Chānsam 21

21 ¹Awungawui ning hi ithumwui Avāwui pāngli tara̱ kongna; awui ningkachāng athishurda ana chili ngareithui. ²Mi akhawui apong saikora khalattawui miktāli mashungrikhai, kha ithumwui Avāna ning chāng yanga. ³Khamashung khangarong sāki kaji hi pha̱kaphayā vanga ithumwui Avāli ningyāng ung phāmei. ⁴Ngamsor kahai mikyan kala langkaso ning, makhayāwui thaomei, moreina. ⁵Khamakhuna miwui khangarānna kachungkhali thānvā, kha machukmaja kachiva̱ china chāmli zangra. ⁶Kakapika male eina shāng samphangki kaji hi aremana, thikapai khalenna. ⁷Makhayāwui khangashaona athumli khuithuihaora, kaja athumna mashun sāki kaji marāngaimana. ⁸Yon kahai miwui apong kha̱khamakheina, kha tharkahai miwui otsakna khangarongna. ⁹Khararkazar sha̱naomāng shim ngarumli ngasokapam vanga, shimtung achikunli ngasokapam phāmei. ¹⁰Makhayāwui manglāna makaphā ningchāngphāphai; awui khongnainaona awui mikyanli lumashan masamphangmana. ¹¹Mana̱shikatha̱ali tandi mi tharan, ningkapaina thangmeira; thangkhama mili hāngmachin tharan, ana theikakhui mataisangra. ¹²Ithumwui Avā, Khamashunga chi, makhayāwui shimli tamyanga kala makhayāli kashimānli zangngasaka. ¹³Kachāma miwui khavaoli khanā kafakham a china anala khangakao tharan chānhan masamphangmara. ¹⁴Ngathumda mihai run na malungkhavāt vān ngasaka, kala pheizā akha kachonli shungnam a china malung kasā ngalanthui ngasaka. ¹⁵Mashun sākhui tharan, khamashunga mili khamathānna kha makaphā kasābingli khangacheena. ¹⁶Theishingkakhuiwui apong eina thuikahai mi china kathibingwui kazipli ngaso pamra. ¹⁷Ningyāng khaung leishi a china chāmngasakra; zam kala thao leishi a china khipākha mashāngluimara. ¹⁸Makhayā mi china khangaronga miwui vang ngatangman ngasāra, kala mashitkasangbing china mashungrik kahaibingwui vang ngatangman ngasāra. ¹⁹Khararkazara kala ngachonkazā sha̱naoli ngateikapam, siwuk ngaleili ngasokapam phāmei. ²⁰Aman kasaka lan kala thao chi thangkhameiwui shimli lei, kha mangkhama̱na awui khalei saikora shaira. ²¹Khamashung khangarong kala lukhamashanli kakharoma china kharing, khamashung khangarong, kala khayākakā samphangra. ²²Thangkhamana kapangpangabingwui keinungli khayuiya ngasa, kala athumna ninghorsang kaji raimipam chi kongkhalui ngasaka. ²³Awui khamor kala amale khamayon china, khalatta kakhanang eina phāriya. ²⁴"Mana̱shikatha̱" hi langkasoa kala hiksor kahaia, kayākha juida achei makathei eina otsak kasā miwui amingna. ²⁵Chāngshewui khangarān china ali sāthata, kaja awui pāngna yāng chishot sākhavai marāngaimana. ²⁶Langpongda khangarān mataisangra, kha khangaronga mina khamda mahorhaimana. ²⁷Makhayāwui pha̱kaphayā chi ningkakachaina; makaphā ningphanin eina chigatakha kayākha mataida ningkakachaina! ²⁸Kakapika shākhina shimānra, kha nganākasang mi china katang shākhi sāchingra. ²⁹Makhayā mina amai ngatarngasaka, kha mashungrik kahaina awui shongfa phaningkachunga. ³⁰Ithumwui Avāli ngakaikashe khavaia thangkhamei akhala maleimana, theishingkakhui akhala maleimana, hāngkachithei akhala maleimana. ³¹Rai zimikshowui vang sigui chi khamasui ngasaka, kha khayui hi ithumwui Avāwuina.