Kraan ngamnu ga ani Pa omme
Ririak senu khatle ra-aamnu. Ririak senu khatle bazenu chwan bing ga, rikhaang pot kat thangnu ma bazan, ani Pa khou pi pem taknuwe, khatle kasonnu om kou ding nakanaa bang satnu maan ga, baraanto le kou kaan bi katak lou laye. Takaatnu om ra-aamnu gana bating ding that nge. Leng kani maanna, sian ra-aamnu mei le bachamnu pwan in ma, in chung om khaak bi lungnu ga pha inku nge diga rinne.
21 1Krwang om sung ga ani Pa bakut bi ongnu tui bazwan gaye; Maanna Baom pem bi haga pi han thang nge. 2Mi khat om lampui bing ga baom bamik bi ririak senu danne, atiyeda ani Pa na sung ding thaak nge. 3Ririak senu khatle bazenu chwan bing ga, rikhaang pot kat thangnu ma bazan ding ani Pa khou pi pem taknuwe. 4Lian tonu mik khatle phun liannu sung— kasianu rwan om lampui—ga noh gaye. 5Takaat maknu rwan om baning gana batak takka khopsanu khou tang nge, atiyeda kalwang tonu bing ga lungsianu khou tang nge. 6Minamnu tong paan bina lungsanu lousunu ga, barapka maaknu meihu khatle thinu zanu phaa gaye. 7Kasianu rwan om kabit kamainu na bani ding kai latlune, balangbe banina bazenu senu chwan ga to lang nwam make. 8Koinu mi om lampui ga kadipnu gaye, atiyeda bathiangnu mi om lamchat ga banim gaye. 9Sian ra-aamnu mei le diga pwan in bi lungnu ma bazan, in chung om khaak bi lungnu ga pha inkunuwe. 10Kasianu mi om katha na noh ding ra-aam nge, baom bakaba na le baom mik bina phaangkriang lou make. 11Rin basiat kalenu mi ding rai thangnu kaan bi, ningting maknu mi bing ga bachang sanu to nge; bachang sanu mi ding bachu thangnu kaan bi, banina theinu lousu nge. 12Ririak senu ani Pa na kasianu rwan om in ding ngaakluga, kasianu rwan ding braannu khou pi tang nge. 13Tudannu lungsianu rwan om paonu khou bana khaan damnu maan ga, maan le paolune atiyeda katak thang zalaye. 14Inthimga pinu leithwan na balung pwannu ding pi dai thang nge, khatle pwan sung bi pi khutnu man na kaliannu balung pwannu ding pi mit nge. 15Ririak sega chong sem thangnu kaan bi, haga ririak senu mi lang ga karonu gaye, atiyeda noh chaat tonu rwan lang ga kachinu gaye. 16Ningtingnu lampui bina semaannu mi ga, kathi rwan om khom thounu bi lo basaklune. 17Tudannu lozaannu ding kriangnu maan ga lungsianu to nge, tudannu zu le thao le kriangnu maan ga mukhwale lungsanu tolaye. 18Kasianu rwan ga ririak senu mi lang ran swaknu man to nge, khatle rou sianu rwan ga bazenu mi lang ran swaknu man to nge. 19Sian ra-aamnu khatle kae kanaanu mei le diga lungnu ma bazan, ramkaang ram bi lungnu ga pha inkunuwe. 20Bachang sanu mi om in bi baman kungnu lan khatle thao amme, atiyeda kapangnu mina baom am tamnu bing ding dwan brumza nge. 21Tudannu ririak senu khatle balumsa zanu kriangnu ding rakanga zongnu maan ga, ringnu, ririak senu khatle lwat liannu ding lousulune. 22Bachang sanu mina ngam lak pi rwan om namlian ding ka nge, atiga banina balumsa ongnu rangkaan in ding pi baota thanglune. 23Tudannu baom mui khatle tong ding rangkaan thangnu maan ga, baraanto ding riangre kanangnu bina kan thang nge. 24“Rin basiat kalenu” ga, phun liannu khatle kaphu kaphenu, baraam basaangga ngam choi pi chwan tonu mi om bameng gaye. 25Takaatnu mi om ra-aamnu na maan ding that nge, balangbe bakut na chwan to lang za make. 26Lumik brum ga ra-aamnu ga inku thou nge, atiyeda ririak senu mina pi nge atiga nung han lat make. 27Kasianu rwan om rikhaang pot ga batannu gaye, noh baning le diga phun hungnu kaan bina ga tam inkunuwe. 28Chong karwaknu sakepuba ga braanlune, atiyeda tudannu ngai sunu maan ga kaling maknu sake pilune. 29Kasianu mina baom mai ding sung raangga pi to nge, atiyeda bazenu mina baom lampui bing ding thou karakka baning nge. 30Ani Pa maitwang bi kating ngamnu kutthiam, theinu khatle baningnu khatchale maake. 31Raqwan ga baraanto lumik lang daan thang nge, atiyeda kraan ngamnu ga ani Pa omme.