Thüksimin kho seneibü Bou shangabü ki
Matjem hoba mühsinou shanga. Saopobü hoba ngühmai kümbü kho lembüsabü khantoje seneibü Bou la aei maibou ki, hoba shalebü to ngüh ekan kibouei jembü ngek tegü jongsak ahaplabü. Mühsinouei haushedbü müt kho satda. Nyibou ho le laukei, ngüh kümbü yaksa yoa chem che yoa kibü khantoje chemdak chemnyeka kibü kho maibou dogo.
21 1Choba maangpon kho seneibü Bou ika dei shumang ki; hao pienmangsühbüa haoei kho sepeida. 2Müt wekoeibü lamnyu pendou haoeibü nyeka saopobü chühenda, lausikei seneibü Bouei maangpon damanchühda. 3Saopobü hoba ngühmai kümbü kho lembüsabü khantoje seneibü Bou la maibou ki. 4Yonglam lilibü nyek hoba lilibü maangpon— amaibü shuongeibü wanthung—shabü ki. 5Ikjai kümbü müteibü dambü kho maimaitham phenganyenga louada, lausikei tongde kümbü pendou kho shalebü la yeilabü. 6Amlangbü lishangei nyaksinam pailetbü kho longche kibü hak tegü, haila mubü sung ki. 7Amaibü shuongeibü ik shatyobüei haoen üpyoko haulabü, aishanga haoenei ngühmai kümla maang üangda. 8Shabü kibü müteibü lam kho khüpbülangbü ki, lausikei hinseibü shuongeibü kümsilei kho saopobü ki. 9Chemdak chemnyeka kibü kho, ngüh hoba maangshat juongbü yaksa yoa chem che yoa kibü khantoje maibou ki. 10Amaibü shuongeibü soushouei amaibü mangsühda; haoeibü lepbou to haoeibü nyeka onou ahapda. 11Khükbou to shedsitiaje, maanglanbü shuong songsido hapda; songbüdobü shuong thungeiko aplaje, haoenei hapbüngebü pailetlabü. 12seneibü Bou, Saopobou kho, amaibü shuongeibü chem chühenda hoba amaibü shuong tuongtikulabü. 13Shalebü ngekbü to nou shuthela müt kho, haokei ngeklabü lausikei jongaibü ahaplabü. 14Huphanga kubü jongsakei ange haksotida, hoba besa che neisimei maanga huphanga sungbaan hau kibü maangshat haksotida. 15Ngühmai matjema kümlaje, kho saopobü shuong la olinbü ki lausikei amaibü kümbü shuong la hatbümok ki. 16Ditenbü lam ka ayingbü to ohaubü müt kho, haibü shuongeibü leishaibüa maanglemlabü. 17Olinbü to sanoubou kho shalebü la yeilabü; ih hoba onang to sanoubou kho ladangkei keibü ayeilabü. 18Amaibü shuong kho saopobü shuong shanga angnam yeilabü, hoba lepbolangbü shuong kho maang tangbü shuong shanga yeilabü. 19Yamkabü kaodaka kibü kho, ngüh hoba maangshat juongbü yaksa yoa kibü khantoje maibou ki. 20Songbüdobü müteibü chema namsek peisilei hoba onang ki, lausikei ngoubü müteibü hao kibü pendou suian apda. 21Saopobü hoba üeisanou to lang kibou kho, langkei, saopobü hoba nyenhang phetphanlabü. 22Songbüdobü müteibü hau kibü shuongeibü sangnyu to angan lekei, hoba haoenei maanglembü lapheishon leilutikulabü. 23Haoeibü ngühang hoba lishang to lombou kho, haoei lolo khonsak ka püetlabü. 24“Khükbou” kho lilibü hoba yonglambü, hatlamoklabü sekokbü kümbou nameibü ki. 25Haulo haushed müteibü mangsühbü kho hao haitida, aishanga haoeibü ikei kümsilei kümla maang üangda. 26Chalou angbüa mangsühbü longda, lausikei saopobü shuongei kuda hoba atüpbuda. 27Amaibü shuongeibü lembü kho mangsenlabü— amaibü maangponei künlaje kho aeibou mangsenlabü. 28Amlangbü aukabü kümbou maulabü, lausikei ditbü müt kho ponpen shanga aukabü kulabü. 29Amaibü müteibü haoeibü neikhu kaangtida, lausikei maang tangbü müteibü haoeibü lamnyu to damanchühda. 30Songsihon, ditenbü ayingsi dambü aikei seneibü Bou khulimbo lola thükkei aying. 31Wapyobü chalou shanga koli lamlean kümda, lausikei thükbü kho seneibü Bou shangabü ki.
