Kupembera Ndi kwa Baba wathu
Kulungama na kufuna kwa thupi. Kucita pyakulungama kunakomeresa Baba wathu kupiringana ntsembe, ndipo ule anafunga makutu ace kuna anyakutcerenga, kulira kwace kwene kunadzasowa ntawiro. Kufuna kwa thupi kunapha mamuna wa mbwembwe. Kawiri kunalonga kuti cikona ca padenga ndi cadidi kupiringana kukhala nyumba ibodzi na nkazi wa mapopo.
21 1Ntima wa mambo ndi mkulo wa madzi m'manja mwa Baba wathu; Iye asauzungunusa konsene kunafuna Iye. 2Njira zonsene za munthu zisaoneka zakulungama m'maso mwace, mbwenye Baba wathu asayesa ntima. 3Kucita pyakulungama na pyakuthema kusakomeresa Baba wathu kupiringana ntsembe. 4Maso akudzikuza na ntima wakudzikuza— nyale ya anyakuipa—ndi madawo. 5Mabangiro a anyakuwangisira asabweresa pyakudzala, mbwenye onsene anacimbiza-cimbiza asafika mu usauka. 6Kugumana mpfuma na lirimi lyauthambi ndi utci unamala mwakucimbiza, nsampha wakupha. 7Ciwembo ca anyakuipa cinaakwekweta, thangwi iwo asakhonda kucita pyakulungama. 8Njira ya nyakudawa ndi yakupotoka, mbwenye macitiro a wakucena ndi akulungama. 9Mphyadidi kukhala pa ngodya ya nsoyo kupiringana kukhala m'nyumba ibodzi na nkazi wa makani. 10Moyo wa nyakuipa usafuna pyakuipa kakamwe; ndzace nkhabe kugumana ntsisi m'maso mwace. 11Nyakunyoza angalangwa, anthu akusowa ndzeru asakhala andzeru; wandzeru angapfundziswa, asathimiza cidziwiso. 12Baba wathu, Wakulungama, asadinga nyumba ya anyakuipa mbaafudza anyakuipa. 13Ule anafunga makutu ace ku kulira kwa anyakutcerenga anadzalira pontho mbakhonda kutawirwa. 14Muoni unapaswa mwacibisobiso usatonthoza ukali, na cipfupo cakubiswa n'nguwo usatonthoza ukali ukulu. 15Ulungami ungacitwa, ndi kutsandzaya kwa anyakulungama, mbwenye kugopa kwa ale anacita pyakuipa. 16Munthu anasochera njira ya kubvesesa anadzapuma mu mbumba ya anyakufa. 17Ule anafuna kutsandzaya anadzakhala nyakusauka; ule anafuna vinyu na mafuta nkhabe kudzapfuma. 18Nyakuipa asakhala cakuombola ca nyakulungama, na nyakunyengeza m'mbuto mwa wakulungama. 19Mphyadidi kukhala n'thando kupiringana kukhala na nkazi wa makani na wakung'ung'udza. 20Mpfuma zakufunika na mafuta piri m'nyumba mwa wandzeru, mbwenye nyakupusa asadya pyonsene piri na iye. 21Ule anatowezera kulungama na kufuna kwakukhulupirika anadzagumana umaso, kulungama, na cilemedzo. 22Munthu wandzeru asakwira n'zinda wa anyamphambvu mbagwesa linga inakhulupira iwo. 23Ule anakoya mulomo na lirimi lyace asatsidzikiza ekhene ku nyatwa. 24“Nyakunyoza” ndi dzina ya munthu wakudzikuza na wakugaya anacita pinthu mwakupfuwa kakamwe. 25Cifuno ca munthu waulesi cisapha iye, thangwi manja ace asakhonda kuphata basa. 26Ntsiku yonsene cifuno cisakula, mbwenye nyakulungama asapereka mbakhonda kuumira. 27Ntsembe ya nyakuipa ndi yakunyanyasa—koma kakamwe ingaperekwa na manyerezero akuipa. 28Mboni yauthambi inadzafa, mbwenye ule anabvesera anadzapereka umboni wakukhonda kumala. 29Nyakuipa asawangisa nkhope yace, mbwenye wakulungama asanyerezera njira zace. 30Nkhabe ndzeru, nkhabe kubvesesa, nkhabe uphungu zinakwanisa kulimbana na Baba wathu. 31Kavalo asakhunganyiswa toera ntsiku ya nkhondo, mbwenye kupembera ndi kwa Baba wathu.
