ምሳሌ 21

21 ¹የንጉሡ ልብ በአባታችን እጅ ያለ የውሃ ፈሳሽ ነው፤ ወደ ወደደውም ሁሉ ያዘነብለዋል። ²የሰው መንገድ ሁሉ በራሱ ዓይን ቅን ይመስላል፤ አባታችን ግን ልብን ይመዝናል። ³ጽድቅንና ፍትሕን ማድረግ ከመሥዋዕት ይልቅ አባታችንን ደስ ያሰኘዋል። ⁴የትዕቢት ዓይኖችና የኵራት ልብ፣ የክፉዎች መብራት፣ ኀጢአት ናቸው። ⁵የትጉህ ሰው ዕቅድ በእርግጥ ወደ ብዛት ይመራል፤ የሚቸኩሉ ሁሉ ግን ወደ ድኽነት ይደርሳሉ። ⁶በሐሰተኛ አንደበት ሀብት ማካበት የሚያልፍ ጢስ፣ ሞት የሚያስከትል ወጥመድ ነው። ⁷የክፉዎች ዐመፅ ጎትቶ ይወስዳቸዋል፤ ፍትሕን ለማድረግ ፈቃደኛ አይደሉምና። ⁸የበደለኛ መንገድ ጠማማ ነው፤ የንጹሕ ሰው ምግባር ግን ቅን ነው። ⁹በጣሪያ ጥግ መኖር ከምትጨቃጨቅ ሚስት ጋራ በአንድ ቤት ከመኖር ይሻላል። ¹⁰የክፉ ሰው ነፍስ ክፋትን ትመኛለች፤ ባልንጀራውም በዓይኑ ምሕረትን አያገኝም። ¹¹ፌዘኛ ሲቀጣ፣ የዋሁ ጥበበኛ ይሆናል፤ ጠቢብ ሲገሠጽ፣ ዕውቀትን ያገኛል። ¹²ጻድቁ አባታችን የክፉዎችን ቤት ይመለከታል፤ ክፉዎችንም ወደ ጥፋት ያወርዳቸዋል። ¹³ለድኻ ጩኸት ጆሮውን የሚደፍን እርሱ ራሱ ይጮኻል፤ ምላሽም አያገኝም። ¹⁴በስውር የተሰጠ ስጦታ ቍጣን ያበርዳል፤ በልብስ ውስጥ ተሸጒጎ የተሰጠ ጉቦም ብርቱን ቍጣ ያረጋጋል። ¹⁵ፍትሕ ሲፈጸም፣ ለጻድቅ ደስታ ነው፤ ለክፉ አድራጊዎች ግን ድንጋጤ ነው። ¹⁶ከማስተዋል መንገድ የሚስት ሰው በሙታን ጉባኤ ያርፋል። ¹⁷ተድላን የሚወድ ይደኻል፤ የወይን ጠጅንና ዘይትን የሚወድ ከቶ አይከብርም። ¹⁸ክፉዎች ለጻድቃን ቤዛ ይሆናሉ፤ ከዳተኞችም ለቅኖች ይሆናሉ። ¹⁹በምድረ በዳ ከምትጨቃጨቅና ከምታጉረመርም ሚስት ጋራ ከመኖር መኖር ይሻላል። ²⁰ውድ ሀብትና ዘይት በጠቢብ ሰው ቤት ውስጥ አለ፤ ሞኝ ግን ያለውን ሁሉ ይበላል። ²¹ጽድቅንና ታማኝ ፍቅርን የሚከታተል ሕይወትን፣ ጽድቅንና ክብርን ያገኛል። ²²ጠቢብ ሰው የኀያላንን ከተማ ይወጣል፤ የታመኑበትንም ምሽግ ያፈርሳል። ²³አፉንና አንደበቱን የሚጠብቅ ነፍሱን ከመከራ ይጠብቃል። ²⁴“ፌዘኛ” የሚባለው ትዕቢተኛና እብሪተኛ፣ በታላቅ ድፍረት የሚሠራ ሰው ስም ነው። ²⁵የሰነፍ ሰው ምኞት ትገድለዋለች፤ እጆቹ መሥራትን እምቢ ብለዋልና። ²⁶ቀኑን ሙሉ ምኞቱ እየጨመረ ይሄዳል፤ ጻድቅ ግን ይሰጣል፤ አይከለክልም። ²⁷የክፉ ሰው መሥዋዕት አስጸያፊ ነው፤ በክፉ ሐሳብ ሲቀርብማ እንዴት ይበልጥ! ²⁸ሐሰተኛ ምስክር ይጠፋል፤ የሚያዳምጥ ሰው ግን ጸንቶ ይመሰክራል። ²⁹ክፉ ሰው ፊቱን ያደነድናል፤ ቅን ሰው ግን መንገዱን ያስተውላል። ³⁰በአባታችን ፊት ሊቆም የሚችል ጥበብ፣ ማስተዋል ወይም ምክር የለም። ³¹ፈረስ ለጦርነት ቀን ይዘጋጃል፤ ድል ግን የአባታችን ነው።