaatyet agobo Mogornyot ak Poorto
Siirei kainet ne myee mogornateet, ago laitorani che po iman pooryeet, ak koek chii ne iyaaksei otwogindetap ne lelji. Kweenutap kayaneet kowalgei kutit kochoor kaneetindet ng'aleek sosom: amenak pooryeet amu pooryeet ineendet, ak amegu chorwetap chii ne angaang.
22 1Kileweni kainet ne myee kosiir mogornateet ne oo, ak komyee myeeindo kosiir shekelisyek anan thahabu. 2Tuiyei chii ne mogoryot ak poorto togeennyi; Kwandanyo ko ne toi icheek tugul. 3Keere chii ne ng'oom ng'oiyondit ak kouny, ago che matinyei kiy kobendi tai ak kotun. 4Melektap lititindo ak iwetap Kwandanyo ko mogornateet ak teegisto ak sabeet. 5Mi katook ak mesteet eng' ooreetap che mastoi; ne riibe saboondanyi koloo kobun icheek. 6Neet lakweet eng' ooreet ne nyolu kowe, ak agot ye kagoek boiyot koma istoegei kobun. 7Laitorani chii ne mogoryot poorto, ak koek ne iyaaksei otwogindetap ne lelji. 8Ne miinei yaityet koges nyalilda, ak kopegu kirokto ne po angeennyi. 9Ne tinyei kong' ne aiyebindo koberuuroti, amu kopagakyi poorto amitwogikyik. 10Oon chii ne sasei, si kowe suryet kobootonyi; ak kopegu pooryeet ak abusnateet. 11Ne chamei muguleldo ne tiliil ak kong'alaali eng' myeeindo koek laitoryat chorwennyi. 12Riibei konyegap Kwandanyo naet, ago kowiirchi ng'aleegap chii ne ma iman. 13Mwaei chii ne choriren kole, “Mi ng'etundo saang'! Kibarwo eng' ortinwek!” 14Kutitap kwonyiik che eetaatin ko keriinget ne loo; ne kochoor angeetap Kwandanyo kobut ineendet. 15Rataat abusnateet eng' muguleldap lakweet, ago oone kirokto ne po katigonet koba loo. 16Ne sastaei poorto si komogornogei, anan ne goochi chii ne mogoryot, kobwonji rubeet kityo.
Igas Komyee
17Igas komyee ng'aleegap che ng'oom, ak inde muguleldang'ung' eng' naennyu, 18Amu ko kogasetapkei ngot iriip icheek eng' ii, ngot kotoretoten tugul eng' kuting'ung'. 19Si komi mang'uneng'ung' eng' Kwandanyo, kaaboorchin icheek rani, agot inyee. 20Maagoreti inyee ng'aleek somokotam che po rwooget ak naet, 21Si aneetiin imanit ak iman, si iwolji eng' iman che kiyoogin?
22Amat irebe poorto amu poorto ineendet, anan inyaliil ne nyalili eng' kurgeet, a a v22 Kurgeetap nganaseet ko kiyae kirwoogik ak ng'aleechigap piik tugul eng' nganasoosyek che po keny. 23Amu kobesyei Kwandanyo ng'aleekwak ak korebe saboondap che rebei icheek.
24Amat itunchi chii ne tinyei angeet, ak amat iwe kobooto chii ne nereech, 25si ma ineetkei ortinwekyik ak iyem keigei eng' mesteet.
26Amat iek age eng' che goitoi kaarorunet, che nam kaarorunet ne po lelutik. 27Ngot mo itinye kiit ne ityage, amu nee si koip chii kaptebeennyu eng' ole mi?
28Amat inaktoe kiwoteet ne po keny ne ki inde kwandaguk.
29Igeere chii ne ng'oom eng' poisyennyi? Kotonone taitap laitorinik; koma tonone taitap piik che po otwoknot.