Òwe 19

19 ¹Ó sàn kí ènìyàn jẹ́ tálákà tí ó ń rìn nínú ìwà ìdúró ṣinṣin rẹ̀ ju ẹni tí ọ̀rọ̀ rẹ̀ wọ́ tí ó sì jẹ́ aṣiwèrè lọ. ²Bẹ́ẹ̀ sì ni, ìfẹ́-ọkàn láìní ìmọ̀ kò dára, ẹni tí ó sì ń ṣe ohun pẹ̀lú ìkánjú yóò ṣìnà. ³Ìwà òmùgọ̀ ara ènìyàn ni ó ba ọ̀nà rẹ̀ jẹ́, síbẹ̀ ọkàn rẹ̀ ń bínú sí Baba wa. ⁴Ọrọ̀ ń mú ọ̀rẹ́ púpọ̀ kún, ṣùgbọ́n a yà tálákà kúrò lọ́dọ̀ ọ̀rẹ́ rẹ̀. ⁵Ẹlẹ́rìí èké kì yóò lọ láìjìyà, ẹni tí ó sì ń mí irọ́ jáde kì yóò bọ́. ⁶Ọ̀pọ̀ ènìyàn ni ń wá ojú rere ẹni ọ̀làwọ́, gbogbo ènìyàn sì jẹ́ ọ̀rẹ́ fún ẹni tí ń fúnni ní ẹ̀bùn. ⁷Gbogbo arákùnrin tálákà ni ó kórìíra rẹ̀; mélòó mélòó ni àwọn ọ̀rẹ́ rẹ̀ yóò ha ṣe jìnnà sí i! Ó ń pè wọ́n, ṣùgbọ́n wọ́n ti lọ. ⁸Ẹni tí ó bá ní ọgbọ́n fẹ́ràn ọkàn ara rẹ̀; ẹni tí ó bá pa òye mọ́ yóò rí rere. ⁹Ẹlẹ́rìí èké kì yóò lọ láìjìyà, ẹni tí ó sì ń mí irọ́ jáde yóò ṣègbé. ¹⁰Ìgbádùn kò yẹ aṣiwèrè—mélòó mélòó ni kò ṣe yẹ fún ẹrú láti jọba lórí àwọn ọmọ-aládé. ¹¹Òye rere ènìyàn ní í mú kí ó lọ́ra láti bínú, ògo rẹ̀ sì ni láti fojú fo ìrékọjá dá. ¹²Ìbínú ọba dàbí bíbú ramúramù kìnnìún, ṣùgbọ́n ojú rere rẹ̀ dàbí ìrì lórí koríko. ¹³Ọmọ aṣiwèrè jẹ́ ìparun fún baba rẹ̀, ìjà aya sì dàbí omi tí ń kán jọ̀jọ̀ láìdáwọ́dúró. ¹⁴Ilé àti ọrọ̀ jẹ́ ogún láti ọ̀dọ̀ àwọn baba ńlá ènìyàn, ṣùgbọ́n aya olóye wá láti ọ̀dọ̀ Baba wa. ¹⁵Ọ̀lẹ ń sọni sínú oorun kíkùn, ebi yóò sì pa ẹni tí kò ní nǹkan ṣe. ¹⁶Ẹni tí ó bá pa òfin mọ́ ń pa ẹ̀mí rẹ̀ mọ́; ẹni tí ó bá gan ọ̀nà rẹ̀ yóò kú. ¹⁷Ẹni tí ó bá ṣàánú sí tálákà ń wín Baba wa ní owó, Baba wa yóò sì san án padà fún un fún iṣẹ́ rẹ̀. ¹⁸Bá ọmọ rẹ wí nígbà tí ìrètí bá wà, má sì gbé ọkàn rẹ lé ìparun rẹ̀. ¹⁹Ẹni tí ó ní ìbínú ńlá gbọdọ̀ jìyà rẹ̀; nítorí bí ìwọ bá gbà á là, ìwọ yóò tún ní láti ṣe é lẹ́ẹ̀kan sí i. ²⁰Fetí sí ìmọ̀ràn, kí o sì gba ìbáwí, kí o lè ní ọgbọ́n ní àwọn ọjọ́ tí ń bọ̀. ²¹Ọ̀pọ̀lọpọ̀ ni ètò inú ọkàn ènìyàn, ṣùgbọ́n ìmọ̀ràn Baba wa ni yóò dúró. ²²Ohun tí à ń fẹ́ nínú ènìyàn ni ìfẹ́ májẹ̀mú, ó sì sàn kí ènìyàn jẹ́ tálákà ju kí ó jẹ́ òpùrọ́ lọ. ²³Ìbẹ̀rù Baba wa ń mú ni lọ sí ìyè, ẹni tí ó bá ní i yóò sinmi ní ìtẹ́lọ́rùn, láìsí ibi tí yóò kàn án. ²⁴Ọ̀lẹ a máa ri ọwọ́ rẹ̀ sínú àwo, kì yóò sì tilẹ̀ mú un padà wá sí ẹnu rẹ̀. ²⁵Lu ẹlẹ́gàn, òpè yóò sì gba ọgbọ́n; bá olóye wí, yóò sì ní ìmọ̀. ²⁶Ẹni tí ó bá hùwà ipá sí baba rẹ̀ tí ó sì lé ìyá rẹ̀ jáde jẹ́ ọmọ tí ń mú ìtìjú àti àbùkù wá. ²⁷Jáwọ́ nínú fífetí sí ẹ̀kọ́, ọmọ mi, ìwọ yóò sì ṣáko kúrò nínú ọ̀rọ̀ ìmọ̀. ²⁸Ẹlẹ́rìí asán ń fi ìdájọ́ òdodo ṣẹ̀fẹ̀, ẹnu ènìyàn búburú sì ń gbé ìwà búburú mì. ²⁹A ti pèsè ìjìyà sílẹ̀ fún àwọn ẹlẹ́gàn, àti pàṣán fún ẹ̀yìn àwọn aṣiwèrè.