Òwe 20

20 ¹Ẹlẹ́yà ni wáìnì, oníjàngbọ̀n ni ọtí líle, ẹnikẹ́ni tí ó bá ń ta gbọ̀nràgbọ̀nràn nínú rẹ̀ kì í ṣe ọlọ́gbọ́n. ²Ẹ̀rù ọba dàbí bí kìnnìún ṣe ń hó; ẹnikẹ́ni tí ó bá mú un bínú fi ẹ̀mí ara rẹ̀ ṣòfò. ³Ọlá ni fún ènìyàn láti yẹra fún ìjà, ṣùgbọ́n gbogbo òmùgọ̀ a máa yára bẹ̀rẹ̀ ìjà. ⁴Ọ̀lẹ kì í tulẹ̀ ní ìgbà òtútù; nítorí náà ní àkókò ìkórè ó ń wá ohun ọ̀gbìn, kò sì rí nǹkan kan. ⁵Èrò inú ọkàn ènìyàn dàbí omi jíjìn, ṣùgbọ́n ẹni tí ó ní òye á fà wọ́n jáde. ⁶Ọ̀pọ̀ ènìyàn ni ó ń pòkìkí ìfẹ́ olóòótọ́ ti ara rẹ̀, ṣùgbọ́n ẹni olóòótọ́—ta ni ó lè rí i? ⁷Olódodo ń rìn nínú ìdúró ṣinṣin rẹ̀; ìbùkún ni fún àwọn ọmọ rẹ̀ lẹ́yìn rẹ̀! ⁸Ọba tí ó jókòó lórí ìtẹ́ ìdájọ́ ń fi ojú rẹ̀ gbọn gbogbo ibi dànù. ⁹Ta ni ó lè wí pé, “Mo ti pa ọkàn mi mọ́ ní mímọ́; a ti wẹ̀ mí mọ́ kúrò nínú ẹ̀ṣẹ̀ mi”? ¹⁰Òsùwọ̀n tí kò dọ́gba àti ìwọ̀n tí kò dọ́gba—Baba wa kórìíra méjèèjì. ¹¹Àní ọmọdé ni a mọ̀ nípa ìṣe rẹ̀, nípa bóyá ìwà rẹ̀ mọ́ tí ó sì tọ́. ¹²Etí tí ń gbọ́ àti ojú tí ń ríran—Baba wa ló dá méjèèjì. ¹³Má fẹ́ oorun, kí o má bàa di tálákà; la ojú rẹ, ìwọ yóò sì ní oúnjẹ lọ́pọ̀lọpọ̀. ¹⁴“Kò dára, kò dára!” ni olùrà ń wí—nígbà náà ó bá lọ, ó sì ń ṣògo nípa ọjà tí ó rà. ¹⁵Wúrà wà àti ọ̀pọ̀lọpọ̀ ohun ọ̀ṣọ́ iyebíye, ṣùgbọ́n ètè tí ń sọ̀rọ̀ ìmọ̀ jẹ́ ìṣúra ṣọ̀wọ́n. ¹⁶Gba aṣọ ẹni tí ó ṣe onídúró fún àjèjì; dì í mú gẹ́gẹ́ bí ẹ̀rí nígbà tí ó bá ṣe bẹ́ẹ̀ fún àwọn àlejò. ¹⁷Oúnjẹ tí a fi ẹ̀tàn rí a máa dùn, ṣùgbọ́n lẹ́yìn náà ẹnu á kún fún òkúta wẹ́wẹ́. ¹⁸Ìmọ̀ràn ni a fi ń fìdí ètò múlẹ̀; nítorí náà máa jagun kìkì pẹ̀lú ìtọ́sọ́nà ọgbọ́n. ¹⁹Olófòófó ń tú àṣírí; nítorí náà má ṣe bá ẹni tí ń sọ̀rọ̀ púpọ̀ kẹ́gbẹ́. ²⁰Ẹnikẹ́ni tí ó bá fi bàbá tàbí ìyá rẹ̀ ré—a ó pa fìtílà rẹ̀ kú ní àárín òkùnkùn biribiri. ²¹Ogún tí a jogún kíákíá jù ní ìbẹ̀rẹ̀ kì yóò ní ìbùkún ní ìkẹyìn. ²²Má wí pé, “Èmi yóò san ibi padà fún ibi.” Dúró de Baba wa, òun yóò sì gbà ọ́. ²³Baba wa kórìíra òsùwọ̀n tí kò dọ́gba, ìwọ̀n ẹ̀tàn kò sì dára. ²⁴Baba wa ni ó ń tọ́ ìṣísẹ̀ ènìyàn; báwo wá ni ẹnikẹ́ni ṣe lè lóye ọ̀nà ti ara rẹ̀? ²⁵Ìdẹkùn ni fún ènìyàn láti fi kánjúkánjú ya ohun kan sí mímọ́, kí ó sì tó ronú ẹ̀jẹ́ náà padà lẹ́yìn náà. ²⁶Ọba ọlọ́gbọ́n a máa gbọn àwọn ènìyàn búburú dànù, ó sì ń yí kẹ̀kẹ́ ìpakà kọjá lórí wọn. ²⁷Ẹ̀mí ènìyàn ni fìtílà Baba wa, tí ń wá gbogbo ibi jíjìn inú rẹ̀. ²⁸Ìfẹ́ olóòótọ́ àti òtítọ́ a máa pa ọba mọ́; nípa ìfẹ́ olóòótọ́ ni a fi ń gbé ìtẹ́ rẹ̀ ró. ²⁹Ògo àwọn ọ̀dọ́ ni agbára wọn, ṣùgbọ́n ọlá àwọn àgbàlagbà ni ewú orí. ³⁰Ìlù tí ń pani lára ń fọ ibi nù, nínà sì ń wẹ ibi jíjìn inú mọ́.