ምሳሌ 22

22 ¹መልካም ስም ከብዙ ሀብት ይልቅ ይመረጣል፤ ሞገስም ከብርና ከወርቅ ይሻላል። ²ሀብታሙና ድኻው አንድ ላይ ይገናኛሉ፤ የሁሉም ፈጣሪ አባታችን ነው። ³ብልኅ ሰው አደጋን አይቶ ይሸሸጋል፤ ተላላ ግን እያለፈ ዋጋ ይከፍላል። ⁴የትሕትናና አባታችንን የመፍራት ዋጋ ሀብት፣ ክብርና ሕይወት ነው። ⁵በጠማማው ሰው መንገድ ላይ እሾኽና ወጥመድ አለ፤ ነፍሱን የሚጠብቅ ግን ከእነርሱ ይርቃል። ⁶ልጅን ሊሄድበት በሚገባው መንገድ አሠልጥነው፤ በሸመገለም ጊዜ ከእርሱ ፈቀቅ አይልም። ⁷ሀብታሙ ድኻውን ይገዛል፤ ተበዳሪውም ለአበዳሪው ባሪያ ነው። ⁸ግፍን የሚዘራ መከራን ያጭዳል፤ የቍጣውም በትር ይሰበራል። ⁹ቸር ዐይን ያለው ይባረካል፤ ከእንጀራው ለድኻ ያካፍላልና። ¹⁰ፌዘኛውን አባርር፤ ጠብም ከእርሱ ጋር ይወጣል፤ ክርክርና ስድብም ያከትማል። ¹¹ንጹሕ ልብን የሚወድድና በጸጋ የሚናገር ሰው ንጉሡን ወዳጁ ያደርጋል። ¹²የአባታችን ዐይኖች ዕውቀትን ይጠብቃሉ፤ የከዳተኛውን ቃል ግን ይገለብጣል። ¹³ሰነፍ ሰው፣ “በውጭ አንበሳ አለ! በመንገድ ላይ እገደላለሁ!” ይላል። ¹⁴የአመንዝራ ሴቶች አፍ ጥልቅ ጕድጓድ ነው፤ የአባታችንን ቍጣ የሚቀሰቅስ በውስጡ ይወድቃል። ¹⁵ሞኝነት በልጅ ልብ ታስራለች፤ የተግሣጽ በትር ግን ከእርሱ ያርቃታል። ¹⁶ለመክበር ሲል ድኻውን የሚጨቍን ወይም ለሀብታሙ የሚሰጥ ወደ ድኽነት ብቻ ይደርሳል።

በጥንቃቄ አድምጥ

¹⁷የጠቢባንን ቃል በጥንቃቄ አድምጥ፤ ልብህንም ለዕውቀቴ ስጥ፤ ¹⁸በውስጥህ ብትጠብቃቸው ደስ ያሰኝሃልና፤ ሁሉም በከንፈርህ ላይ ዝግጁ ቢሆኑ። ¹⁹እምነትህ በአባታችን ላይ እንዲሆን፣ ዛሬ ለአንተ፣ ላንተው አስታወቅኋቸው። ²⁰የምክርና የዕውቀት ሠላሳ ብሂሎች አልጻፍሁልህምን? ²¹ትክክልና እውነት የሆነውን እንዳስተምርህ፣ ለላኩህም ሰዎች እውነተኛ መልስ እንድትሰጥ አይደለምን?

²²ድኻ ስለሆነ ድኻውን አትዝረፍ፤ ችግረኛውንም በበር ላይ አትጨቍን፤ ^a a v22 በጥንታዊ ከተሞች የከተማው በር ፍርድ የሚሰጥበትና የሕዝብ ጒዳዮች የሚፈጸሙበት ስፍራ ነበር። ²³አባታችን ጒዳያቸውን ይሟገታልና፤ የሚዘርፏቸውንም ነፍሳቸውን ይዘርፋል።

²⁴ቍጡ ከሆነ ሰው ጋር አትወዳጅ፤ ባለ ንዴት ከሆነ ሰውም ጋር አትሂድ፤ ²⁵መንገዱን ትማራለህና፤ ራስህንም በወጥመድ ታጠልቃለህ።

²⁶መያዣ ከሚሰጡ ሰዎች አንዱ አትሁን፤ ለዕዳ ዋስ ከሚሆኑት አትቈጠር። ²⁷የምትከፍለው ከሌለህ፣ መኝታህ ከሥርህ ለምን ይወሰዳል?

²⁸አባቶችህ የተከሉትን የቀድሞ የድንበር ድንጋይ አታናውጥ።

²⁹በሥራው የተካነ ሰው ታያለህን? እርሱ በነገሥታት ፊት ይቆማል፤ በተራ ሰዎች ፊት አይቆምም።