Òwe 21

21 ¹Ọkàn ọba jẹ́ ìṣàn omi ní ọwọ́ Baba wa; ó ń yí i padà sí ibi yòówù tí ó bá wù ú. ²Gbogbo ọ̀nà ènìyàn dàbí èyí tí ó tọ́ ní ojú ara rẹ̀, ṣùgbọ́n Baba wa ni ó ń wọn ọkàn. ³Láti ṣe òdodo àti ìdájọ́ òtítọ́ wu Baba wa ju ẹbọ lọ. ⁴Ojú ìgbéraga àti ọkàn agberaga— fìtílà àwọn ènìyàn búburú—jẹ́ ẹ̀ṣẹ̀. ⁵Èrò àwọn tí ń ṣiṣẹ́ kára máa ń mú ọ̀pọ̀yọ̀ wá dájúdájú, ṣùgbọ́n gbogbo àwọn tí ń kánjú á parí sí òṣì. ⁶Ṣíṣe ọrọ̀ nípa ahọ́n èké jẹ́ èéfín tí ń kọjá lọ kánkán, ìdẹkùn ikú. ⁷Ìwà ipá àwọn ènìyàn búburú yóò wọ́ wọn lọ, nítorí tí wọ́n kọ̀ láti ṣe ohun tí ó tọ́. ⁸Ọ̀nà ẹlẹ́bi jẹ́ wíwọ́, ṣùgbọ́n ìwà ẹni mímọ́ dúró ṣánṣán. ⁹Ó sàn láti gbé ní igun orí òrùlé ju láti bá aya oníjà gbé ní ilé kan náà lọ. ¹⁰Ọkàn ènìyàn búburú ń fẹ́ ibi; aládùúgbò rẹ̀ kò rí àánú ní ojú rẹ̀. ¹¹Nígbà tí a bá fi ìyà jẹ ẹlẹ́gàn, aláìmọ̀kan a gbọ́n; nígbà tí a bá kọ́ ọlọ́gbọ́n, ó ní ìmọ̀. ¹²Baba wa, Olódodo náà, ń kíyèsí ilé àwọn ènìyàn búburú, ó sì mú àwọn ènìyàn búburú wá sí ìparun. ¹³Ẹnikẹ́ni tí ó bá di etí rẹ̀ sí igbe tálákà yóò kígbe pẹ̀lú, a kì yóò sì dáhùn rẹ̀. ¹⁴Ẹ̀bùn tí a fi fún ni ní ìkọ̀kọ̀ a máa tu ìbínú, àti àbẹ̀tẹ́lẹ̀ tí a fi sínú aṣọ a máa fàgà fún ìrunú líle. ¹⁵Nígbà tí a bá ṣe ìdájọ́ òdodo, ó jẹ́ ayọ̀ fún olódodo ṣùgbọ́n ìpayà fún àwọn tí ń ṣe ibi. ¹⁶Ènìyàn tí ó bá yẹ̀ kúrò ní ọ̀nà òye yóò sinmi ní àpéjọ àwọn òkú. ¹⁷Ẹni tí ó bá fẹ́ràn ìgbádùn yóò di tálákà; ẹni tí ó bá fẹ́ràn wáìnì àti òróró kì yóò là láé. ¹⁸Àwọn ènìyàn búburú a máa di ìràpadà fún olódodo, àti àwọn aṣèké fún ẹni dídúró ṣánṣán. ¹⁹Ó sàn láti gbé ní aginjù ju láti bá aya oníjà àti aráhùn gbé lọ. ²⁰Ìṣúra iyebíye àti òróró wà ní ilé ọlọ́gbọ́n, ṣùgbọ́n aṣiwèrè a máa jẹ gbogbo ohun tí ó ní run. ²¹Ẹni tí ó bá lépa òdodo àti ìfẹ́ olóòótọ́ yóò rí ìyè, òdodo, àti ọlá. ²²Ọlọ́gbọ́n a máa gun ìlú àwọn alágbára, a sì wó odi tí wọ́n gbẹ́kẹ̀lé lulẹ̀. ²³Ẹni tí ó bá ṣọ́ ẹnu àti ahọ́n rẹ̀ pa ara rẹ̀ mọ́ kúrò nínú wàhálà. ²⁴“Ẹlẹ́gàn” ni orúkọ onígbèraga àti agberaga tí ń hùwà ìfojúdí àṣejù. ²⁵Ìfẹ́kúfẹ̀ẹ́ ọ̀lẹ a máa pa á, nítorí ọwọ́ rẹ̀ kọ̀ láti ṣiṣẹ́. ²⁶Ní gbogbo ọjọ́ ni ìfẹ́kúfẹ̀ẹ́ ń pọ̀ sí i, ṣùgbọ́n olódodo a máa fi fúnni, kì í sì í fà sẹ́yìn. ²⁷Ẹbọ àwọn ènìyàn búburú jẹ́ ohun ìríra— mélòómélòó ni jù bẹ́ẹ̀ lọ nígbà tí a bá fi èrò búburú mú un wá. ²⁸Ẹlẹ́rìí èké yóò ṣègbé, ṣùgbọ́n ẹni tí ó bá fetísílẹ̀ yóò jẹ́rìí tí yóò dúró pẹ́. ²⁹Àwọn ènìyàn búburú a máa ṣe ojú líle, ṣùgbọ́n ẹni dídúró ṣánṣán a máa ronú ọ̀nà rẹ̀. ³⁰Kò sí ọgbọ́n, kò sí òye, kò sí ìmọ̀ràn tí ó lè dúró lòdì sí Baba wa. ³¹A ń pèsè ẹṣin sílẹ̀ de ọjọ́ ogun, ṣùgbọ́n ti Baba wa ni ìṣẹ́gun.