Mi eng' bukuit

Kalewenaik 19 FHB Father's Heart Bible™

Kiistoi 15% eng' kiy ne iale korook →
Bukuit

Tononi Kirwoogetap Kwandanyo

Pooryeet ak togeet, ne kimwaei ma eng' rireenet: koteschin mogornateet togeet, ago wechei pooryeet agot tupchennyi tugul. Tei nooto kityage ng'omnateet, amu yaei ng'omnatetap chiito kosip konereech, ak toroornatennyi ko koregei lelutyet. Kogoochin pooryeet ko kilache Kwandanyo.

Sura 19.

Karaaran pooryeet ne wendote eng' imanit, kosiir ineendet ne ngelelyo ng'aleekyik ak ne abusat. Kora, mageet ne ma tinyei kaguiyet koma myee, ak age tugul ne yaei eng' kagirgiret koleel ooreet. Ng'emei abusnatetap chiito ooreennyi, ago nereekyin muguleldanyi Kwandanyo. Tesei kimnateet choronok che chaang', ago kibesyo pooryeet ak choronyi. Paoryat ne po lembenik koma kinyoorchin ng'oogisto, ak ineendet ne iwolei lembenik koma chilili. Chaang' che cheeng'ei kaalyeet ne po chiito ne aiyebeen, ak age tugul ko choronyi ne igoochin kagoochinoik. Wechei tupchetap pooryeet tugul ineendet; ii ko choronokyik komanyit kong'etee ineendet! Kuurei icheek, ago kagoba. Age tugul ne nyoor ng'omnateet kochamei saboondanyi; ak ne riibei kaguiyet konyooru ne myee. Paoryat ne po lembenik koma kinyoorchin ng'oogisto, ak ineendet ne iwolei lembenik komeei. Ma nyolu saboondo ne karaaran eng' chiito ne abusat—kosiir otwogindet ne laitorani laitorinik. Yaei ng'omnatetap chiito kosip konereech, ak toroornatennyi ko koregei lelutyet. Angeetap laitoryat ko uu neranetap ng'etundo, ago kaalyeennyi ko uu ropta eng' susweek. Weeriit ne abusat ko ng'emisyet eng' kwandanyi, ak ng'oritap cheptonyi ko uu peek che chotei ne po kotugul. Koot ak kimnateet ko poroteet ne punu kwanisyek, ago cheptap chii ne ng'oom ko punu Kwandanyo. Inde potyot ruutyet ne oo, ak chiito ne ma boisyei koamei rubeet. Age tugul ne riibei ng'atuutyet koriibei saboondanyi; ak ne wechei ortinwekyik komeei. Age tugul ne igoochini pooryeet eng' aiyebindo ko aldei Kwandanyo, ak iyaagun Kwandanyo poisyennyi. Tigoon weeriing'ung' ye tai komi kamang'unet, amat inde muguleldang'ung' eng' meennyi. Chiito ne tinyei angeet ne oo konyolu konya kergong'yet; amu ngo isaru, inyolu iyai kora kogeny. Kas kirwooget ak itaach katigonet, si inyoor ng'omnateet eng' peetuusyek che nyoonei. Chaang' kabwaatutik che mi muguleldap chiito, ago kirwoogetap Kwandanyo ko ne tononi. Kiy ne imache eng' chiito ko rireenet, ak karaaran pooryeet kosiir kiplembechwa. Kaiyweisyetap Kwandanyo ko iyoe saboondo, ak ineendet ne tinyei koruei ko kagomyeeit, ma kinyoorchin yaityet. Une potyondet eunnyi eng' sanyeet, ago ma iwechi agot kutinnyi kogeny. Biir chotindet, si koneet chiito ne matinyei kiy ng'omnateet; iger chii ne ng'oom, si konyoor kaguiyet. Age tugul ne yaei koroomnateet eng' kwandanyi ak koriis kamennyi, ko weeriit ne ibu paornateet ak teweernateet. Weche kas kaneetisyet, weeriinnyu, si ilooitune ng'aleegap kaguiyet. Paoryat ne ma karaaran kochotei imanda, ak kutitap kiptengeginik koamei tengekto. Kagichobchi kergong'yet chotiik, ak kibirutik korotiigap che perber.