Sirib para kadagiti Nabaknang ken Napanglaw

Ad-adda ti timbang ti nasayaat a nagan ngem ti kinabaknang, bayat nga agturay dagiti nabaknang kadagiti napanglaw ket ti agutang ket adipen ti nangutangan. Iti tengnga, agbaliw ti timek a kas maestro nga mangited iti tallopulo a sasao: dikam kamkamaen ti sanikua ti napanglaw gapu ta napanglaw isuna, ken dika makigayyem iti napartak nga agpungtot.

Kapitulo 22.

Nasaysayaat a piliem ti naimbag a nagan ngem iti dakkel a kinabaknang, ket nasaysayaat ti pabor ngem iti pilak wenno balitok. Agtitipon ti nabaknang ken napanglaw; ni Amatayo ti Nagaramid kadakuada amin. Makita ti nasiput ti peggad ket agtaguob, ngem agtultuloy dagiti awanan ammo ket pagbayadanda. Kinabaknang ken dayaw ken biag ti gunggona ti kinapakumbaba ken ti panagbuteng ken Amatayo. Adda dagiti tunek ken silo iti dalan ti naliko; ti mangbantay iti kararuana ket adayo kadagita. Isuro ti ubing iti dalan a rumbeng a papananna, ket uray no lakayen, saanto a pumanaw iti dayta. Turayen ti nabaknang dagiti napanglaw, ket adipen ti agutang iti mangipautang kenkuana. Ti agmula iti kinaawan-hustisia ket mangaani iti didigra, ket mapukawto ti sarukod ti pungtotna. Mabendisionanto ti naparabur ti matana, ta ibingayna ti tinapayna kadagiti napanglaw. Pagtalawem ti mangumsi, ket kadua a pumanaw ti riri; agsardengto ti panagsusupiat ken pananglais. Ti mangayat iti nadalus a puso ken napintas ti pagsasao, ti ari ti gayyemna. Bantayan dagiti mata ni Amatayo ti pannakaammo, ngem ibaliktadna dagiti sasao ti mamalsua. Kuna ti tamak, “Adda leon iti ruar! Mapapatayakto kadagiti kalsada!” Nauneg nga abut ti ngiwat dagiti naiparit a babbai; ti makaawat iti unget ni Amatayo, matumbanto iti dayta. Naigalut iti puso ti ubing ti kinamaag, ngem papanawen ti sarukod ti disiplina iti adayo. Ti mangirurumen kadagiti napanglaw tapno bumaknang, wenno mangted kadagiti nabaknang, kinapanglaw laeng ti sumangpetto kenkuana.

Dengngenyo a Naimbag

Dengngem a naimbag dagiti sasao dagiti masirib, ket itukonmo ti pusom iti pannakaammok, ta makaay-ayo no taginayonem dagitoy iti unegmo, no nakasaganada amin iti bibigmo. Tapno ni Amatayo ti pagtalkanmo, impakaammok dagitoy kenka ita nga aldaw, uray kenka. Saan kadi a insuratko para kenka ti tallopulo a sasao iti balakad ken pannakaammo, tapno isuronka iti umno ken pudno, tapno makasungbatka iti pudno kadagiti nangibaon kenka?

Dika takawan ti napanglaw gapu ta napanglaw isuna, wenno dika dadaelen ti nakaparigat idiay ruangan, ^a ta ni Amatayo ti mangsaluad iti kasoda, ket ikkatenna ti biag dagidiay mangtakaw kadakuada.

Dika makigayyem iti lalaki a naunget, ken dika makikadua iti lalaki a napardas nga agpungtot, ta no saan, adalemto dagiti wagasna ket masilo ti bagim iti silo.

Dika agbalin a maysa kadagidiay mangipaay iti prenda, dagidiay agbalin a paggarantia kadagiti utang. No awan ti pagbayadam, apay a maala ti katremmo manipud iti babaen ti bagim?

Dika ikkaten ti nagkauna a bato a beddeng nga insaad dagiti ammam.

Makitam kadi ti lalaki a nalaing iti trabahona? Agtakderto iti sangoanan dagiti ari; saanto nga agtakder iti sangoanan dagiti kadawyan a tattao.