Ilu 18 FHB Father's Heart Bible™

18 ¹Onye na-ekewapụ onwe ya na-achụso ọchịchọ nke aka ya; ọ na-emegide amamihe niile zuru oke. ²Onye nzuzu adịghị enwe mmasị na nghọta, kama naanị nʼikwupụta echiche nke aka ya. ³Mgbe ajọ omume bịara, nleda anya na-abịakwa, ihere na-ewetakwa nkọcha. ⁴Okwu si nʼọnụ mmadụ bụ mmiri miri emi; isi iyi nke amamihe bụ iyi na-asọ asọ. ⁵Ọ dịghị mma ile mmadụ anya nʼihu, nye onye ajọ omume, na-agọnarị onye ezi omume ikpe ziri ezi. ⁶Egbugbere ọnụ onye nzuzu na-eweta esemokwu, ọnụ ya na-akpọkwa ihe otiti. ⁷Ọnụ onye nzuzu bụ ịla nʼiyi ya, egbugbere ọnụ ya bụkwa ọnyà nye mkpụrụ obi ya. ⁸Okwu onye asịrị dị ka iberibe nri a họọrọ ahọ; ha na-arịda ruo nʼime ime mmadụ. ⁹Onye na-ada mbà nʼọrụ ya bụ nwanne onye na-ebibi ihe. ¹⁰Aha Nna anyị bụ ụlọ elu siri ike; onye ezi omume na-agbaba nʼime ya, a na-echekwakwa ya. ¹¹Akụ̀ ọgaranya bụ obodo e wusiri ike nke ya; nʼechiche ya ọ dị ka mgbidi dị elu. ¹²Tupu mbibi, obi mmadụ na-afụlị elu, ma ịdị umeala nʼobi na-ebu nsọpụrụ ụzọ. ¹³Ọ bụrụ na mmadụ aza okwu tupu ya ege ntị, ọ bụ enweghị uche ya na ihere ya. ¹⁴Mmụọ mmadụ pụrụ ịkwado ya nʼoge ọrịa, ma mmụọ e gwepịara agwepị—onye pụrụ ịnagide ya? ¹⁵Obi nwere nghọta na-enweta ihe ọmụma, ntị onye maara ihe na-achọsikwa ya ike. ¹⁶Onyinye mmadụ na-emeghere ya ụzọ, na-edubatakwa ya nʼihu ndị a ma ama. ¹⁷Onye mbụ kwuru okwu ikpe ya na-adị ka onye ziri ezi, ruo mgbe onye ọzọ ga-abịa nyochaa ya. ¹⁸Ife nza na-akwụsị esemokwu, na-ekewakwa ndị iro siri ike. ¹⁹Nwanne e kpasuru iwe siri ike idọta karịa obodo e wusiri ike, esemokwu dịkwa ka mkpọrọ igwe nke ebe e wusiri ike. ²⁰Site na mkpụrụ si nʼọnụ mmadụ, afọ ya na-eju; site na mkpụrụ egbugbere ọnụ ya ka afọ na-eju ya. ²¹Ọnwụ na ndụ dị nʼike ire, ndị hụrụ ya nʼanya ga-erikwa mkpụrụ ya. ²²Onye chọtara nwunye chọtara ihe ọma, na-anatakwa ihuọma site nʼaka Nna anyị. ²³Onye ogbenye na-arịọ arịrịọ ebere, ma ọgaranya na-eji obi ike aza okwu. ²⁴Nwoke nwere ọtụtụ ndị enyi pụrụ ịla nʼiyi, ma e nwere enyi nke na-arapara nso karịa nwanne.