Meet ak Saboondo eng' Ng'elyep
Ng'alaalet ak gerchinet. Peek che loo ng'aleek che koibu meet anan saboondo, kutitap chii ne abusat ko mesteennyi ineegei, ak wolutyet ye tomo igas ko rosyinet. Mwaei kole chiito ne boljin ng'olyoondennyi taai ko aigai imanit agoi kingo iteep, ak ko nyigiis kiyan tupchoot ne kagiwech.
18 1Chiito ne gerchigei ko yaaktoi imachegei; kobargei ak ng'omnateet tugul ne po iman. 2Mebaibaitune chiito ne abusat naet, ago ebaibaitune kityo koboor kabwaatutikyik. 3Ye nyo tengekto, konyo agine sasisyet, ak ye nyo aach, konyo rosyinet. 4Ng'aleegap kutitap chiito ko peek che loo; kondap ng'omnateet ko kererut ne rootune. 5Ma myee ketiytiy piik eng' kiptengeginik, ak keisto kirwoogetap chiito ne po iman. 6Ibu kutitap chiito ne abusat suryet, ak kuure kutinnyi pireet. 7Kutitap chiito ne abusat ko ng'emisyennyi, ak kutinnyi ko mesteet eng' saboondanyi. 8Ng'aleegap chiito ne mwaetaenei piik ko uu amitwogik che ruryotin; chorbitoi agoi kwenutap muguleldanyi. 9Chiito ne ng'ologei eng' poisyennyi ko tupchetap ineendet ne ng'emei tuguuk. 10Kainetap Kwandanyo ko teekseet ne nyigan; labat chiito ne po iman kochut, ak ko riiboot. 11Tuguugap chiito ne mogoryot ko nganasennyi ne kiteech; ak eng' kabwaatutikyik ko uu irimeet ne koi. 12Ye tomo ng'emisyet, kotinyei menoteet muguleldap chiito, ago nyo ng'wonutyet ye tomo konyit. 13Ngot kowolji chiito ye tomo kogas, ko abusnatennyi ak kewiryatennyi. 14Imuuchi kabuusetap chiito koriip ineendet eng' myandeet, ago kabuuset ne kabek—ng'oo ne imuuchi koamuktoi? 15Nyooru muguleldo ne utaat naet, ak cheeng'ei iititap chiito ne ng'om naet. 16Yaatyin kagoochinetap chiito ooreet, ak koip ineendet taitap piik che oo. 17Chiito ne tai ne mwaei ng'aleekyik ko keere kole po iman, agoi konyo age koepchin ineendet. 18Tilei wiiretap koiik suryet, ak kopchei piik aeng' che tinyei kimnateet. 19Tupcho ne kagonereech ko nyigiis kiboor kosiir nganaseet ne kiteech, ak suryosyek ko uu rateiywotap teekseet. 20Piyang'dos moetap chiito eng' logoegap kutinnyi; kobiye eng' logoegap kutinnyi. 21Mi meet ak saboon eng' kamugetap ng'elyep, ak che chame ineendet ko tuun koam logoekyik. 22Chiito ne nyooru osotyot ko nyooru kiy ne myee, ak kotaachei kaalyeet eng' Kwandanyo. 23Soomei chiito ne poorto rireenet, ago wolji chiito ne mogoryot eng' koroomnateet. 24Chiito ne tinyei choronok che chaang' ko imuuchi koit ng'emisyet, ago mi choruandet ne neegiteenen kosiir tupcho.