Tanaat le Lungsanu lang Ningtingnu
Lan tamnu ma kasanu nameng ga lousu ding gaye, atiga za ongnu mina kasonnu ding krwang ong nge, khatle lei lounu mi ga lei pinu mi om swak gaye. Lak pina, bana ga bachu thangnupa khat bi pi goluga, chong somthum pi ong nge: kasonnu ga kason briakpina maan ding baru sa mako, khatle balung karak thangnu mi le baan to mako.
22 1Lan tamnu ma kasanu nameng ga lousu ding gaye, khatle za thangnu ga lupa mak tabe sana ma bai inkuwe. 2Tanaat mi le lungsanu mi le kadou kanuwe; bani brum ga dam thangnu ani Pa gaye. 3Ningtingnu mina riangre ding muluga inthim thang nge, atiyeda bachunu mina se ongluga riangre khaanglune. 4Bangiamnu khatle ani Pa ding kachinu om taswan ga lan, lwat liannu khatle ringnu gaye. 5Kadipnu mi om lampui bi kaling le nam le phaa amme; tudannu baom katha karak theinu maan ga haga bina namlaaga ongme. 6Naanu khat ding maan se dingnu lampui bi bachu thang ngo, atiga maan patso to kaan bi le haga bina impaan swaklaye. 7Tanaat mina lungsanu lu chung bi paanne, khatle lei lounu mi ga lei pinu mi om swak gaye. 8Tudannu ririak se maknu bwan thangnu maan gana riangre lwaklune, khatle baom balung pwan om sungrwan ga braanlune. 9Tudannu sung lianga swaknu mik amnu maan ga leithwan phanglune, balangbe maanna baom talo ga lungsanu ding badam lou bachamme. 10Choinu mi ding kazun satro, atiga kae kanaanu ga maan le khatcha seluga, kabit kamainu le kasianu kabianu ga tanglune. 11Tudannu tun natnu sung kriangnu khatle phaangkriangna chong kabianu maan ga, razapuba ga baom malwang to onglune. 12Ani Pa om mikna thei dingnu ding barak theiye, atiyeda zwansa om chong ding Maanna pi braan thanglune. 13Takaatnu mina rinne, “Sawang bi takhu krwang amme! Ei lampui bi athat thang zalune!” 14Batannu nulwei rwan om bao ga khun kathuknu gaye; tudannu ani Pa om balung pwan kai hung thangnu maan ga haga khun bi ta thanglune. 15Kapangnu ga naanu om sung bi karak thang nge, atiyeda twei thangnu sungrwanna haga ding namlaaga kazun satlune. 16Tudannu balaang tanaat to lang lungsanu ding katop thangnu, mak tabe tanaat mi ding pinu maan ga, lungsanu to zung nge.
Kasanu toga Ngaisuro
17Ningtingnu rwan om chong ding barak theiga ngaisuru, khatle nasung ding ating thei dingnu lang kat thang ngo, 18balangbe nangna haga nasung bi daan, haga brum ga namun bi daan thang damnu dabe, haga karolune. 19Nabalumsat ga ani Pa khou ong lang, aniya eina haga ding nang khou, nang khou le indao thang rwe. 20Eina nang lang thiraang chong, baningnu le thei dingnu om chong ga kasin thang makpo, 21ririak senu le bazenu ding nang khou bachu thang lang, nang ding bathan thangnu rwan khou bazenu katake nangna pi lang.
22Lungsanu ding barusa mako, balangbe maan lungsanu briakpina, mak tabe inkhaanmun bi riangre khaangnu mi ding kadim mako, a a v22 Kama namlian bing bi inkhaanmun ga chongtan kae kanaanu khatle mi brum om chwantok tonu riak ngaake. 23balangbe ani Pa na bani lang hweicha thanglune khatle bani ding barusanu rwan om ringnu ding Maanna louthou thanglune.
24Mi khat ding malwang to mako, maan balung pwan taknu briakpina, khatle sung sia barapnu mi le diga se mako, 25ati makka nangna baom lampui ding bachu luga, nam bi nang ta thang zalune.
26Kut thin pinu rwan lak pi pakhat to mako, mi om lei lang bapi damnu rwan lak pi le. 27Nangna thun dingnu khatchale am make dabe, pa-aam toga naria ga nakhouna take thang dingbo?
28Kama ram tanu lung ding tong mako, haga napa rwanna daan thang ngaaknuwe.
29Baom chwan bi kutthiam mi khat nangna mubo? Maan razapuba rwan meithaan bi tinglune; bachunu baatnu mi rwan meithaan bi ting laye.