Meyilü Kethi mu Kerhü
Jü mu uthi lamori zo. Uta poko jü kethüpüzo, kesa mori rhü keta, künyomi uta pü umakeyizo, mu fü reni kerace mifü la süo merho zo. Pü mejo kebako kerace kepoo mi kezi bi lüba, vele pü sazüh vori de pü kütso kerelü süo poyo, mu pü sazüh mejo keba kelayi keto khrü zo.
18 1Thüma kehopüri uthi thüma metülü kre süo pü münyü phuyo; mhashe kethozo metü züra rüdayo. 2Mhakenyoe mhaselü nümo, vele pü utho setükemo kasüyilüni nüyo. 3Küjo vori lize, mi kemo zü vori die; mu therholü po mesu zü vori. 4Thüma uta poko jü kethüpüzo; mhashe dzüsi dzü kekroba paiyo. 5Mezikemoko rho mekre süde, tsühi kemelümi kemejo phrasü süo veku mo. 6Künyomi mülü küdu voba, mu pü uta vü cüyo. 7Künyomi uta pu mhakemekazo, mu pü mülü pü kerhüro la umakeyizo. 8Sali thipü poko themu kenü bi; süko u kerhüro thethilü lüyo. 9Thüma kehopüri pü mhatholü khrü phi menuyi mo, süo merho thipü sazüh-ozo. 10Ha Po zao dahu kekupü zo; tsühi kemelü süo lü tasüde krü bayo. 11Künemi mhapüzhüo pü rüna kekupü zo; pü müdolü süo sazho kezhopü bi lüba. 12Küka kerace thüma kerhüro kemehayo, vele rho kerace rünu voba. 13Mipü fü reni kerace mifü la lize, süo pü künyo mu pü zhopo zholezo. 14Thüma rüpüoe kethilü pü khrühi bayo, vele rüpü kümüzhe sa—sopü hü süyive? 15Mhaco kerhüro mhase melüyo, mu mhashe mha füe süo phuyo. 16Thüma mhakha pü cho khri süyo, mu mi kekreko mhüzülü pü voyo. 17Pü mejo kebako kerace kepoo mi kezi bi lüba, vele pü sazüh vori de pü kütso kerelü. 18Cethi khüle thisü kümüli basamo tayo, mu kemetsu kekupü miko na thi vayo. 19Sazüh nümo basü rüna kekupü ceri ngoyi mezhepüzo, mu kümüli dahu cekha kedepü bi lüba. 20Thüma uta she la pü vade mügu veyo; pü mülü she la pü püma veyo. 21Kethi mu kerhüo meyi kekulü bate, mu süo kekhrümi süo she coto. 22Nopu ngomi kevepü ngoyo, mu ha Po celü kenü melüyo. 23Ketsakhumi vaphi süte de choyo, vele künemi kekri sü mifü la kesü. 24Sadzi kekro keba kükalü lüto, vele sazüh ceri petole khü basü kezü libi bate.
